فوتو: اقوردا
سەسسيا باستالعالى بەرى 62 زاڭ قابىلدانىپ, سەناتقا جولدانعان. ونىڭ ىشىندە 55 زاڭعا پرەزيدەنت قول قويعان. قابىلدانعان نورماتيۆتىك-قۇقىقتىق اكتىلەردىڭ قاتارىندا سۋ كودەكسى, سونداي-اق قارجى نارىعىن دامىتۋ جانە قارجىلىق قىزمەتتەردى تۇتىنۋشىلاردىڭ قۇقىعىن قورعاۋ, تاۋارلاردىڭ شىعارىلعان ەلىن ايقىنداۋ, دەنساۋلىق ساقتاۋ جانە ويىن بيزنەسى تۋرالى ماڭىزدى زاڭدار بار.
بۇگىنگە دەيىن دەپۋتاتتاردىڭ قاراۋىنا 76 زاڭ جوباسى كەلىپ ءتۇستى. پرەزيدەنت تاپسىرماسىنا سايكەس, سالىق, قۇرىلىس كودەكستەرى مەن مىندەتتى الەۋمەتتىك مەديتسينالىق ساقتاندىرۋعا, عىلىمي زەرتتەۋ اۋماقتارىن دامىتۋعا, قىلمىستىق-پروتسەستىك زاڭنامانى جەتىلدىرۋگە جانە جاساندى ينتەللەكتىگە قاتىستى زاڭ جوبالارى بويىنشا جۇمىس جۇرگىزىلىپ جاتىر.
ءماجىلىس توراعاسى جاڭا سالىق كودەكسىنىڭ ءبىرىنشى وقىلىمىنىڭ قورىتىندىلارىن, پرەزيدەنتتىڭ بۋرابايدا وتكەن ۇلتتىق قۇرىلتاي وتىرىسىندا بەرگەن تاپسىرمالارىن زاڭنامالىق تۇرعىدان قامتاماسىز ەتۋ جۇمىستارى تۋرالى باياندادى.
قاسىم-جومارت توقاەۆقا دەپۋتاتتاردىڭ وڭىرلەرگە ءىسساپارلارى كەزىندە ازاماتتاردان تۇسكەن ارىز-شاعىمداردى مەملەكەتتىك ورگانداردىڭ قاراۋى, پرەزيدەنتتىڭ ساياسي رەفورمالارىن جۇيەلى جۇزەگە اسىرۋ ماسەلەلەرى پلەنارلىق وتىرىستاردا تۇراقتى تالقىلانىپ كەلە جاتقانى جايىندا ايتىلدى.
سونىمەن قاتار مەملەكەت باسشىسىنا Amanat پارتياسىنىڭ «قارىزسىز قوعام», «اۋىل اماناتى», «جەر اماناتى», «اكىمدەر مەكتەبى» جوبالارىنىڭ جۇزەگە اسىرىلۋ بارىسى تانىستىرىلدى.
بۇدان بولەك, ەرلان قوشانوۆ پارلامەنتتىك ديپلوماتيا اياسىندا اتقارىلعان جۇمىستاردىڭ قورىتىندىسىنا توقتالدى. اتاپ ايتقاندا, ءماجىلىس دەلەگاتسياسى تاشكەنتتە وتكەن 150-ءشى پارلامەنتارالىق وداق اسسامبلەياسىنا قاتىسىپ, مەملەكەت باسشىسىنىڭ الەۋمەتتىك ادىلدىكتى قامتاماسىز ەتۋگە باعىتتالعان رەفورمالارىن تانىستىرعان. مۇنداي جۇمىس ۇقشۇ پارلامەنتتىك اسسامبلەياسى, تۇركى مەملەكەتتەرىنىڭ پارلامەنتتىك اسسامبلەياسى, تمد پارلامەنتارالىق اسسامبلەياسى جانە باسقا دا باعىتتاعى حالىقارالىق ىنتىماقتاستىق شەڭبەرىندە بەلسەندى جۇرگىزىلىپ جاتىر.
