كورمەدە گيننەسستىڭ رەكوردتار كىتابىنا ەنگەن «بايسارى» اتتى اسىل تۇقىمدى قوي تۇقىمى كوپشىلىك نازارىنا ۇسىنىلدى. ەتتىلىگىمەن ەرەكشەلەنەتىن «بايسارى» تۇقىمدى ەڭ ۇلكەن قوشقاردىڭ سالماعى – 231 كەلى. حالىقارالىق كورمەنىڭ اشىلۋ سالتاناتىنا وبلىس اكىمىنىڭ ورىنباسارى ەرتاي التاەۆ يگى ءىستى ۇيىمداستىرۋشىلار مەن مال باسىن اسىلداندىرۋ باعىتىندا ەڭبەك ەتىپ جاتقان شارۋالارعا ساتتىلىك تىلەپ, العىسىن ءبىلدىردى.
«وبلىستا اسىل تۇقىمدى قوي سانىنىڭ ۇلەسى 13 پايىزدى قۇرايدى نەمەسە 581,4 مىڭ باس. اسىل تۇقىمدى مارتەبەسى بار 850 بىرلىك اگروقۇرىلىم جۇمىس ىستەيدى. سوڭعى 10 جىلدا مال شارۋاشىلىعى سالاسىندا سانعا ەمەس ساپاعا ءمان بەرىلە باستادى. مال تۇقىمىن اسىلداندىرىپ, ءداستۇرلى شارۋاشىلىقتان زاماناۋي مال باعۋ تاسىلىنە كوشكەن, قوجالىقتاردىڭ تابىسى ەسەلەنىپ, الەۋەتى ارتا ءتۇستى», دەدى وبلىس اكىمىنىڭ ورىنباسارى.
ءىس-شارا اياسىندا ەتتى-مايلى قوي تۇقىمىنىڭ «ەڭ اۋىر سالماقتى», «بوي بيىكتىگى», «سىرتقى ەكستەرەر» اتالىمدارى بويىنشا بايقاۋلار ءوتتى. ناتيجەسىندە 45 نوميناتسيانىڭ جەڭىمپازدارى انىقتالىپ, قازىلار القاسىنىڭ شەشىمىمەن ۇزدىك قوشقار يەلەرىنە موتوتسيكل, تەلەديدار, توڭازىتقىش جانە كۋبوكتار تابىستالدى. جالپى جۇلدە قورى – 30 000 اقش دوللارى.
