حالىقارالىق ءىس-شارانىڭ باستى ماقساتى – دوستىق بايلانىستاردى نىعايتۋ جانە جاستاردى ءۇندىستاننىڭ مادەنيەتىمەن تانىستىرىپ, زاماناۋي دامۋىن كورۋگە مۇمكىندىك بەرۋ. ىسكەرلىك باعدارلاما اياسىندا قاتىسۋشىلار جاستار ساياساتى, سپورت جانە تسيفرلاندىرۋ سالالارىنا جەتەكشىلىك ەتەتىن مينيسترلەرمەن كەزدەستى. سونداي-اق ولار جەرگىلىكتى اتقارۋشى ورگاندار مەن ءۇندىستاننىڭ جەتەكشى وقۋ ورىندارىنىڭ جۇمىسىمەن تانىستى.
تۋريستىك باعىت بويىنشا جاستار دەليگە, گواعا, اگراعا ساپار شەگىپ, ءتاج-ماحال, اگرا قامالى جانە باسقا دا تاريحي ورىنداردى ارالادى.
فورۋمنىڭ العاشقى كۇنى قاتىسۋشىلار اگراعا ساپارلاپ, الەمنىڭ جەتى كەرەمەتىنىڭ ءبىرى ءتاج-ماحال كەسەنەسىن كوردى. تۇتاستاي اق ءمارماردان تۇرعىزىلعان ساۋلەت ونەرى جاستاردى تامساندىرماي قويمادى. كەلەسى كۇنى بەس ەلدىڭ دەلەگاتسياسى گوا شتاتىنا اتتاندى. كۇن, قۇم جانە تەڭىز ولكەسى سانالاتىن گوا ءۇندىستاننىڭ ەڭ كىشكەنتاي بولسا دا, باي شتاتىنىڭ ءبىرى سانالادى. ورتالىق ازيا جاستارى گوانىڭ ساۋدا جانە ونەركاسىپ پالاتاسى باسشىلارىمەن, جاستار ءىسى جانە سپورت مينيسترلىگىنىڭ وكىلدەرىمەن جۇزدەستى.
سونداي-اق قاتىسۋشىلار گوا شتاتىنىڭ گۋبەرناتورى جانە باس ءمينيستردىڭ جەكە قابىلداۋىندا بولدى. كەيىن جاستار گوا مەنەدجمەنت ينستيتۋتىنا ات باسىن بۇرىپ, پلانتاتسيانى ارالادى.
دەليدە جاستارىمىز ءۇندىستاننىڭ سىرتقى ىستەر ءمينيسترى سۋبرامانيام دجايشانكارمەن كەزدەستى. كەزدەسۋدە قازاقستان مەن ءۇندىستان اراسىنداعى تاريحي, ەكونوميكالىق جانە مادەنيە بايلانىستار تۋرالى ءسوز سويلەپ, پىكىر الماستى. فورۋمنىڭ قورىتىندى كەشىندە جاستار ءىسى جانە سپورت ءمينيسترى مانسۋح مانداۆيا ورتالىق ازيادان كەلگەن ءجۇز جاستى قابىلداپ, سىي-سياپات جاسادى. ءار مەملەكەتتىڭ كوشباسشىلارى لاۋازىمدى تۇلعالار الدىندا ءسوز سويلەپ, ءوز ەلدەرىندە جاستار ساياساتى قالاي جۇرگىزىلەتىنىن ايتتى.
فورۋم قاتىسۋشىلارى الەمدىك ۇزدىك وقۋ ورىنداردىڭ قاتارىنا كىرەتىن ءۇندىستاننىڭ تەحنولوگيا ينستيتۋتىنا ات باسىن بۇرىپ, زەرتحاناسىن ارالاپ كوردى.
– ءۇندىستان مەن ورتالىق ازيا ەلدەرىمەن قارىم-قاتىناسى وتە تەرەڭدە جاتىر. بۇل ساپار بىزگە سول ەلدىڭ دامۋى, ينفراقۇرىلىمى, كەدەيلىك دەڭگەيىن تومەندەتۋ جونىندەگى كۇش-جىگەرى جانە كەيىنگى جىلدارداعى الەۋمەتتىك-ەكونوميكالىق وزگەرىستەرى تۋرالى تەرەڭ تۇسىنىك بەردى. ساپار بارىسىندا العان تاجىريبەمىز بەن اسەرىمىز ءۇندىستان مەن ورتالىق ازيا اراسىنداعى حالىقارالىق بايلانىستاردى نىعايتىپ, ۇزاقمەرزىمدى بايلانىستاردى ورناتۋعا ىقپال ەتەرى انىق, – دەدى فورۋمعا قاتىسۋشى جاس ءالجان ءشارىپوۆ.
