سوتقا ەلىمىزدىڭ بارلىق باق وكىلىنە قاتىسۋعا رۇقسات بەرىلدى. مەملەكەتتىك پروكۋرورلار سوتتالۋشىلاردىڭ ءتىزىمىن ايتىپ, وقيعانىڭ ءمان-جايىن تولىق بايانداپ بەردى.
«قىلمىسقا قاتىسى بار كۇدىكتىلەر تالدىقورعانداعى ۋاقىتشا وقشاۋلاۋ ورنىندا بولعاندىقتان سوت وتىرىسى وسى قالادا ءوتىپ جاتىر. ايىپتالۋشىلار اراسىندا كامەلەت جاسىنا جەتپەگەن كۇدىكتى بار. سوندىقتان جۋرناليستەر تاراپىنان قاتتى قىسىم تۇسىرمەگەنىمىز ابزال. سوت باستان-اياق اشىق تۇردە وتەتىندىكتەن سوت وتىرىسىن ونلاين كورسەڭىزدەر دە بولادى», دەدى جوعارعى سوتتىڭ كوممۋنيكاتسيا ءبولىمىنىڭ مەڭگەرۋشىسى پەريزات سادۋاقاس-حايرۋللينا.
«ادام ءولتىرۋ», «بۇزاقىلىق», «قورقىتۋ» جانە «قىلمىس تۋرالى حابارلاماۋ» باپتارى بويىنشا قوزعالعان قىلمىستىق ىستەردى الماتى وبلىسىنىڭ پوليتسيا دەپارتامەنتى تەرگەگەن. قىلمىستىق ءىس 62 تومنان تۇرادى. ءىس ماتەريالدارىندا 40 سوت ساراپتاماسى, شامامەن 200 كۋاگەردىڭ جاۋابى جانە قوسىمشا سەگىز بەينەماتەريال قامتىلعان.
«سوت وتىرىسىنا قاتىسۋشىلاردىڭ پىكىرلەرىن ەسكەرە وتىرىپ, سوت بۇل ءىس بويىنشا سوت تالقىلاۋىن اشىق رەجىمدە وتكىزۋ تۋرالى شەشىم قابىلدادى. سوت وتىرىسىنىڭ ونلاين ترانسلياتسياسىن جوعارعى سوتتىڭ YouTube-ارناسىندا ەركىن كورۋگە بولادى», دەپ حابارلادى جوعارعى سوت وكىلى.
جابىرلەنۋشى تاراپتىڭ مۇددەسىن سوتتا ادۆوكات مەيىرمان شەكەەۆتىڭ زاڭ كەڭسەسى قورعايدى. قورعاۋ توبىنا جاندوس پالمانوۆ, ءالىم مۇستافاەۆ, دينا دوساەۆا, نۇربولات ىبراەۆ, باعدات اماندوس ۇلى جانە بەكزات ميازوۆ ەسىمدى ماماندار كىرگەن. الايدا سوت وتىرىسىنا سوتتالۋشىلاردىڭ قورعاۋشىلارى تولىق كەلمەدى. جولدىڭ الىستىعىن ايتىپ, الدىن الا ونلاين قاتىسۋعا ءوتىنىش جىبەرگەنىمەن, وعان سۋديا ءۇزىلدى-كەسىلدى قارسى بولدى. دەگەنمەن سوتتالۋشى ابزال شىناسىلدىڭ اناسى قوعامدىق قورعاۋشى رەتىندە قاتىسۋ قۇقىعىنا يە بولدى. ودان بولەك, قورعاۋشى تاراپ كەلەسى وتىرىستى قاسكەلەڭ قالاسىندا وتكىزۋدى سۇرادى. بۇل سۇرانىستى دا سۋديا قاناعاتتاندىرمادى. سەبەبى قاسكەلەڭ قالاسىندا تەرگەۋ يزولياتورى جوق.
«قىلمىسقا قاتىسى بار ازاماتتاردىڭ كەيبىرىنە جەڭىل جازا تاعايىندالۋى مۇمكىن. سەبەبى قارالىپ جاتقان باپتار بويىنشا ەكى ادام عانا قاساقانا كىسى ءولتىرۋ ىسىنە قاتىسقان. ال قالعانى بۇزاقىلىق جاساعاندار رەتىندە تىركەلىپ وتىر. بۇل شەشىم كوپتى الاڭداتىپ وتىر. سوت ءادىل بولادى دەپ ويلايمىز», دەيدى قوعام بەلسەندىسى ارنۇر بەرەنباەۆ.
اتالعان ءىس بويىنشا سوتقا دەيىنگى تەرگەۋ ءالى جالعاسىپ جاتىر. باس پروكۋروردىڭ ورىنباسارى عالىمجان قويگەلديەۆ شەرزات بولاتتىڭ ءۇيىنىڭ ورتەنۋىنە قاتىستى تەرگەۋدىڭ جاڭا مالىمەتتەرىن جاريالادى.
«ساراپتامالار كەڭ اۋقىمدا جۇرگىزىلدى. بۇل ساراپتامالاردىڭ بەلگىلى ءبىر ناتيجەلەرى بار. ءبىز رەسەي فەدەراتسياسىنا حالىقارالىق تەرگەۋ بۇيرىعىن جىبەردىك», دەيدى پروكۋرور ع.قويگەلديەۆ.
كەلەسى سوت وتىرىسى 17 ساۋىردە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا وتەدى.
جەتىسۋ وبلىسى
