جاڭا زاڭ اياسىندا 21 جاسقا تولماعان جانە 55 جاستان اسقان ازاماتتار كەپىلسىز تۇتىنۋشىلىق نەسيە الۋ ءۇشىن «ەلەكتروندىق ۇكىمەت» پورتالى ارقىلى رەسىمدەلگەن كەلىسىم بەرۋى قاجەت بولادى. بۇل تالاپ قوسىمشا قۇقىقتىق اكتىلەردە ناقتى كورسەتىلەدى.
كەپىلسىز ونلاين تۇتىنۋشىلىق نەسيەلەردى راسىمدەگەن كەزدە, 24 ساعاتتىق «سالقىنداۋ» كەزەڭى ەنگىزىلەدى. بۇل ۋاقىت ىشىندە ازامات نەسيە شارتتارىمەن مۇقيات تانىسىپ, شەشىمىن وزگەرتە الادى.
ەگەر ازامات العاش رەت نەسيە الاتىن بولسا, ول مىندەتتى تۇردە بانك نەمەسە ميكروقارجى ۇيىمىنىڭ بولىمشەسىنە كەلىپ, جەكە قاتىسۋ ارقىلى راسىمدەۋى قاجەت.
ال اسكەري قىزمەت ءوتىپ جاتقان اسكەري قىزمەتشىلەرگە كەز كەلگەن نەسيەلەر مەن ميكروكرەديتتەر بەرۋگە زاڭ جۇزىندە تىيىم سالىنادى.
زاڭ اياسىندا الاياقتىق ارەكەتتەرمەن الىنعان نەسيەلەر مەن ميكروكرەديتتەردى ەسەپتەن شىعارۋ مۇمكىندىكتەرى كەڭەيتىلەدى. بانكتەر ترانزاكتسيالارداعى كۇماندى بەلگىلەردى انىقتاۋعا قاتىستى قوسىمشا وكىلەتتىكتەرگە يە بولادى.
ميكروكرەديتتەر بويىنشا ايىپپۇل مەن ءوسىمپۇل الۋعا تولىقتاي تىيىم سالىنادى (قايتارىلماعان جاعدايدان باسقا). سونىمەن قاتار, الەۋمەتتىك وسال توپتارعا ەكونوميكالىق جاعداي ناشارلاعان كەزدە مىندەتتى تۇردە كەمىندە 3 اي مەرزىمگە ايىپپۇلسىز نەسيە تولەۋدى شەگەرۋ قاراستىرىلعان.
قيىن جاعدايعا تاپ بولعان ازاماتتار ءۇشىن اي سايىنعى تولەم سوماسى 50% جانە ودان كوپ مولشەرگە ازايتىلۋى مۇمكىن. بانكتىك نەسيەنى ءىشىنارا نەمەسە مەرزىمىنەن بۇرىن وتەگەنى ءۇشىن جەكە تۇلعالاردان ايىپپۇل وندىرىلمەيدى.
