وقيعا ورنىنا دەرەۋ ءورت ءسوندىرۋ بولىمدەرى, ارنايى تەحنيكا مەن ورمان شارۋاشىلىعى قىزمەتكەرلەرى جۇمىلدىرىلدى. ءورت سوندىرۋگە اباي, شىعىس قازاقستان, پاۆلودار وبلىستارىنىڭ توتەنشە جاعدايلار دەپارتامەنتتەرى, «سەمەي ورمانى» مەن «ەرتىس ورمانى» مەكەمەلەرىنىڭ قىزمەتكەرلەرى جانە جەرگىلىكتى اتقارۋشى ورگاندار اتسالىسىپ جاتىر.
جاعدايدى باقىلاۋ ءۇشىن وقيعا ورنىنا اباي وبلىسىنىڭ اكىمى بەرىك ءۋالي بارىپ, جەدەل شتاب وتىرىسىن وتكىزدى. وبلىس اكىمىنىڭ ورىنباسارى ديميتري گاريكوۆ پەن تجد باستىعى ماناربەك شاپاعاتوۆ ءوڭىر باسشىسىنا احۋال جايلى باياندادى.
ءورتتى سوندىرۋگە بارلىعى 353 ادام, 130-عا جۋىق تەحنيكا جانە 1 تىكۇشاق تارتىلدى. قازىرگى ۋاقىتتا ءورتتىڭ تارالۋى توقتاعان, جاعداي تۇراقتانىپ كەلەدى. مامانداردىڭ ايتۋىنشا, جاڭبىرلى اۋا رايى ءورتتى سوندىرۋگە قولايلى جاعداي تۋعىزعان.
وبلىس اكىمى ءورت تولىق سوندىرىلگەنگە دەيىن جاعداي قاتاڭ باقىلاۋدا بولاتىنىن ايتىپ, ءتيىستى تاپسىرمالار بەردى.
– ەڭ باستىسى – ادامداردىڭ ءومىرى مەن قاۋىپسىزدىگى. بارلىق تەحنيكا مەن مۇمكىندىكتەر جۇمىلدىرىلۋى ءتيىس. قازىر وسكەمەن مەن پاۆلوداردان كومەك كەلە جاتىر. تاڭەرتەڭ تىكۇشاقپەن ءورت بولعان اۋماقتى شولىپ شىعامىن. جاعداي تىكەلەي باقىلاۋىمدا بولادى, – دەدى بەرىك ءۋالي.
ازىرگە ەلدى مەكەندەرگە قاۋىپ ءتونىپ تۇرعان جوق. ايماقتاعى احۋال تولىق قاداعالانىپ وتىر.
اباي وبلىسى
