فوتو: اشىق دەرەككوز
«كوشەدە ءىلىنىپ تۇرعان ۆاليۋتا باعامى تۋرالى اقپارات – الەۋمەتتىك ماڭىزى بار اقپارات. ول ءاردايىم قولجەتىمدى ءارى بارىنشا اشىق بولۋى كەرەك. «جارناما تۋرالى» زاڭ ۆاليۋتا باعامدارىن ايىرباستاۋ پۋنكتتەرىنىڭ قاسبەتتەرىنە, شاتىرلارىنا جانە كىرەبەرىستەرىنە ورنالاستىرۋعا تىيىم سالمايدى», دەيدى ايىرباستاۋ پۋنكتتەرى قاۋىمداستىعىنىڭ ەكونوميكالىق سۇراقتار بويىنشا كەڭەسشىسى رابيام سەرىكباەۆا.
ايىرباستاۋ پۋنكت يەلەرى ۇلتتىق بانكتىڭ مۇنداي ەرەجە قابىلداۋىنىڭ ءوزى «ادىلەتتى ەمەس» دەپ سانايدى. ولاردىڭ پايىمىنشا, جاڭا ەرەجە جوباسى «اقپاراتقا قول جەتكىزۋ» تۋرالى زاڭعا قايشى كەلەدى. ءارى ۇلتتىق بانكتىڭ كوشە كەڭىستىگىن, جول قاۋىپسىزدىگىن جانە قالالاردىڭ ساۋلەتتىك كەلبەتىن رەتتەۋگە وكىلەتتىگى جوق دەگەن پىكىردى ايتادى.
ۇلتتىق بانك ۇسىنعان مالىمەتكە سۇيەنسەك, قازىر ەلىمىزدە 565 ايىرباستاۋ پۋنكتى بار. ەگەر جاڭا ەرەجە كۇشىنە ەنسە, ولاردىڭ تابىسىنا, تۇتىنۋشىلار سانىنا مىندەتتى تۇردە اسەر ەتەدى.
سالا ماماندارىنىڭ سوزىنشە, ساۋدا ورتالىقتارى, اۋەجايلارى, تەمىر جول مەن كازينولاردا ورنالاسقان ايىرباستاۋ پۋنكتتەرى تاقتانى الىپ تاستاۋعا مىندەتتى ەمەس. قاۋلىدا ونداي ەرەجە جوق. شەكتەۋ تەك كوشە بويىنداعى ايىرباستاۋ پۋنكتتەرىنە قاتىستى.
ايتا كەتەيىك, ۆاليۋتا كۋرسى جازىلعان تابلونى الىپ تاستاۋ تۋرالى قاۋلى «اشىق نقا» پورتالىندا جاريالاندى. ازىرگە كۇشىنە ەنگەن جوق, تالقىلاۋ 14 ساۋىرگە دەيىن سوزىلادى. ەگەر كۇشىنە ەنسە, پۋنكت يەلەرى ول تاقتانى عيمارات ىشىنە عانا ىلۋگە مىندەتتى بولادى.
ايىرباستاۋ پۋنكتتەرىنىڭ جۇمىسىنا قاتىستى ەرەجە بۇل عانا ەمەس. قاڭتاردا ۇلتتىق بانك ايىرباستاۋ پۋنكتتەرىندەگى شەتەلدىك ۆاليۋتالاردى ساتىپ الۋ جانە ساتۋ باعامدارىنىڭ اراسىنداعى ايىرماشىلىقتى بەلگىلەدى. ەندى ايىرباستاۋ پۋنكتتەرىندە دوللاردى ساتۋ مەن ساتىپ الۋ كەزىندەگى ايىرماشىلىق 7 تەڭگەدەن اسپاۋ كەرەك. ال ەۋرونى ساتۋ مەن ساتىپ الۋ كەزىندەگى ايىرماشىلىق 10 تەڭگەدەن ءاسپاۋى تيىس.
