وسى تۇيتكىلدى ماسەلەلەر وبلىستىق ماسليحاتتاعى AMANAT فراكتسياسىنىڭ وتىرىسىندا تالقىلاندى. دەپۋتاتتار جاۋاپتى مەكەمەلەردەن ناقتى شارالار مەن جۇيەلى باقىلاۋ تالاپ ەتتى. فراكتسيا مۇشەسى, وبلىستىق ءماسليحات دەپۋتاتى باقىت اتايبەكوۆ رەسپۋبليكالىق تراسسالارداعى قاۋىپسىزدىك تالاپتارىنىڭ ساقتالماۋىن سىنعا الىپ, بۇل جاعدايدىڭ سالدارى كىمنىڭ موينىندا ەكەنىن اشىق سۇرادى.
«جول بويىندا ادام قازا تاپسا, جاۋاپكەرشىلىكتى كىم موينىنا الادى؟ تراسسانىڭ ەكى جاعى دا قورشالۋى ءتيىس. ءبىز بۇل جولدارعا اقى تولەپ وتىرمىز. كوپ ەلدەردە مۇنداي جولدار تولىق قورشالادى. ال بىزدە مال ءولىپ جاتسا, يەسىن سوتتايدى. الدىمەن جول يەسىن جاۋاپقا تارتۋ كەرەك شىعار؟ جول بويى قاراڭعى, جارىق جوق. بۇل رەسپۋبليكالىق جول. 25 جىلدىق كەپىلدىكپەن سالىنعان. سوندا بۇل كەپىل كىم ءۇشىن, نە ءۇشىن بەرىلەدى؟» - دەدى دەپۋتات.
ماسەلەگە قاتىستى جاۋاپ بەرگەن «قازاۆتوجول» ۇك» اق الماتى وبلىستىق فيليالى ديرەكتورىنىڭ ورىنباسارى ابزال كوكتال ۇلى بىرقاتار جوبالاردىڭ قولعا الىنعانىن اتاپ ءوتتى.
«الماتى–قوناەۆ, وسكەمەن–الماتى جانە الماتى–حورگوس باعىتتارىنداعى جولدارعا جارىقتاندىرۋ مەن قورشاۋ ورناتۋعا ارنالعان جوبالىق-سمەتالىق قۇجاتتامالار ازىرلەندى. بۇل جۇمىستار اقىلى جولداردىڭ قاراجاتى ەسەبىنەن جۇزەگە اسىرىلادى. سونىمەن قاتار, وتكەن جىلى وبلىستا جالپى ۇزىندىعى 172 شاقىرىم اۆتوجول پايدالانۋعا بەرىلدى. ونىڭ ىشىندە شامالعان ستانتسياسىن اينالىپ وتەتىن جولدار بار. ال بيىل 109 شاقىرىم جولدا قايتا جاڭعىرتۋ جۇمىستارى جۇرگىزىلىپ جاتىر. ونىڭ ىشىندە ۇزىناعاش-اتار – 42 شاقىرىم, كۇرتى-قوناەۆ – 62 شاقىرىم», – دەدى ول.
وبلىس اۋماعىندا كۇرە جولداردىڭ بويىندا 150-دەن استام جول وتكەلى مەن كوپىر, 1525 شاقىرىم قورشاۋ جانە 121 شاقىرىم جاسىل جەلەك ورنالاسقان. الايدا ولاردىڭ كوپشىلىگى ەسكىرگەن جانە تەحنيكالىق كۇتىم مەن جاڭعىرتۋدى قاجەت ەتەدى. وسىعان بايلانىستى 2025 جىلى جولداردى كۇتىپ ۇستاۋعا ارنالعان 16 ارنايى تەحنيكا ساتىپ الۋ جوسپارلانىپ وتىر. بۇدان بولەك, رەسپۋبليكالىق ماڭىزى بار جول وتكەلدەرى مەن كوپىرلەردى جوندەۋگە بيىل 5,6 ملرد تەڭگە بولىنگەن.
جول ساپاسىن باقىلاۋ بويىنشا «جول اكتيۆتەرى ساپاسىنىڭ ۇلتتىق ورتالىعى» شجق رمك الماتى وبلىستىق فيليالى دا ءوز ەسەبىن ۇسىندى. فيليال ديرەكتورى ەربولات كوشتاەۆتىڭ مالىمەتىنشە, 2024 جىلى 23 اۆتوجول جوباسى مەن 199 كوشە-جول جەلىسى تەكسەرىلگەن. جۇرگىزىلگەن زەرتتەۋلەر ناتيجەسىندە 1085 سىناما الىنعان, ونىڭ 28 پايىزى قۇرىلىس نورمالارىنا ساي كەلمەگەن.
فراكتسيا وتىرىسىندا AMANAT پارتياسىنىڭ مۇشەسى, وبلىستىق ءماسليحات دەپۋتاتى رۇستەم وتەمباەۆ تا قاراساي اۋدانىنداعى وبلىستىق ماڭىزى بار جولداردىڭ احۋالىنا قاتىستى ماسەلە كوتەردى.
«ىرگەلى اۋىلدىق وكرۋگىنە قاراستى كوكساي, ىرگەلى جانە كەمەرتوعان اۋىلدارىنداعى وبلىستىق ماڭىزى بار جولدارعا سوڭعى ءۇش جىلدا ەشقانداي كۇتىم جاسالماعان. جولدار كۇردەلى جوندەۋدى قاجەت ەتەدى, تروتۋار مۇلدە جوق. جولدارعا جاۋاپتى مەكەمە – توو «دەپول» قارجى الىپ وتىرعانىمەن, جۇمىس جۇرگىزبەي وتىر. بۇل جاعداي نەگە باقىلاۋعا الىنباي وتىر جانە ناقتى قانداي شارالار قابىلدانباق؟» – دەدى ول.
بۇل ماسەلەگە بايلانىستى وبلىستىق جولاۋشىلار كولىگى جانە اۆتوموبيل جولدارى باسقارماسى اتالعان ەلدى مەكەندەردەگى جولداردىڭ تەحنيكالىق جاعدايىن زەردەلەۋ ماقساتىندا جاقىن كۇندەرى مونيتورينگ جۇرگىزىلەتىنىن حابارلادى.
وتىرىستا قوزعالعان ماسەلەلەر بويىنشا AMANAT فراكتسياسى جاۋاپتى ورگانداردان ساپاعا باقىلاۋدى كۇشەيتۋدى, ناقتى جاۋاپكەرشىلىك جۇيەسىن ەنگىزۋدى تالاپ ەتتى. دەپۋتاتتار بارلىق كوتەرىلگەن پروبلەمالارعا قاتىستى ءتيىستى ۆەدومستۆولارعا رەسمي ساۋالدار جولداناتىنىن جەتكىزدى.
الماتى وبلىسى.
