19 ءساۋىر كۇنى تاڭعى ساعات 06.30-دا پاۆلودار قالاسىنىڭ 102 قىزمەتىنە 15 جاسار قىز بالا حابارلاسىپ, اكەسىنىڭ اناسىن ۇرىپ-سوعىپ جاتقانى تۋرالى حابارلاعان. قىز بالا اتاعان مەكەنجايعا پوليتسيا كاپيتانى الماز جاقىپوۆ پەن پوليتسيا لەيتەنانتى تولەگەن ءيسيندى دەرەۋ جىبەرىلەدى.
- قىزمەتكەرلەردى ءۇيدىڭ كىرەبەرىسىندە حابارلاسقان قىزدىڭ ءوزى قارسى الدى. ول اكەسى ءوزىن ۇرىپ-سوققانىن, ودان سوڭ پاتەردە اناسىن جابىرلەپ جاتقانىن جەتكىزگەن. پوليتسەيلەر كىرگەن كەزدە ماس كۇيدە بولعان 40 جاستاعى ەر ادام قاتتى قارسىلىق كورسەتىپ, پوليتسيا كاپيتانى الماز جاقىپوۆتىڭ سول قولىنىڭ بۋىنىنا پىشاق سالعان. پوليتسەي جاراقات العانىنا قاراماستان جانجالقور وتاعاسىنى زالالسىزداندىرىپ, ۇستادى,-دەپ حابارلادى وڭىرلىك پوليتسيا دەپارتامەنتىنىڭ ءباسپاسوز قىزمەتىنەن.
زارداپ شەككەن پوليتسەيگە مەديتسينالىق كومەك كورسەتىلگەن. ساراپشىنىڭ قورىتىندىسىنا سايكەس, بۇزاقى ەر ادام ورتاشا دارەجەدە ماس بولعان. پوليتسەيلەرگە شابۋىل جاساۋ دەرەگى بويىنشا قر قىلمىستىق كودەكسىنىڭ 380-بابى (بيلىك وكىلىنە قاتىستى زورلىق-زومبىلىق قولدانۋ) جانە 109-1-بابى (ۇرىپ-سوعۋ) بويىنشا قىلمىستىق ىستەر قوزعالدى.
پاۆلودار وبلىسى
