«ماڭعىستاۋ وبلىسى ەلىمىزدىڭ ترانزيتتىك الەۋەتىن ارتتىرۋ ىسىندە ماڭىزدى ءرول اتقارادى. بۇل – شىعىس پەن باتىس, سولتۇستىك پەن وڭتۇستىك اراسىنداعى حالىقارالىق كولىك دالىزدەرى توعىسقان بىرەگەي جەر. ءبىز تەڭىز ينفراقۇرىلىمىن, سونىڭ ىشىندە اقتاۋ جانە قۇرىق پورتتارىن دامىتۋعا ەرەكشە ءمان بەرىپ وتىرمىز. وسى ايلاقتار ترانسكاسپي حالىقارالىق كولىك دالىزىندەگى نەگىزگى توراپتىڭ ءبىرى سانالادى. سوڭعى جىلدارى بۇل ءدالىز ارقىلى جۇك جەتكىزۋ مەرزىمى ءۇش ەسە قىسقاردى. تاسىمال قۇنى تۇراقتالدى. وزىق تەحنولوگيالار جاپپاي ەنگىزىلە باستادى. حالىقارالىق لوگيستيكالىق كومپانيالار ەلىمىزدىڭ كولىك سالاسىنا ينۆەستيتسيا سالۋعا قىزىعۋشىلىق تانىتىپ وتىر. ولار, اسىرەسە, تەڭىز پورتتارىن دامىتۋ ىسىنە قارجى قۇيۋعا مۇددەلى. ۇكىمەت وبلىس اكىمدىگىمەن بىرلەسىپ, شەتەل ينۆەستورلارىمەن بەلسەندى جۇمىس ىستەۋى كەرەك. قازاقستاننىڭ ەۋرازياداعى نەگىزگى ترانزيت حابى رەتىندەگى ءرولىن ارتتىرا ءتۇسۋ قاجەت. كولىك, تەمىر جول جانە تەڭىز پورتى ينفراقۇرىلىمىن دامىتۋعا ارنالعان جوبالاردى تەزدەتىپ جۇزەگە اسىرۋ كەرەك. بيىل قۇرىق-جەتىباي تاس جولىن جوندەۋ جۇمىسى اياقتالادى», دەدى مەملەكەت باسشىسى.
سوعان وراي پرەزيدەنت تۇرىكمەنستان باعىتى بويىنشا كولىك-تاسىمال الەۋەتىن ارتتىرۋ قاجەت ەكەنىن جەتكىزىپ, جاڭاوزەننەن شىعىپ, كەندىرلى ارقىلى تۇرىكمەنستان شەكاراسىنا دەيىن باراتىن كۇرە جولدى جوندەۋگە بيىلدان باستاپ كىرىسۋدى تاپسىردى.
«تەمىر جول بەكەتتەرىن جاڭعىرتۋ جانە جاڭارتۋ جۇمىسى باستالدى. ەلىمىز بويىنشا 125 ۆوكزالدى جوندەۋ جوسپارلانىپ وتىر. ونىڭ ىشىندە ماڭعىستاۋ, بەينەۋ جانە شەتپە بەكەتتەرى بار. جولاۋشىلارعا, اسىرەسە, ءوز بەتىمەن ءجۇرىپ-تۇرۋى قيىن ازاماتتارعا قولايلى جاعداي جاسالادى. بۇل شارالار وبلىستاعى جانە جالپى ەلىمىزدەگى كولىك قاتىناسىن جاقسارتا تۇسەتىنى ءسوزسىز. التى جىلدان بەرى توقتاپ تۇرعان «بەينەۋ استىق تەرمينالى» بيىل قاڭتاردا ىسكە قوسىلدى. قازىر وندا ءبىر مەزەتتە 100 مىڭ توننا استىق ساقتاۋعا بولادى. سونداي-اق كۇنىنە 150 توننا – ۇن, 50 توننا – جەم شىعارۋعا مۇمكىندىك بار. ال جاڭعىرتۋ جۇمىسىنان كەيىن بۇل كورسەتكىشتەر 400 توننا ۇن جانە 100 توننا جەمگە دەيىن ارتادى. استىق تەرمينالىنىڭ قۋاتىن ارتتىرىپ, تولىق جۇمىس ىستەۋىن قامتاماسىز ەتكەن ءجون. ونى قۇرلىقتاعى وتكەل كەشەنى رەتىندە پايدالانۋ قاجەت. سول ارقىلى كاسپي ماڭىنداعى ەلدەرگە ءوز ونىمدەرىمىزدى ەكسپورتتاي الامىز», دەدى قاسىم-جومارت توقاەۆ.
