بۇل جوبا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاپسىرماسىنا سايكەس جۇزەگە اسىرىلا باستاعان. مەملەكەت باسشىسى كولىك-لوگيستيكالىق سەكتوردى دامىتۋ – مەملەكەتتىڭ ستراتەگيالىق باسىم باعىتى ەكەنىن بىرنەشە مارتە ايتقان بولاتىن.
وڭىردە ورال مەن اقساي قالالارىنداعى جانە شىڭعىرلاۋ مەن سەميگلاۆىي مار بەكەتتەرى جاڭارتىلاتىن بولدى. بۇل نىسانداردىڭ قاي-قايسىنىڭ دا تاريحي ورنى بار, ايماق حالقى ءۇشىن ماڭىزدى ءرول اتقارادى. بۇگىندە وبلىستا وسى بەكەتتەر ارقىلى 7 باعىتقا قىزمەت كورسەتەتىن 14 پويىز جۇرەدى.
ارينە, بۇل ۆوكزالداردىڭ ەڭ ءىرىسى – ورال قالاسىندا 1983 جىلى سالىنعان تەمىرجول ۆوكزالى. ونىڭ اۋدانى 5716,1 شارشىمەتر, بەكەت ارقىلى تاۋلىگىنە 900 جولاۋشى وتە الادى. اقساي قالاسىندا 1937 جىلى سالىنعان تەمىرجول ۆوكزالى دا كونەرىپ تۇرعان ەدى, بۇيىرتسا قايتا جوندەۋدەن وتەدى. وڭىردەگى ەڭ كونە ۆوكزالدىڭ ءبىرى – 1916 جىلى سالىنعان سەميگلاۆىي مار ستانساسى مەن 1936 جىلى سالىنعان شىڭعىرلاۋ ستانساسى دا جوباعا ەنگىزىلىپ, رەكونسترۋكتسيادان ءوتۋى ءتيىس.
ۆوكزالداردى جوندەۋ جۇمىسىنا ستارت بەرگەن باتىس قازاقستان وبلىسىنىڭ اكىمى ناريمان تورەعاليەۆ جۇزەگە اسىرىلىپ جاتقان جوبانىڭ وتە ماڭىزدى ەكەنىن اتاپ ايتتى. «ۆوكزالداردى جوندەۋدىڭ باستالۋى – وبلىس ينفراقۇرىلىمىن دامىتۋداعى ماڭىزدى كەزەڭ. مەملەكەت باسشىسىنىڭ تاپسىرماسىنا سايكەس ءبىز نەگىزگى كولىك نىساندارىن جاڭارتۋ بويىنشا كەشەندى جۇمىستى باستادىق. بۇل جولاۋشىنىڭ جاعدايىن جاقسارتىپ قانا قويماي, وبلىس ەكونوميكاسى مەن لوگيستيكاسىنىڭ دامۋىنا دا سەپتىگىن تيگىزەدى», دەدى ناريمان تورەعاليەۆ.
مىنە, «قازاقستان تەمىر جولى» ۇلتتىق كومپانياسىنىڭ تاپسىرىسىمەن مەردىگەر «KazConstructionGroup» جشس ورال ۆوكزالىن جاڭعىرتۋدى باستاپ تا كەتتى. جۇمىس بيىلعى قىركۇيەك ايىندا اياقتالۋى ءتيىس. تەمىرجول ۆوكزالى سوڭعى رەت 2012 جىلى كۇردەلى جوندەۋدەن وتكەن ەكەن. جاڭا جوبا بارىسىندا تەمىرجول ۆوكزالدارىنداعى جايلىلىق پەن قاۋىپسىزدىك دەڭگەيى دە ەداۋىر ارتادى. سونداي-اق سەرۆيستىك قىزمەت كورسەتۋ ساپاسى جاقسارىپ, جولاۋشىلار ءۇشىن بارىنشا قولايلى جاعداي جاسالماق.
جوندەۋ بارىسىندا ۆوكزالداردىڭ سىرتى دا, ءىشى دە جاڭارتىلادى. عيماراتتاردىڭ ساۋلەتى قازىرگى زامانعا لايىقتالىپ, ىشكى كەڭىستىكتەر دە ايتارلىقتاي وزگەرىسكە ۇشىرايدى. ەڭ باستىسى ولار جولاۋشىعا ىڭعايلى ءارى قاۋىپسىز بولادى.
باتىس قازاقستان وبلىسى
