بۇدان بۇرىن ءمالىم بولعانداي, سپورتتىق قاۋىمداستىعى جەكەمەنشىك باسقارۋىنداعى ءىرى مۇز ايدىنىنا شەكتەۋلىلىگىنە قاتىستى ماسەلە كوتەرىلگەن بولاتىن. مانەرلەپ سىرعاناۋشى ميحايل شايدوروۆ تا قالادا مانەرلەپ سىرعاناۋدان ەلىمىزدىڭ ۇزدىك سپورتشىلارىن دايارلاۋ ءۇشىن ءتيىستى جاعدايدىڭ جاسالماعاندىعى تۋرالى مالىمدەگەن بولاتىن.
قازىرگى كەزدە مۇز ايدىنى كاسىبي سپورتشىلارعا, ونىڭ ىشىندە ميحايل شايدوروۆقا, سپورت مەكتەپتەرىنىڭ تاربيەلەنۋشىلەرىنە, سەكتسيالار مەن ۇلتتىق قۇراما مۇشەلەرىنە دە قولجەتىمدى بولا باستادى. بۇل ەلىمىزدىڭ بولاشاق چەمپيوندار بۋىنىن تاربيەلەۋگە سەپتىگىن تيگىزەدى.
الماتى اكىمدىگى قالانىڭ سپورت ينفراقۇرىلىمىن دامىتۋ مەن جاڭعىرتۋ باعىتىندا كەشەندى تاسىلدەردى ىسكە اسىرىپ جاتىر. سوڭعى ءۇش جىلدا قالادا التى جاڭا دەنە شىنىقتىرۋ-ساۋىقتىرۋ كەشەنى سالىنعان بولسا, بيىل تاعى ءتورت كەشەننىڭ قۇرىلىسى باستالادى. مۇنىمەن قوسا بيىل ورتالىق ستاديوندى حالىقارالىق ستاندارتقا سايكەستەندىرىپ, سىيىمدىلىعىن 35 مىڭ ورىنعا دەيىن ارتتىرۋعا بايلانىستى قايتا جاڭارتۋ جۇمىستارى باستالدى. «مەدەۋ» بيىك تاۋلى مۇز ايدىنىنىڭ ينجەنەرلىك ينفراقۇرىلىمىن جاڭارتۋ, مۇز ساپاسىن ارتتىرۋ جانە سىرعاناۋ ماۋسىمىن ۇزارتۋ باعىتىندا, سونىمەن قاتار جاساندى ينتەللەكتپەن جابدىقتالعان SmartICE جۇيەسىن ەنگىزۋ, جاڭا قوعامدىق كەڭىستىكتەر قۇرۋ ارقىلى مەدەۋدى جىل بويى جۇمىس ىستەيتىن الەمدىك دەڭگەيدەگى سپورتتىق-تۋريستىك ورتالىققا اينالدىرۋ كوزدەلىپ وتىر.
الماتى
