– قوي, بالام, ولاي ايتپا, كوكەڭ وڭايلىقپەن ەشكىمگە اقىسىن جىبەرە قويمايدى, – دەگەن شەشەسى ۇلىنا ك ۇلىمسىرەي قاراپ, – اكەڭ تۋرالى بۇلاي وي تۇيۋىڭە نە سەبەپ بولدى؟
– قاي كۇنى كورشى اعاعا داربازانىڭ ءبىر-ەكى جەرىن دانەكەرلەتكەنگە باقانداي 30 مىڭ تەڭگە بەردى. نەگىزى, كورشى اقىسى دەپ تەگىن ىستەپ بەرە سالاتىن بولماشى جۇمىس. ونى كەز كەلگەن دانەكەرلەۋشىنى شاقىرىپ ىستەتسەڭ, جۇمىس اقىسى ارى كەتكەندە 10 مىڭ تەڭگەدەن اسپايدى.
– تاعى باسقا سەبەپتەر بار ما؟
– كوپ قوي. كوكەم سول كورشى اعاعا ۇنەمى اقىسىن جىبەرەدى دە جۇرەدى. انادا شاتىردىڭ ءبىر بۇرىشىن داۋىل كوتەرىپ كەتكەندە, سونى بۇتىندەۋ ءۇشىن كورشى اعانى كومەككە شاقىرىپ, كەتەرىندە 20 مىڭداي اقشا بەردى. ول تۇك تە ىستەگەن جوق, تەك جوعارىعا شيفەر شىعارىسىپ كومەكتەسكەن بولدى. جۇمىستىڭ كوبىن كوكەمنىڭ ءوزى اتقاردى. قانشا جىل بولدى وسىلاي... ايتا بەرسەڭ كو-ءو-ءوپ.
– اكەڭنەن بۇل ارەكەتىنىڭ سەبەبىن سۇرامادىڭ با؟
– سۇرادىم. كەيىن تۇسىنەسىڭ دەيدى دە قويادى. بۇل جەردە باس قاتىرىپ تۇسىنەتىن نە بار؟
– وندا مەن ايتايىن, قۇلاق سال. ءوزىڭ بىلەسىڭ, كورشى اعاڭ ۇيىنەن ۇزاپ جۇمىس ىستەي المايدى, ويتكەنى ايەلى دەرتتى, شيەتتەي بالا-شاعاسىنا ءوزى قارايدى. تابىسى از, كۇنكورىسى تومەن, قارجىعا مۇقتاج. سوندىقتان كوكەڭ كورشىمىزدىڭ جاعدايىن ءتۇسىنىپ, رەتى كەلسە ۇيگە ءجيى شاقىرىپ, ونى-مۇنىسىن ىستەتكىزگەن بولىپ, سولاردىڭ اقىسىن مولىنان تولەيدى. ال بىلايشا قولىنا قارجى ۇستاتايىن دەسە, وعان كورشى اعاڭ كونبەيدى, نامىسشىل جىگىت. اكەڭنىڭ كورشىگە سەن ايتقانداي جەم بولۋى وعان قايىرىمدىلىق كورسەتۋدىڭ سىپايى امالى عوي, بالام, – دەدى شەشەسى.
شەشە ءسوزىنىڭ توركىنىن ءتۇسىنىپ, اكەسى تۋرالى الگى ويى انتەك بولعانىن ءبىلىپ قىزاراقتاپ قالعان بالا:
– مەن ەندى ۇقتىم, – دەدى كوزى جايناپ, جايراڭداپ.
– نەنى؟ – دەدى شەشەسى ۇلىنا مەيىرلەنە.
– ءبارىن, ءبارىن... كوكەم بازارعا بارعاندا ساۋدا-ساتتىقتى كوبىنە قاريا كىسىلەردەن جاسايدى. بازارعا كىرەبەرىستە تۇراتىن ورىس كەمپىردىڭ ءدامى كەلىسپەگەن تۇزدالعان «كاپۋستاسىن» ۇنەمى كيلوگرامداپ الىپ كەتەدى. بازاردىڭ اياق جاعىندا تۇراتىن قازاق كەمپىرگە ەرىنبەي بارىپ, ءدال سودان «ناسكي» ساتىپ الادى عوي كوكەم ىلعي. كوكەمنىڭ مۇنىسىنا كەيدە ك ۇلىپ, كەيدە ىزالانىپ جۇرسەم...
– ءيا, سولاي بالام. الگى ورىس كەمپىردىڭ تۇزدالعان قىرىققاباتىن ءوزىمىز تاۋىسا الماي, سودان كورشىلەرگە ۇلەستىرىپ ءجۇرمىن. قازاق كەمپىردىڭ «ناسكيىنىڭ» وزىمىزدەن ارتىلعانىن تاراتپاعان ادامىم جوق. انا ءبىر مۇگەدەك كىسىدەن ساتىپ الاتىن قۇرت پەن تالقان ءۇشىن ارنايى قويما سالاتىن ۋاقىت تا بولدى, – دەدى شەشەسى ك ۇلىپ. – كوكەڭ ولاردىڭ ماسەلەسىن تۇبەگەيلى شەشىپ تاستاي المايدى. بىراق ىزگى نيەتىمەن الگىلەر ءبىر كۇن بولسا دا ساۋداسى ءجۇرىپ كوڭىلدەرى جايلانسىن, ءبىر كۇن بولسا دا كوڭىلدەرى توعايىپ ۇيلەرىنە ەرتە قايتسىن دەپ, ولاردان زات ساتىپ الىپ تۇرادى. ءتۇسىندىڭ عوي, قايىرىمدىلىقتى وسىلاي جاساۋعا دا بولادى. ادال ەڭبەكپەن كۇن كورۋگە تالپىنعان جانعا اقشالاي كومەك بەرە سالعاننان گورى اكەڭ سياقتى ادىسپەن قولداۋ ءبىلدىرۋدىڭ پايداسى دا, ساۋابى دا الدەقايدا كوپ.
بالا باسىن يزەپ, شەشە ءسوزىن ماقۇلداۋمەن بولدى.
