بۇگىندە يندۋستريالدى ايماقتا 4430 جۇمىس ورنى اشىلعان. 2016-2024 جىلدار ارالىعىندا 142,1 ملرد تەڭگەگە 41 جوبا ىسكە اسىپ, وسى كەزەڭدە وندىرىلگەن ءونىمنىڭ جالپى كولەمى 2 524,4 ملرد تەڭگەنى قۇرادى. ايماققا قاتىسۋشى كومپانيالار 63,1 ملرد تەڭگە سوماسىنا سالىق تولەدى.
الماتى قالاسىنىڭ كاسىپكەرلىك جانە ينۆەستيتسيالار باسقارماسى وڭىرلىك كوممۋنيكاتسيالار قىزمەتىمەن بىرلەسىپ ۇيىمداستىرعان ءباسپاسوز تۋرى بارىسىندا ينۆەستورلاردى سۇيەمەلدەۋ دەپارتامەنتىنىڭ باس مامانى يان پروكۋدين «يندۋستريالدى ايماقتىڭ جالپى اۋدانى 490 گەكتاردى قۇرايدى. ونىڭ 326 گەكتارى جوبالارعا بولىنگەن. جالپى 382,1 گەكتار جەر ءبولىندى, ونىڭ ىشىندە 85 گەكتار كەڭەيتۋدىڭ ەكىنشى كەزەڭىندە. يندۋستريالدى ايماق جوعارى تەحنولوگيالىق وندىرىستەر ءۇشىن تارتىلىس ورتالىعىنا اينالۋدا. بۇل الماتىنىڭ بولاشاق يندۋستريالىق دامۋى مەن جاڭا جۇمىس ورىندارىن قۇرۋ ءۇشىن ماڭىزدى» دەپ اتاپ ءوتتى.
جۇمىس ىستەپ تۇرعان كاسىپورىنداردىڭ اراسىندا اۆتوماتتاندىرىلعان جانە روبوتتاندىرىلعان تەحنولوگيالار ەنگىزىلگەن ءىرى وندىرىستىك الاڭدار بار. جاڭعىرتۋ ەسەبىنەن 2025 جىلى جۇمىس ورىندارىنىڭ سانى مەن وقشاۋلاۋ دەڭگەيى ۇلعايدى, ال جەكەلەگەن باعىتتار بويىنشا وندىرىستىك قۋاتتار ەكى ەسەگە ارتتى. وسىنداي كاسىپورىنداردىڭ ءبىرىنىڭ جالپى شتاتى 1600 ادامعا جەتتى.
بىلتىر يندۋستريالدى ايماقتا 13,4 ملرد تەڭگەنىڭ 11 جاڭا جوباسى ىسكە قوسىلىپ ناتيجەسىندە 977 جۇمىس ورنى قۇرىلدى, ونىڭ ىشىندە التى ءىرى ءوندىرىس ورنى, سونداي-اق بەس شاعىن ونەركاسىپتىك پارك بار.
بيىل يندۋستريالدى ايماقتا جالپى قۇنى 135,5 ملرد تەڭگەنى قۇرايتىن 11 جاڭا جوبانىڭ ىسكە قوسىلۋى جوسپارلانۋدا. اتالعان جوبالار اياسىندا 2662 جاڭا جۇمىس ورنى اشىلادى. يان پروكۋديننىڭ ايتۋىنشا, بيىل التى ءىرى ءوندىرىس ورنىنىڭ ىسكە قوسىلادى. جوبالارعا سالىناتىن ينۆەستيتسيا كولەمى 133 ملرد تەڭگە, ال جۇمىس ورىندارىنىڭ سانى 2 مىڭنان اسادى.
ماڭىزدى جوبالاردىڭ ءبىرى – قولدانىستاعى ونەركاسىپ ورىندارىنىڭ جانىنان قۇرىلىپ جاتقان اۆتوموبيل كومپونەنتتەرى تەحنوپاركى بولادى. بۇگىندە مۋلتيمەديالىق جۇيەلەر, اۆتوكرەسلولار, لوگيستيكالىق حاب ءوندىرىسى جولعا قويىلدى. ناتيجەسىندە, بارلىعى 400-دەن استام جۇمىس ورنى قۇرىلادى. سونىمەن قاتار, يندۋستريالدى ايماقتاعى جۇمىس ىستەپ تۇرعان اۆتوموبيل شىعاراتىن زاۋىتتاردىڭ ءبىرى اۋقىمدى جاڭعىرتۋدى اياقتادى: دانەكەرلەۋ جانە بوياۋ روبوتتارى, اۆتوماتتى كونۆەيەرلەر, جاڭا كونۆەيەرلەر ورناتىلدى. بۇل اۆتوماتتاندىرۋ دەڭگەيىن ارتتىرۋعا, وقشاۋلاۋ ۇلەسىن ارتتىرۋعا جانە ينجەنەرلىك كادرلاردىڭ جاڭا دەڭگەيىن قۇرۋعا مۇمكىندىك بەردى. ۇجىم سانى 1600 ادامعا جەتتى. ەندى زاۋىت دانەكەرلەۋ جانە بوياۋ (CKD) كەزەڭدەرىن قامتيتىن شاعىن ءتۇيىندى ادىسپەن اۆتوكولىكتەردىڭ 50 پايىزدان استامىن شىعارا الادى. بەس شاعىن ونەركاسىپ پاركىن اشۋ دا جوسپاردا تۇر. بۇل جوبالارعا 2,48 ملرد تەڭگە ينۆەستيتسيا سالىنىپ, 640 جۇمىس ورنى قۇرىلماق.
يندۋستريالدى ايماقتىڭ دامۋى الماتى قالاسىنداعى شاعىن جانە ورتا بيزنەستى قولداۋ باعدارلامالارىمەن قاتار جۇرگىزىلۋدە. بۇگىندە قالادا 1594 ادام ەڭبەك ەتەتىن 16 شاعىن ونەركاسىپ پاركى جۇمىس ىستەپ جاتىر. كەلەر جىلعا تاعى 24 پارك سالۋ جوسپارلانىپ وتىر.
الماتى
