بۇعان قوسا سۋعا كەتۋ وقيعالارى دا الاڭداتارلىق احۋالعا اينالعان. بىلتىر ەلىمىزدە بالالاردىڭ سۋ ايدىندارىندا قازا تابۋى وتكەن جىلمەن سالىستىرعاندا 1,5 ەسە وسكەن. بۇل اسىرەسە 10-16 جاس ارالىعىنداعى بالالار مەن جاسوسپىرىمدەر اراسىندا ءجيى كەزدەسەدى. مۇنىڭ باستى سەبەپتەرى – قاراۋسىز شومىلۋ جانە ارنايى رۇقسات ەتىلمەگەن, جابدىقتالماعان سۋ ايدىندارىندا سۋعا ءتۇسۋ.
وسىعان وراي وقۋ-اعارتۋ مينيسترلىگىنە قاراستى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا اتا-انالارعا ۇندەۋ جولدادى.
«كوكتەمنىڭ شۋاعىمەن بىرگە بالالارىمىزدىڭ بەلسەندىلىگى دە ارتا تۇسەدى. الايدا ءدال وسى كەزەڭدە ولاردىڭ ومىرىنە تونەتىن قاۋىپ-قاتەرلەر دە ەسەلەنەتىنى ءسوزسىز. بۇل رەتتە بالالاردىڭ قۇقىقتارىن قورعاۋ كوميتەتى اتا-انالارعا, مۇعالىمدەرگە جانە بارشا ەرەسەكتەرگە بالالاردىڭ كۇندەلىكتى ومىرىنە مۇقيات قاراۋعا شاقىرادى. بالالارىمىزدىڭ ءومىرى – ءبىزدىڭ قولىمىزدا! ءاربىر اتا-انا ساقتىق شارالارىن ۇستانىپ, قاۋىپسىزدىك ەرەجەلەرىنە بەيجاي قاراماۋى ءتيىس. قايعىلى وقيعالاردىڭ الدىن الۋ ءۇشىن مىنا قاراپايىم, بىراق اسا ماڭىزدى ەرەجەلەردى ەستە ساقتاڭىز:
ءبىرىنشى. تەرەزەلەرگە ساقتىق قۇرىلعىلارىن ورناتىڭىز – ارنايى ق ۇلىپتار, تورلار مەن بەكىتكىشتەر بالالاردىڭ قۇلاۋىنا جول بەرمەيدى.
ەكىنشى. تەك قاۋىپسىز جەرلەردە سۋعا ءتۇسىڭىز – قۇتقارۋ قىزمەتى بار جاعاجايلاردى تاڭداڭىز, بەيتانىس سۋ ايدىندارىنان اۋلاق بولىڭىز.
ءۇشىنشى. بالالارىڭىزدى قاراۋسىز قالدىرماڭىز – اسىرەسە سۋ ماڭىندا ءاردايىم باقىلاۋدا ۇستاڭىز.
ءتورتىنشى. سۋداعى قاۋىپ-قاتەرلەردى ءتۇسىندىرىڭىز – بيىكتەن سۋعا سەكىرۋ, تەرەڭدىكتە ويناۋ جانە قاتتى اعىستارعا جاقىنداۋ وتە قاۋىپتى ەكەنىن ۇيرەتىڭىز.
بەسىنشى. بالالاردى العاشقى كومەك كورسەتۋگە باۋلىڭىز – سۋعا كەتكەن ادامعا قالاي كومەك كورسەتۋ كەرەكتىگىن ءبىلۋدىڭ ءوزى بىرەۋدىڭ ءومىرىن ساقتاپ قالۋى مۇمكىن.
قۇرمەتتى اتا-انالار! بالالارىمىزدىڭ اماندىعى – ءبىزدىڭ ەڭ ۇلكەن جاۋاپكەرشىلىگىمىز. ءبىز ولاردىڭ قاۋىپسىزدىگىن قامتاماسىز ەتۋگە مىندەتتىمىز. قايعىلى جاعدايلاردىڭ الدىن الۋ – ءوز قولىمىزدا!», دەلىنگەن اتالعان ۇندەۋدە.
