ءيا, بۇعان دەيىن قازاق مەكتەبىنىڭ بالالارى كىرپىشى كەمىرىلگەن, ەسىك-تەرەزەسى جەمىرىلگەن قاۋساعان عيماراتتا وقىپ كەلگەن. سانيتارلىق تالاپتارعا مۇلدەم ساي ەمەس ەدى. ول از دەسەڭىز, عيمارات 1970 جىلدان بەرى جوندەۋ كورمەي كەلگەن. وسى ماسەلە 2021 جىلى «Egemen Qazaqstan» گازەتىندە كوتەرىلىپ, سول كەزدەگى ءبىلىم باسقارماسىنىڭ باسشىلىعى, التاي اۋدانى اكىمدىگى دەرەۋ قولعا الاتىنىن ايتقان.
الايدا 130 ورىندىق قازاق مەكتەبىن سالۋ 2011–2020 جىلدار ارالىعىنداعى جوسپاردا بولىپتى. قۇرىلىس جۇرگىزۋگە جەر اكتىسى دە الىنعان. بىراق بەلگىسىز سەبەپتەرمەن سوڭى سۇيىلىپ, سيىرقۇيىمشاقتانىپ كەتكەن. ەڭ باستىسى, ول ماسەلەنىڭ بارلىعى بۇگىن شەشىمىن تاپتى. وقۋشىلار كوپتەن ارمانداعان جاڭا مەكتەپكە كوشتى. ەڭسەلى مەكتەپتىڭ اشىلۋىنا وبلىس اكىمى نۇرىمبەت ساقتاعانوۆ تا قاتىستى. جالپى اۋدانى 10775 شارشى مەتر بولاتىن №1 جاڭا بۇقتىرما ورتا مەكتەبى 200 وقۋشىعا ارنالعان.
– مەملەكەت باسشىسى ءبىلىم دەڭگەيى بۇكىل ەل بويىنشا تەڭ بولۋعا ءتيىس ەكەنىن ايتقان. ال بۇل جاڭا, زاماناۋي مەكتەپ – ۇرپاقتى تاربيەلەۋ مەن ساپالى ءبىلىم جولىنداعى ۇلكەن قادام. وسى ءبىلىم وشاعىندا ەلىمىزدىڭ بولاشاعىن قالىپتاستىراتىن سانالى, ءبىلىمدى دە بىلىكتى ازاماتتار تۇلەپ ۇشاتىنىنا سەنىمدىمىز, – دەدى ايماق باسشىسى نۇرىمبەت ساقتاعانوۆ.
ونىڭ ايتۋىنشا, وقۋ جاعدايىن جاقسارتۋ جانە وقۋ ورىندارىنىڭ تاپشىلىعىن ازايتۋ ماقساتىندا بىلتىر وبلىستا 10 جاڭا مەكتەپ سالىنعان. ولاردىڭ جەتەۋى پايدالانۋعا بەرىلدى, ەكەۋى تارباعاتاي اۋدانىندا وففشورلىق كەلىسىمشارتتار بويىنشا بوي كوتەرگەن. بيىل تاعى 13 مەكتەپ سالۋ جوسپاردا بار.
بۇگىنگى تاڭدا جاڭا بۇقتىرماداعى قازاق مەكتەبىندە 114 وقۋشى ءبىلىم الىپ جاتىر. مەكتەپكە دەيىنگى مەكەمەلەردە 129 بالا بولسا, ولاردىڭ 33-ءى بيىل 1-سىنىپقا بارادى. باسا ايتا كەتەرلىگى, مەكتەپ ۇستازدارى مەن وقۋشىلارى «Egemen Qazaqstan» گازەتىنە ەرەكشە ريزاشىلىقتارىن ءبىلدىرىپ وتىر.
– «Egemen Qazaqstan» باسىلىمىنا بارشا اتا-انانىڭ, مەكتەپ ۇجىمىنىڭ, وقۋشىلاردىڭ اتىنان العىسىمدى ايتامىن! مەكتەپ ماسەلەسىن ەڭ العاش كوتەرگەن دە باس باسىلىم ەدى. جازىپ قانا قويماي, ماسەلەنىڭ شەشىلۋىن رەداكتسيا ۇنەمى نازاردا ۇستاپ وتىردى. ناتيجەسىندە, مىنەكي, كەنتىمىزدە جاڭا مەكتەپ بوي كوتەرىپ, قۋانىشىمىز قوينىمىزعا سىيماي جاتىر, – دەيدى №1 جاڭا بۇقتىرما ورتا مەكتەبىنىڭ ۇستازى انارگۇل ءدۇرىمحان.
وسىدان ءتورت جىل بۇرىن مەكتەپتىڭ اۋاداي قاجەتتىگىن ايتىپ, اشىق پىكىر بىلدىرگەن دە انارگۇل دۇرىمحانقىزى ەدى. سونىمەن قاتار مەكتەپ ديرەكتورى دا بۇكپەسىز شىندىقتى ايتىپ شىرىلداعان. اتىن اتاماۋدى سۇراعان قانشاما مۇعالىم جاڭا مەكتەپ كەرەگىن ايتىپ دابىل قاقتى. اتا-انالار مەن وقۋشىلار دا جاڭا مەكتەپ ارماندارى ەكەنىن ايتىپ, پىكىر بىلدىرگەن. مىنە, جۇدىرىقتاي جۇمىلعان ۇيىمشىلدىق ناتيجەسىندە №1 جاڭا بۇقتىرما مەكتەبىنە جاڭا عيمارات سالىندى. ايتپەسە, سوزبالاڭعا سالىنىپ, شەشىلمەي جاتقان ماسەلە شاشەتەكتەن.
شىعىس قازاقستان وبلىسى,
التاي اۋدانى
