سۋرەت: business-vector.info
جايرەم كەنتىندە بيىل پايدالانۋعا بەرىلەتىن ءبىر كوممەرتسيالىق ءۇيدىڭ قۇرىلىسى اياقتالۋعا جاقىن. وڭىردە حالىقتىڭ الەۋمەتتىك وسال توپتارى مەن كوپبالالى وتباسىلارعا وتكەن جىلى 80 پاتەر بەرىلسە, بيىلعى ناۋرىز مەرەكەسى قارساڭىندا رەسپۋبليكالىق بيۋدجەت ەسەبىنەن تاعى 40 پاتەر يەلەرىن تاپتى. بۇل تۋرالى ۇلىتاۋ وبلىسىنىڭ اكىمى داستان رىسپەكوۆ قاراجال قالاسىنىڭ تۇرعىندارىمەن كەزدەسۋ بارىسىندا مالىمدەدى.
بيىل رەسپۋبليكالىق بيۋدجەت ەسەبىنەن قاراجال قالاسىندا قوسىمشا 10 پاتەر ساتىپ الۋ جوسپارلانعان. سونىمەن قاتار 96 پاتەردى ساتىپ الۋعا 1,4 ملرد تەڭگەگە ءوتىنىم بەرۋ مۇمكىندىگى قاراستىرىلىپ جاتىر. 2026–2028 جىلدارى قاراجالدا 100-دەن استام ءبىر قاباتتى, ەكىپاتەرلى ۇيلەر سالۋ جوسپارلانعان. بۇل جوبا حالىقتىڭ الەۋمەتتىك وسال توپتارىنان 200-گە جۋىق وتباسىن باسپانامەن قامتاماسىز ەتۋگە مۇمكىندىك بەرەدى.
قاراجال قالاسىنىڭ تاۋەلسىزدىك كوشەسى بويىنداعى 12-ۇيدە قايتا جاڭعىرتۋ جۇمىستارى جۇرگىزىلىپ جاتىر. بۇدان بولەك, جەرگىلىكتى بيۋدجەت ەسەبىنەن جالپى قۇنى 2,8 ملرد تەڭگەنى قۇرايتىن 6 ينجەنەرلىك-كوممۋنيكاتسيالىق ينفراقۇرىلىم جوباسى ىسكە اسىرىلا باستادى. جوبا 25 كوپقاباتتى ءۇيدى (719 پاتەر), 373 جەكە تۇرعىن ءۇيدى ينجەنەرلىك جەلىلەرمەن قامتاماسىز ەتۋگە باعىتتالعان.
قاراجالداعى جەكە تۇرعىن ۇيلەرگە, 89 ۋچاسكەگە ينجەنەرلىك-كوممۋنيكاتسيالىق ينفراقۇرىلىم جۇرگىزۋگە وبلىستىق بيۋدجەتتەن 55 ملن تەڭگە ءبولىندى. جالپى, وڭىردە تۇرعىن ءۇي قۇرىلىسىنا 3,8 ملرد تەڭگە قاراستىرىلىپ, ونىڭ ىشىندە قاراجال قالاسىنا 200 ملن تەڭگە كوزدەلگەن. سونىمەن قاتار قاراجال قالاسى مەن جايرەم كەنتىندە اۆتوموبيل كولىگىنە ارنالعان اۆتوتۇراق قۇرىلىسى ءجۇرىپ جاتىر. جوباعا وبلىستىق بيۋدجەتتەن 512 ملن تەڭگە قاراستىرىلعان. جايرەمدەگى اۆتوتۇراق قۇرىلىسىن اياقتاۋ ماقساتىندا توتەنشە جاعدايلار مينيسترلىگىنە قوسىمشا قاراجات بولۋگە ءوتىنىم بەرىلدى.
ۇلىتاۋ وبلىسى
