سۋرەتتى تۇسىرگەن – جۇماباي مۇسابەكوۆ
بۇگىندە وبلىستىڭ الەۋمەتتىك-ەكونوميكالىق دامۋ كورسەتكىشى ارتىپ, اۋىلدى ايماقتارعا كوبىرەك كوڭىل بولىنە باستادى. بۇل مەملەكەت باسشىسىنىڭ «قۋاتتى ايماقتار – قۋاتتى مەملەكەت» تۇجىرىمداماسىنىڭ ءبىر باعىتى رەتىندەگى ماڭىزدى قادامى. مىسالى, وبلىس قۇرىلعانعا دەيىن جەتىسۋ وڭىرىندە نەبارى 5 ەلدى مەكەن گازداندىردىرىلعان بولسا, بۇگىندە قوسىمشا 58 اۋىلعا گاز جەتكىزىلدى. وسىلايشا, 63 ەلدى مەكەنگە گاز تارتىلدى, ونىڭ 30-ى كوگىلدىر وتىنعا وتكەن جىلى قول جەتكىزگەن.
«وبلىسىمىزدا ورتالىقتاندىرىلعان سۋمەن قامتاماسىز ەتۋ دەڭگەيى 91,35%-عا جەتىپ, بىلتىر سۋ جۇيەسىنە 2 اۋىل قوسىلدى. 298 كم جەلى جوندەلدى, 17 ەلدى مەكەندە اۋىزسۋدىڭ ساپاسى جاقساردى. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 23 جاڭا مەديتسينالىق نىسان بوي كوتەردى. سپورت سالاسىندا 18 نىسان ىسكە قوسىلىپ, 10 بلوك-ءمودۋلدى سپورت كەشەنى ورناتىلدى. وبلىستىق ماڭىزى بار 193 شاقىرىم جول مەن 54 ەلدى مەكەننىڭ ىشكى كوشەلەرى جوندەلدى», دەيدى وبلىستىق ءماسليحاتتىڭ توراعاسى گۇلنار قوجاعۇلقىزى.
گازداندىرۋ – پرەزيدەنتتىڭ تاپسىرماسىنا ساي وبلىس باسشىلىعى ەرەكشە ءمان بەرىپ وتىرعان باسىم باعىتتاردىڭ ءبىرى. سوعان سايكەس, گازداندىرۋ دەڭگەيى 27%-عا ارتىپ, 56,5%-عا جەتكەن. وبلىس اكىمى ءباسپاسوز قىزمەتىنىڭ مالىمەتىنشە, جىل سوڭىنا دەيىن وڭىردە گازداندىرۋ دەڭگەيى 71,4% بولماق. پانفيلوۆ اۋدانىن قوسا العاندا, كەربۇلاق اۋدانىنان تالدىقورعانعا دەيىنگى 500 مىڭنان استام حالقى بار 126 ەلدى مەكەن گازعا قول جەتكىزەدى.
2024 جىلدىڭ تامىزىندا «تالدىقورعان–ۇشارال» ماگيسترالدى گاز قۇبىرىنىڭ قۇرىلىسى باستالعان. بۇل جوبانى ىسكە اسىرۋدىڭ ناتيجەسىندە الاكول, اقسۋ, سارقان اۋداندارىنىڭ 66 ەلدى مەكەنى گازبەن قامتاماسىز ەتىلمەك. ءوڭىردى تابيعي گازبەن قوسىمشا قامتاماسىز ەتۋ ءۇشىن «الماتى–تالدىقورعان» لۋپينگىسىنىڭ (ەكىنشى تارماعىنىڭ) قۇرىلىسىن سالۋعا قاتىستى دايىندىق جۇرگىزىلىپ جاتىر. گازداندىرۋ ءىسى بارىسىندا 1 800-دەي تۇراقتى جانە ۋاقىتشا جۇمىس ورىندارى اشىلعان.
بيىل ەسكەلدى اۋدانى تولىقتاي گازبەن قامتىلادى. وندا كەيىنگى ەكى جىلدا 39 مىڭنان استام تۇرعىننىڭ كوگىلدىر وتىنعا قول جەتكىزۋىنە مۇمكىندىك جاسالعان, ياعني گازداندىرىلۋعا جاتاتىن 21 ەلدى مەكەننىڭ 12-سىنە گاز قۇبىرى تارتىلعان.
«7 ەلدى مەكەندە – كوكجازىق, تەرەكتى, قاراتال, اباي, شىمىر, جاستار, اقتاستى اۋىلدارىندا گاز تاراتۋ جەلىلەرىن سالۋ جۇمىستارى جۇرگىزىلىپ جاتىر. ونىڭ ىشىندە 5 ەلدى مەكەننىڭ جۇمىستارى ءبىتىپ, حالىق يگىلىگىن كورىپ وتىر. كوكجازىق, تەرەكتى اۋىلدارىندا بيىل اياقتالادى», دەدى وبلىس باسشىسى بەيبىت يساباەۆ.
وعان قوسا قاينارلى مەن جالعىزاعاش اۋىلدارىنا گاز تارتۋعا رەسپۋبليكالىق بيۋدجەتكە ءوتىنىم ۇسىنىلعان. سونىڭ ناتيجەسىندە جىل اياعىنا دەيىن جالپى سانى 48 مىڭ ادام تۇراتىن 21 ەلدى مەكەن گازعا تولىق قول جەتكىزەدى.
قابىلدانعان شارالاردىڭ ناتيجەسىندە باسەكەلەستىك ورتانى دامىتۋ ارقىلى گاز قوستىرۋ قۇنىن, قازاندىق پەن قاجەتتى جيىنتىقتاردى قوسپاعاندا, 170-175 مىڭ تەڭگەگە دەيىن تومەندەتۋگە مۇمكىندىك تۋدى. سونىمەن قاتار ءبىر جارىم جىلدىڭ ىشىندە 1 600 گاز قازاندىعىن ساتىپ الۋعا 500 ملن تەڭگە بولىنگەن. تۇرعىندارعا قازاندىقتىڭ تولەمىن 10 ايعا دەيىن ءبولىپ تولەۋگە جەڭىلدىك جاسالىپ وتىر.
«اۋداندا بارلىعى 63 ەلدى مەكەن بار, ونىڭ 26-سى گازداندىرۋعا جاتادى. سارىوزەك اۋىلى تۇرعىندارىنىڭ 34,8%-ى گازعا قوسىلعان. تۇرعىنداردى كوگىلدىر وتىنمەن قامتاماسىز ەتۋ ماقساتىندا سارىوزەك اۋىلىنا گاز قۇبىرلارى تارتىلىپ, 3 102 ءۇيدى كوگىلدىر وتىنمەن قامتۋ مۇمكىندىگى بار. بارلىعى 1 080 تۇرعىنى بار كوپقاباتتى ءۇي گازعا قوسىلىپ, 984 ءۇيدى گازعا قوسۋ بويىنشا تەحنيكالىق شارت بەرىلگەن. اۋىلدا 29 گاز تاراتۋ شكافى ورناتىلعان, ونىڭ 9-ى كوممەرتسيالىق, 17-ءسى ابونەنتتەردىڭ پايدالانىلۋىندا», دەيدى كەربۇلاق اۋدانىنىڭ اكىمى قانات ەسبولاتوۆ.
جالپى, 2029 جىلعا قاراي جەتىسۋ وبلىسىندا گازداندىرۋعا جاتاتىن 192 ەلدى مەكەنگە تولىقتاي گاز تارتىلادى. سونىڭ ناتيجەسىندە 624 مىڭنان استام تۇرعىن نەمەسە ءوڭىر حالقىنىڭ 91%-ى كوگىلدىر وتىنعا قول جەتكىزە الادى.
تالدىقورعان حالقىنىڭ 90,3%-ى گازعا قوسىلۋعا مۇمكىندىك العان, سونىڭ 69%-ى نەمەسە 37,8 مىڭ ابونەنت گاز قوستىرعان. ورتالىقتاندىرىلعان اۋىزسۋمەن قامتۋ دەڭگەيى 98%-دى قۇراپ وتىر. ىنتىماق اۋىلى, 3-بولىمشە, «پريگورودنىي», «ەكسپەديتسيا», ء«ۇيتاس» ساياجاي الابى, «جاستار-2» شاعىن اۋدانى, ىنتىماق تۇرعىن الابى مەن مويناق اۋىلى كوگىلدىر وتىنمەن قامتاماسىز ەتىلگەن.
«قالا ماڭىنداعى «المالى», «اششىبۇلاق», «مەرەكەلىك», «قىزىلتاس», «بالىقتى», «قاراتال» ساياجايلارى مەن 1-بولىمشەگە گاز تارتۋدىڭ جوبالىق-سمەتالىق قۇجاتتاماسى دايىندالىپ جاتىر, كەلەسى جىلى قۇرىلىسىن باستايمىز. اۋىزسۋعا كەلسەك, ورتالىق سۋ جۇيەسىنە قوسۋ دەڭگەيى قازىر 98%. كەلەسى جىلى ىنتىماق تۇرعىن اۋدانىندا كارىز جۇيەسىنىڭ قۇرىلىسىن اياقتايمىز. سونداي-اق ەركىن اۋىلى مەن 1-بولىمشەدە سۋمەن قامتۋ جۇيەسىن سالا باستايمىز», دەيدى وبلىس باسشىسى.
جەتىسۋ وبلىسى
