جەڭىستىڭ 80 جىلدىعىنا وراي اۋليەاتا وڭىرىندە بىرقاتار شارالار وتكىزىلدى. اتاپ ايتقاندا, ش. ءۋاليحانوۆ اتىنداعى جامبىل وبلىستىق امبەباپ عىلىمي كىتاپحاناسى تاراز قالاسىنداعى «كەلەشەك-تاراز» عىلىمي-ينتەللەكتۋالدى مەكتەپ-ليتسەيىندە ۇلى وتان سوعىسىنداعى جەڭىستىڭ 80 جىلدىعىنا جانە كەڭەس وداعىنىڭ باتىرى, جازۋشى ب. مومىش ۇلىنىڭ 115 جىلدىعىنا وراي «تاۋ تۇلعا, دارا تۇلعا – باۋىرجان» اتتى جىلجىمالى كىتاپ كورمەسىن ۇيىمداستىردى.
كورمە بارىسىندا ب. مومىش ۇلىنىڭ ءومىرى مەن شىعارماشىلىعى, ۇلى وتان سوعىسى تاقىرىبىنا جازعان ەڭبەكتەرى جانە ول تۋرالى جازىلعان ەستەلىكتەردەن قۇرالعان 5 ستەللاج جاساقتالدى.
«بيىل ۇلى وتان سوعىسىنداعى جەڭىسكە 80 جىل تولىپ وتىر. بۇل كۇن بىزگە قاھارمان جاۋىنگەرلەردىڭ ەرلىگى جانە تىل ەڭبەككەرلەرىنىڭ ەرەن ەڭبەگىنىڭ ارقاسىندا كەلدى. ءبىزدىڭ وبلىستان 100 مىڭنان استام ادام مايدان دالاسىنا اتتانعان. ءبىز ا. سۋحامباەۆ, س. شاكىروۆ, ب. مومىش ۇلى, ى. سۇلەيمەنوۆ سياقتى باتىر بابالارىمىزدىڭ ەرلىگىن ەشقاشان ۇمىتپايمىز. بۇگىنگى ءىس-شارامىزدىڭ ماقساتى دا – وسى», دەيدى كورمە جەتەكشىسى ش. كوشەنوۆا.
بۇل كۇنى تارازدىق جاستار اۋعان سوعىسى ارداگەرلەرى تۇراتىن ۇيلەردىڭ اۋلالارىندا تازالىق جۇمىستارىن جۇرگىزسە, تالاس اۋدانىندا اۋعان سوعىسى ارداگەرلەرىمەن كەزدەسۋ ۇيىمداستىرىلدى.
ايتا كەتەيىك, بۇگىندە وبلىس بويىنشا 6 سوعىس ارداگەرى جانە 1 447 تىل ەڭبەككەرى بار. بارلىق سوعىس ارداگەرىنە ءبىر رەتتىك قارجىلاي الەۋمەتتىك تولەم (5 ملن تەڭگە) تولەندى.
جامبىل وبلىسى
