نازىم قىزايباي ۇلتتىق ۇلان ساپىندا 2014 جىلدان بەرى قىزمەت اتقارىپ كەلەدى. ول – ءىىم ۇلتتىق ۇلاننىڭ سپورت كومانداسىن دايارلاۋ ورتالىعىنىڭ اعا مامانى.
ۇلاندىق سپورتشى جاقىندا قازاق بوكسى تاريحىن جاڭارتتى. سەربيانىڭ نيش قالاسىندا وتكەن الەم چەمپيوناتىندا كەزەكتى جەڭىسىنە قول جەتكىزىپ, ءۇش دۇركىن جاھان ۇزدىگى اتاندى. ول 2014, 2016 جىلدارى دا الەم بىرىنشىلىگىندە توپ جارعان ەدى. مۇنداي جەتىستىككە تەك ايەلدەر ەمەس, ەرلەر اراسىندا دا بىردە-ءبىر بوكسشىمىز جەتكەن ەمەس.
كەزدەسۋ بارىسىندا ۇلاندىق بوكسشى ارىپتەستەرىنىڭ قۇرمەتىنە بولەندى. «وڭتۇستىك» وڭىرلىك قولباسشىلىعىنىڭ قولباسشىسى تالاپكەر امىرەەۆ چەمپيون قىزعا العىسحات پەن گۇل شوعىن, ەستەلىك سىي-سياپات تابىستادى. ەلىمىزدىڭ قۇقىقتىق ءتارتىپ اسكەرىنىڭ نامىسىن حالىقارالىق دەڭگەيدەگى سايىستاردا ابىرويمەن قورعاپ جۇرگەنى ءىزىن باسقان ارىپتەستەرىنە ۇلگى ەكەنىن جەتكىزدى.
ن.قىزايباي ساربازدار مەن ساردارلارعا كورسەتكەن ءىلتيپاتى مەن جىلى لەبىزدەرى ءۇشىن العىس ءبىلدىردى. «بۇگىنگى كەزدەسۋ وتە قىزىقتى ءوتتى. ۇلتتىق ۇلان ءار كەز قولداۋ ءبىلدىرىپ كەلەدى. ماعان بۇل – ۇلكەن دەمەۋ ءارى مارتەبە. ونى جوعارى باعالايمىن. الداعى ۋاقىتتا دا سىزدەردى جارقىن جەڭىستەرىممەن قۋانتۋعا بارىمدى سالامىن», دەدى ءۇش دۇركىن الەم چەمپيونى. نازىم ابايقىزى اسكەري ءبولىمنىڭ قۇرمەتتى قوناقتار كىتابىنا ەستەلىك قولتاڭبا قالدىردى.
