قاراعايلى ىقشام اۋدانىندا سالىنعان №51 ءبىلىم ورداسىنىڭ اشىلۋ سالتاناتىنا وبلىس اكىمى بەرىك ءۋالي, «سامۇرىق قازىنا كونستراكشن» اق باسقارما توراعاسى ماۋلەن ايمانبەتوۆ, ءبىلىم سالاسىنىڭ ارداگەرلەرى, اقساقالدار جانە اتا-انالار قاتىستى.
وبلىس اكىمدىگىنىڭ ءباسپاسوز قىزمەتىنىڭ دەرەگىنشە, جاڭا دا جايلى مەكتەپتە وقۋشىلاردىڭ جان-جاقتى ءبىلىم الۋىنا بارلىق جاعداي جاسالعان. زاماناۋي جابدىقتارمەن تولىق قامتاماسىز ەتىلگەن ءبىلىم ورداسىندا 65 سىنىپ-كومپلەكت بار. ونىڭ ىشىندە ەكى مەكتەپالدى دايارلىق سىنىبى جۇمىس ىستەيدى. مەكتەپتە 100-گە جۋىق پەداگوگ ەڭبەك ەتەدى.
جاڭا مەكتەپ 33 وقۋ كابينەتىمەن قاتار, ءۇش ينفورماتيكا كابينەتى, روبوتوتەحنيكا سىنىبى, STEM زەرتحاناسى, گرافيكا جانە مودەلدەۋ, مۋلتيمەديا, ۆيزۋالدى ونەر پاندىك كابينەتتەرىمەن جابدىقتالعان. سونداي-اق ء«ۇي مادەنيەتى» مەن «تاماقتانۋ مادەنيەتى» شەبەرحانالارى قاراستىرىلعان. 250 ورىندىق اكت زالى, 338 ورىندىق اسحانا, رەسۋرستىق ورتالىق پەن كىتاپحانا, ەكى سپورت زالى, ەكى فۋتبول الاڭى وقۋشىلاردىڭ شىعارماشىلىق, ينتەللەكتۋالدىق, سپورتتىق تۇرعىدان دامۋىنا مۇمكىندىك مول.
ايماق باسشىسى جاڭا مەكتەپتىڭ اشىلۋ سالتاناتىندا سويلەگەن قۇتتىقتاۋ سوزىندە ءبىلىم ورداسىنىڭ قاراعايلى ىقشام اۋدانى ءۇشىن عانا ەمەس, قالا تۇرعىندارى ءۇشىن ماڭىزى زور ەكەنىن ايتتى.
«وزدەرىڭىز جاقسى بىلەسىزدەر, مەملەكەت باسشىسى ءوز جولداۋىندا ء«اربىر وقۋشىنىڭ ءبىلىم الىپ, جان-جاقتى دامۋى ءۇشىن قولايلى جاعداي جاسالۋعا ءتيىس» دەپ «جايلى مەكتەپ» ۇلتتىق جوباسىن جۇزەگە اسىرۋدى تاپسىرعان بولاتىن. بۇگىن, مىنە, وسى جوبا اياسىندا اباي وبلىسىنداعى العاشقى مەكتەپتى پايدالانۋعا بەرىپ جاتىرمىز. وقۋشىلار مەن اتا-انالار بۇل كۇندى اسىعا كۇتتى. ءبىز دە اكىمدىك تاراپىنان مەكتەپتەردىڭ تەزىرەك, ءتورتىنشى توقساندا پايدالانۋعا بەرىلۋىنە كۇش سالدىق. بۇعان دەيىن قالانىڭ باسقا مەكتەپتەرىنە قاتىناپ وقىعان وقۋشىلارعا تاماشا تارتۋ جاسادىق دەپ ويلايمىن. ءبىلىم ورداسىنىڭ بارلىق ۇستازدارى مەن وقۋشىلارىنا ۇزدىك جەتىستىكتەر مەن جارقىن بولاشاق تىلەيمىن. جاڭا دا جايلى مەكتەپ قۇتتى بولسىن», دەدى وبلىس اكىمى.
ايماق باسشىسىنىڭ ايتۋىنشا, وبلىستا «جايلى مەكتەپ» ۇلتتىق جوباسى اياسىندا 5 مەكتەپ سالۋ جوسپارلانعان, جاڭا وقۋ جىلىندا سەمەي قالاسى مەن اياگوز قالاسىندا تاعى ەكى ءبىلىم ورداسى پايدالانۋعا بەرىلەدى.
وبلىس اكىمى اشىلۋ سالتاناتىنان سوڭ قوناقتارمەن بىرگە مەكتەپتىڭ كابينەتتەرى, كىتاپحاناسى, زەرتحانالارىن جانە شەبەرحانالارىن ارالاپ, سپورت زالدارى مەن فۋتبول الاڭىن كوردى. وقۋشىلارمەن, مۇعالىمدەرمەن پىكىرلەسىپ, جاڭا مەكتەپتەگى جاڭا قادامدارىنا ساتتىلىك تىلەدى.
وقۋشىلاردىڭ اتا-انالارى جاڭا ىقشام اۋداننىڭ ەكىنشى مەكتەپپەن تولىققانىنا ريزاشىلىقتارىن جەتكىزدى.
«جاڭا مەكتەپتىڭ سالىنۋى قاراعايلى تۇرعىندارىنىڭ كوپتەن بەرگى ارمانى ەدى. ىقشام اۋداننىڭ اتا-انالارى بالالارىن قالانىڭ تۇكپىر-تۇكپىرىندەگى مەكتەپتەرگە ءتۇرلى كولىكپەن تاسىپ, قينالىپ جۇرەتىن. ويتكەنى, قاراعايلىدا جالعىز عانا مەكتەپ بولدى. بۇگىن وسى ماسەلە شەشىمىن تاۋىپ, قۋانىشقا بولەنىپ وتىرمىز. جاڭا مەكتەپتە وقۋشىلارعا نە كەرەكتىڭ ءبارى بار. بارلىق جاعداي جاسالعان. وسىنداي مەكتەپ سالىپ بەرگەنى ءۇشىن پرەزيدەنتىمىزگە العىس ايتامىز», دەدى قاراعايلى ىقشام اۋدانىنىڭ تۇرعىنى باقتىلى قانافينا.
بۇدان كەيىن ايماق اكىمى بەرىك ءۋالي, «سامۇرىق قازىنا كونستراكشن» اق باسقارما توراعاسى ماۋلەن ايمانبەتوۆ بەسقاراعاي اۋدانىنداعى «جايلى مەكتەپ» ۇلتتىق جوباسى اياسىندا سالىنعان 300 ورىندىق مەكتەپتىڭ اشىلۋ راسىمىنە قاتىستى. سالتاناتتى جيىنعا ءبىلىم سالاسىنىڭ ارداگەرلەرى جانە اتا-انالار قاتىستى.
وندا دا وقۋشىلاردىڭ جان-جاقتى ءبىلىم الۋىنا بارلىق جاعداي جاسالعان. زاماناۋي قۇرال-جابدىقتارمەن قامتىلعان وقۋ ورنىندا قازىر 57 مۇعالىم ەڭبەك ەتەدى. 22 وقۋ كابينەتى, مۋلتيمەديالىق جانە جاراتىلىستانۋ-عىلىمي پاندەرگە ارنالعان زەرتحانالار, سپورت جانە شىعارماشىلىق ۇيىرمەلەرى جۇمىس ىستەيدى. 120 ورىندىق اسحانا, 100 ورىندىق ءماجىلىس زالى, ينتەراكتيۆتى پانەلدەر, پاندىك كابينەتتەر, كىتاپحانا, وقۋ زالى بار. سپورتپەن شۇعىلدانۋعا ارنالعان زالدار مەن اشىق الاڭدار, ۆوركاۋت ايماقتارى, دومبىرا ۇيىرمەسى سياقتى قوسىمشا ءبىلىم بەرۋ باعىتتارى قاراستىرىلعان. ەرەكشە ءبىلىم بەرۋ قاجەتتىلىكتەرى بار بالالارعا ارنالعان ينكليۋزيۆتى ورتا دا ەسكەرىلگەن: پاندۋستار, تاكتيلدى جولدار, ارنايى سانيتارلىق توراپتار ورناتىلعان.
اۋدان ورتالىعىنداعى قايرات رىسقۇلبەكوۆ اتىنداعى ورتا مەكتەپتىڭ وقۋشىلارى بۇعان دەيىن بالاباقشاعا بەيىمدەلگەن عيماراتتا وقىپ كەلسە, ەندى ولار جاڭا مەكتەپكە ءبىلىم الادى.
ايماق باسشىسى مەكتەپتىڭ اشىلۋ سالتاناتىندا سويلەگەن قۇتتىقتاۋ سوزىندە ءبىلىم ورداسىنىڭ بەسقاراعاي اۋىلىنىڭ تۇرعىندارى ءۇشىن ماڭىزى زور ەكەنىن جەتكىزدى.
«مەملەكەت باسشىسى اتاپ وتكەندەي, ءاربىر وقۋشىنىڭ ساپالى ءبىلىم الۋىنا مەملەكەت تاراپىنان قازىرگى تاڭدا بارلىق جاعداي جاسالىپ جاتىر. «جايلى مەكتەپ» جوباسى ەل يگىلىگىنە, ءبىلىم مەن عىلىمدى شىڭداۋعا باعىتتالعان باعدارلاما. بۇگىن, مىنە, وبلىسىمىزدا ەكى بىردەي جاڭا مەكتەپ پايدالانۋعا بەرىلدى. بۇل وقۋشىلار ءۇشىن, اتا-انالار ءۇشىن, مۇعالىمدەر ءۇشىن ۇلكەن مەرەكە, ايتۋلى كۇن. ءبىز بۇل باعىتتاعى جۇمىستى جالعاستىرا بەرەمىز. وڭىردەگى مەكتەپتەر كەزەڭ-كەزەڭمەن جاڭعىرىپ, جاڭارتىلادى», دەدى وبلىس اكىمى.
ايماق باسشىسى اشىلۋ سالتاناتىنان كەيىن قوناقتارمەن بىرگە مەكتەپتىڭ كابينەتتەرى, كىتاپحاناسى, زەرتحانالارىن جانە شەبەرحانالارىن ارالاپ, سپورت زالدارى مەن فۋتبول الاڭىن كوردى. وقۋشىلارمەن, مۇعالىمدەرمەن پىكىرلەسىپ, جاڭا مەكتەپتەگى جاڭا باستامالارعا ساتتىلىك تىلەدى.
اباي وبلىسى
