فوتو: دوسجان بالابەك
ەڭ اۋەلى ارداگەردىڭ ءىزباسار ىنىلەرى ىزگى تىلەكتەرىن ايتىپ, اننەن شاشۋ شاشقان. سودان كەيىن سالتاناتتى شارانىڭ قوناقتارى اقىن ۇلىقبەك ەسداۋلەت پەن ارداگەر ءفوتوتىلشى نۇرمامبەت قيزاتوۆ, قازاقستان جۋرناليستەر اكادەمياسىنىڭ پرەزيدەنتى ساعىمباي قاباش ۇلى, «نەۆادا-سەمەي» حالىقارالىق انتيادرولىق قوزعالىسىنىڭ ۆيتسە-پرەزيدەنتى, باسپاگەر ۆالەري ايتمۇقاش ۇلى كورمەنىڭ كوك لەنتاسىن قيدى.
بۇگىنگى سۋرەت, ەرتەڭى تاريح دەگەن ءتامسىل ءدوپ ايتىلعان. كورمە سونىڭ دالەلىندەي ەدى. كۇنى كەشە تاسپاعا تارتىلعان فوتوسۋرەتتەر بۇگىن تاريح بولىپ, كورمەدە تۇر. كورەرمەندەر قىزىقتاپ, كەشەگى كۇننەن ەستەلىك ايتىسىپ جاتتى. قاليعۇمار قابدەشەۆ ءتىپتى اسكەر قاتارىندا ءجۇرىپ, نەبىر فوتوسۋرەتتەر تۇسىرگەن ەكەن. ەڭ العان وڭ تۇستىك پوليۋسكە بارىپ, فوتوسۋرەت تۇسىرگەن دە قاليعۇمار اقساقال ەدى. سوناۋ 1965 جىلدارى انتاركتيدادان تۇسىرىلگەن سول سۋرەتتەرى دە كورمەنىڭ تورىنەن تابىلدى.
«اسكەر قاتارىندا ءجۇرىپ, وڭ تۇستىك پوليۋسكە بارىپ, سول جاقتى فوتوسۋرەتكە تۇسىرگەن تۇڭعىش قازاق قاليعۇمار قابدەشەۆ ەدى. سول زاماننان باستاپ, بەرتىنگە دەيىنگى فوتوسۋرەتتەرى كورمەگە قويىلىپ, كىتاپقا ەندى. سونىمەن قاتار, دىنمۇحامەد قوناەۆتىڭ ءىس ساپارلارىن دا فوتواپپاراتقا باسىپ جۇرگەن ابىز اقساقالىمىز ەدى», دەيدى كىتاپتىڭ قۇراستىرۋشىسى داۋرەن ماقسۇتحان ۇلى.
كەلگەن قوناقتاردىڭ كەيبىرەۋى كورمەدەن وزدەرىن تانىپ, ءماز-ءمايرام بولىسىپ جاتقان. ولار وتكەننەن ەستەلىك ايتىسىپ, شارانىڭ ەكىنشى ءبولىمىندەگى دوڭگەلەك ۇستەلدە باس قوستى. شارا تىزگىنىن ۇستاعان ءفوتوتىلشى, ۇستاز اسىلحان ءابدىرايىم مەرەيتوي يەسىنىڭ ءومىر جولى تۋرالى ازدى-كوپ اقپارات بەرە كەلە ءسوز كەزەگىن اقىن ۇلىقبەك ەسداۋلەتكە بەرگەن.
«قاليعۇمار قابدەش ۇلى مەن مەنىڭ اۋىلىمنىڭ اراسى ءجۇز شاقىرىمداي عانا. جەرلەستىگىمىز ءوز الدىنا, بۇل كىسىنىڭ ونەرىن قاتتى سىيلايمىن. كورمە زالىنا ەنگەندە, تاريحپەن قاۋىشتىق. ءار سالانىڭ مىقتىلارى بار. ال فوتوونەردىڭ مىقتىسى, ابىزى – قاليعۇمار اقساقال», دەدى اقىن ۇلىقبەك ەسداۋلەت.
جالعاسىن تاپقان شارادا شىعىس قازاقستان وبلىسى اكىمىنىڭ قۇتتىقتاۋ حاتى وقىلىپ, مارقاكول اكىمدىگى اتىنان اقساقالعا شاپان جابىلدى. ءىزىن باسىپ كەلە جاتقان ارىپتەس باۋىرلارى دا قولپاشتاپ, قۇرمەت كورسەتتى. ەسكە سالساق, قاليعۇمار قابدەش تەاتر مەن كينو سالاسىنا دا زور ەڭبەگى سىڭگەن. ءاسانالى ءاشىموۆ, دوسحان جولجاقسىنوۆتارعا ارنالعان فوتوالبومى دا جارىق كورگەن.
«مەنىڭ ءومىرىمدى, ونەرىمدى ەتەنە جاقسى بىلەتىن بىرەۋ بولسا, ول قاليعۇمار قابدەش ۇلى. ءجۇرىپ وتكەن جولىمدى تاسپالادى, البوم ەتىپ قاتتادى. ەندى ەلگە بارىپ, كورمە قويسام دەيدى, ساتىمەن بولسا ەكەن», دەپ اق تىلەگىن جولدادى ايگىلى اكتەر ءاسانالى ءاشىموۆ.
ءيا, ارداگەر ءفوتوتىلشىنىڭ ەندىگى جوسپارى, تۋعان جەرى مارقاكول وڭىرىندە جەكە كورمەسىن وتكىزۋ.
