جامبىل وبلىستىق مادەنيەت جانە تىلدەردى دامىتۋ باسقارماسىنىڭ ۇيتقى بولۋىمەن تاراز قالالىق مادەنيەت ۇيىندە ۇيىمداستىرىلعان ءىس-شارادا ۇلتتىق كينونى قولداۋ ورتالىعى تۇسىرگەن «جامبىل. جاڭا ءداۋىر» ءفيلمى كورسەتىلدى. تاريحي بايوپيكتىڭ ستسەناريسى ءارى قويۋشى-رەجيسسەرى – جاندوس قۇسايىنوۆ. شىعارماشىلىق توپ تۋىندىعا كىرىسپەس بۇرىن ارحيۆتەردى اقتارعانىن ەسكەرۋ كەرەك. ول ءۇشىن ءتىپتى ماسكەۋدەگى مۇراعاتتار زەرتتەلگەن.
«تاريحىڭدى بىلمەسەڭ, كەلەشەكتى بولجاي المايسىڭ» دەگەن ءسوز بار. ءبىزدىڭ دە جامبىل وبلىسىندا «جامبىل. جاڭا ءداۋىر» ءفيلمىن ۇسىنۋىمىز بەكەر ەمەس. بيىل 6 جىلدىعىن اتاپ وتكەن ۇلتتىق كينو ورتالىعىنىڭ نەگىزگى ميسسياسى – وتكەننەن سىر تارتىپ, وسىنداي تاريحي تۇلعالارىمىزدىڭ جارقىن مۇراسىن جاس ۇرپاققا ناسيحاتتاۋ. فيلم اتى ايتىپ تۇرعانداي, قازاق اۋىز ادەبيەتىنىڭ ايتۋلى تۇلعاسى, جىر الىبى جامبىل جاباەۆ تۋرالى. فيلمدە اقىننىڭ ومىرىنە اسەر ەتكەن ايتۋلى وقيعالار سۋرەتتەلگەن. اتاپ ايتقاندا, اقىندار سلەتى, اقىن ولەڭدەرىنىڭ باسپاسوزدە جاريالانۋى. سونداي-اق جامبىل جاباەۆتىڭ وراز جاندوسوۆپەن جانە باسقا دا كورنەكتى قايراتكەرلەرمەن كەزدەسۋى كورسەتىلەدى. بۇل ءىس-شارا ەلىمىزدىڭ وزگە وڭىرلەرىندە دە جالعاسادى. ءبىزدىڭ ماقسات – اۋىل-ايماقتاعى كورەرمەندى وتاندىق كينومىزبەن, ورتالىقتىڭ فيلمدەرىمەن تانىستىرۋ», دەدى ۇلتتىق كينونى قولداۋ ورتالىعىنىڭ باسقارما توراعاسى قۇرمانبەك جۇماعالي.
ورتالىق باسشىسى اتاپ وتكەندەي, بۇل ءۇردىس ەلىمىزدىڭ وزگە قالالارى مەن اۋىلدىق وكرۋگتەرىندە دە ۇيىمداستىرىلادى دەپ جوسپارلانىپ وتىر. باستاما اياسىندا ەل تاريحى مەن مادەنيەتىن ايشىقتايتىن فيلمدەردى تانىستىرۋ جالعاسادى. ماسەلەن, كينو كۇندەرى اياسىندا كورسەتىلەتىن «قاجىمۇقان» ۇلتتىق رۋحىمىزدى اسقاقتاتسا, «دوس-مۇقاسان» ءفيلمى ارقىلى تۇلعالاردىڭ ءجۇرىپ وتكەن جولىنا قانىعۋعا مۇمكىندىك بەرىلەدى. «نابات وپەراتسياسى», «ۆرەميا پاتريوتوۆ» قۇقىق قورعاۋشىلاردىڭ ەڭبەگىن كورسەتىپ, وتانعا دەگەن سۇيىسپەنشىلىكتى ارتتىرادى. «باۋىرىنا سالۋ» دەپ اتالاتىن كينودا ۇلتتىق ءداستۇر دارىپتەلەدى. كىشكەنتاي كورەرمەندەرگە ارنالعان «تايقازان» دەپ اتالاتىن انيماتسيالىق فيلم, «الماتى, مەن سەنى جاقسى كورەمىن!», «سوڭعى ۇكىم», «دالا قاسقىرى», «توقتا, ءتۇن», «شۋلاما» فيلمدەرىنىڭ دە كورەرمەنىنە ايتار ويى بار.
