زەرتتەۋ ناتيجەسى قالا تۇرعىندارىنىڭ الكوگولگە اۋىل حالقىنا قاراعاندا الدەقايدا كوپ اقشا جۇمسايتىنىن كورسەتتى. ماسەلەن, 2025 جىلى قالاداعى وتباسىلار ىشىمدىككە ورتا ەسەپپەن 23,2 مىڭ تەڭگە جۇمساسا, اۋىل تۇرعىندارىنىڭ شىعىنى 16 مىڭ تەڭگەگە دە جەتپەگەن. ايىرماشىلىق 31 پايىزدان اسقان.
ماماندار مۇنى بىرنەشە فاكتورمەن بايلانىستىرادى. سونىڭ ءبىرى – ەلىمىزدە كەڭ تارالىپ كەلە جاتقان «اراقسىز اۋىل» جوباسى. قازىر قازاقستاننىڭ ءتۇرلى وڭىرلەرىندەگى 280-نەن استام اۋىل الكوگول ساتۋدان تولىقتاي باس تارتقان. مۇنداي ەلدى مەكەندەردەگى دۇكەندەر مەن كافەلەردە سپيرتتىك ىشىمدىكتەر ساتىلمايدى. جوبا ناتيجەسىندە كەي اۋىلداردا قىلمىس دەڭگەيى ايتارلىقتاي تومەندەگەن.
سونداي-اق قالا مەن اۋىل تۇرعىندارىنىڭ تابىس دەڭگەيى مەن ساتىپ الۋ مۇمكىندىگى دە ءارتۇرلى. قالا حالقى قىمباتىراق الكوگول ونىمدەرىن ءجيى تۇتىنادى.
وڭىرلەر اراسىندا دا ايىرماشىلىق بايقالادى. الكوگولگە ەڭ كوپ قارجى جۇمسايتىن ايماقتار قاتارىندا قاراعاندى جانە پاۆلودار وبلىستارى كوش باستاپ تۇر. بۇل وڭىرلەردە ءبىر وتباسىنىڭ جىلدىق شىعىنى 38,1 مىڭ تەڭگەگە جەتكەن. الماتى قالاسىندا كورسەتكىش 36,7 مىڭ تەڭگەنى قۇرادى.
ال ەڭ از شىعىن تىركەلگەن وڭىرلەر:
- ماڭعىستاۋ وبلىسى – 3,4 مىڭ تەڭگە;
- شىمكەنت – 4,6 مىڭ تەڭگە;
- قىزىلوردا وبلىسى – 6,2 مىڭ تەڭگە.
ساراپشىلار مۇنى وڭىرلەردەگى تابىس دەڭگەيى, ۋربانيزاتسيا جانە الكوگول ونىمدەرىنىڭ قولجەتىمدىلىگىمەن بايلانىستىرادى.
ستاتيستيكاعا سايكەس, ەلدە الكوگول ونىمدەرىن ساتۋ كولەمى دە ازايىپ كەلەدى. 2025 جىلى اراق ونىمدەرىنىڭ ساتىلىمى 3,8 پايىزعا تومەندەپ, 83,5 ملن ليتر بولعان. ال 2026 جىلدىڭ العاشقى ەكى ايىندا بۇل كورسەتكىش تاعى 11,6 پايىزعا قىسقارعان.
شاراپقا دا سۇرانىس تا تومەندەگەن. وتكەن جىلى ونىڭ ساتىلىمى 17,6 پايىزعا ازايىپ, 33,7 ملن ءليتردى قۇرادى.
دەگەنمەن قازاقستانداعى ەڭ تانىمال الكوگولدىك سۋسىن – سىرا. 2025 جىلى ونىڭ ساتىلىمى كەرىسىنشە 6,8 پايىزعا ءوسىپ, 690,5 ملن ليترگە جەتكەن. بىراق 2026 جىلدىڭ العاشقى ەكى ايىندا سىرا ساتىلىمى دا 13,2 پايىزعا تومەندەي باستاعان.
مامانداردىڭ پىكىرىنشە, بۇل ازاماتتاردىڭ الكوگول تۇتىنۋ ادەتى وزگەرىپ جاتقانىن كورسەتەدى. ءبىر بولىگى كۇشتى ىشىمدىكتەن جەڭىل سۋسىندارعا اۋىسسا, ەندى بىرەۋلەرى الكوگولدەن مۇلدە باس تارتا باستاعان.
قازاقستاندا ساتىلاتىن الكوگول ونىمدەرىنىڭ باسىم بولىگىن وتاندىق زاۋىتتار شىعارادى. يمپورتتىق ىشىمدىكتەر دە بار, الايدا ولاردىڭ ۇلەسى سالىستىرمالى تۇردە از. نەگىزىنەن شەتەلدەن قازاقستاندا وندىرىلمەيتىن كەيبىر سۋسىن تۇرلەرى, اسىرەسە ءجۇزىم شارابى اكەلىنەدى.
ۇلتتىق ستاتيستيكا بيۋروسىنىڭ مالىمەتىنشە, 2025 جىلى اراق جانە ليكەر-اراق ونىمدەرىنىڭ جالپى نارىعىنداعى وتاندىق ءوندىرىستىڭ ۇلەسى 84,5 پايىزدى قۇراعان. ال يمپورت نەبارى 15,5 پايىز بولعان. بۇل ازاماتتاردىڭ كوبىنە جەرگىلىكتى برەندتەردى تاڭدايتىنىن كورسەتەدى. سىرا نارىعىندا دا ۇقساس جاعداي قالىپتاسقان. وتكەن جىلى ساتىلعان سىرانىڭ 89,9 پايىزى ەل ىشىندە وندىرىلگەن ءونىم بولسا, يمپورت ۇلەسى 10,1 پايىز عانا بولعان.
سونىمەن قاتار قازاقستاندا وندىرىلگەن الكوگول ونىمدەرى شەتەلگە وتە از كولەمدە ەكسپورتتالادى. بۇل جەرگىلىكتى وندىرۋشىلەردىڭ نەگىزىنەن ىشكى نارىققا جۇمىس ىستەيتىنىن اڭعارتادى.
ساراپشىلار تۇرعىنداردىڭ الكوگولگە جۇمسايتىن شىعىنىنىڭ ازايۋىن بىرنەشە فاكتورمەن بايلانىستىرادى. سونىڭ ءبىرى – حالىقتىڭ ۇنەمدەۋگە كوشۋى. اسىرەسە 2026 جىلى ەلدە جالاقىنىڭ ساتىپ الۋ قابىلەتى تومەندەپ, الكوگول ونىمدەرى ايتارلىقتاي قىمباتتاعان.
ستاتيستيكاعا سايكەس, 2025 جىلدىڭ ناۋرىزىنان 2026 جىلدىڭ قاڭتارىنا دەيىن الكوگول باعاسى ورتا ەسەپپەن 10-11 پايىزعا وسكەن. ال اقپاندا باعانىڭ جىلدىق ءوسىمى 14,2 پايىزعا جەتسە, ناۋرىزدا شامامەن 15 پايىز بولعان.
باعانىڭ ەڭ قاتتى ءوسۋى سىرا سەگمەنتىندە بايقالعان. ەگەر 2025 جىلدىڭ جازىندا سىرا باعاسىنىڭ يندەكسى 112,6 پايىز بولسا, 2026 جىلدىڭ ناۋرىزىنا قاراي 116,4 پايىزعا دەيىن كوتەرىلگەن.
شاراپ باعاسى دا ايتارلىقتاي قىمباتتاعان. ماسەلەن, 2025 جىلدىڭ شىلدەسىندە يندەكس 109,4 پايىز بولسا, 2026 جىلدىڭ اقپانىندا 116,7 پايىزعا جەتكەن.
ال اراق باعاسى سالىستىرمالى تۇردە باياۋ وسكەن. 2026 جىلدىڭ كوكتەمىندە بۇل ساناتتاعى ونىمدەردىڭ قىمباتتاۋى شامامەن 10,1 پايىزدى قۇراعان.
