اۋقىمدى پەداگوگيكالىق جيىنعا وقۋ-اعارتۋ مينيسترلىگى ورتا ءبىلىم كوميتەتى توراعاسىنىڭ ورىنباسارى جومارت قارامباەۆ, «قازاقستان حالقىنا» قوعامدىق قورىنىڭ باسقارۋشى ديرەكتورى سەرىكبەك ەلشىبەكوۆ جانە ءبىلىم بەرۋدى تۇراقتى دامىتۋ قورى قامقورشىلىق كەڭەسىنىڭ ءتورايىمى كۇلاش ءشامشيدينوۆا قاتىستى.
مۇعالىمدەرمەن كەزدەسۋ بارىسىندا NIS باسقارما توراعاسىنىڭ ورىنباسارى جانبوتا كابدىكاريموۆا پرەزيدەنت قاسىم-جومارت توقاەۆتىڭ 2019 جىلعى جولداۋىندا ايتىلعان ماڭىزدى مىندەتتەردىڭ ءبىرى – قالا مەن اۋىل اراسىنداعى ورتا ءبىلىم ساپاسىنداعى الشاقتىقتى ازايتۋ قاجەتتىگىن ەسكە سالدى.
«مەملەكەت باسشىسى بۇل الشاقتىقتىڭ باستى سەبەپتەرىنىڭ ءبىرى رەتىندە اۋىلدىق جەرلەردەگى بىلىكتى پەداگوگتەردىڭ تاپشىلىعىن اتاپ وتكەن بولاتىن. وسى جاعداي NIS-ءتىڭ اۋىل مەكتەپتەرىن قولداۋعا ارنالعان اۋقىمدى جوباسىن باستاۋعا تۇرتكى بولدى. ەگەر جوبانىڭ باستاپقى كەزەڭىندە تەك 5 مەكتەپ قامتىلسا, قازىر ولاردىڭ سانى 135-كە جەتتى. ال جىل سوڭىنا دەيىن 200-گە جۋىق اۋىل مەكتەبىن قامتۋ جوسپارىمىزدا بار. سونداي-اق تىرەك مەكتەپتەردىڭ مۇعالىمدەرى زاماناۋي تسيفرلىق مۇمكىندىكتەردى پايدالانا وتىرىپ, «كاسىبي ۇستاز» ونلاين پلاتفورماسى ارقىلى باسقا وڭىرلەردەگى ارىپتەستەرىمەن كاسىبي تاجىريبە الماسۋدى جولعا قويعان», دەيدى جانبوتا جەتىلبەكقىزى.
اۋىل مەكتەپتەرىن دامىتۋداعى تىرەك مەكتەپتەردىڭ ماڭىزى تۋرالى ءبىلىم بەرۋدى تۇراقتى دامىتۋ قورى قامقورشىلىق كەڭەسىنىڭ ءتورايىمى كۇلاش ءشامشيدينوۆا دا ەرەكشە اتاپ ءوتتى:
«بۇل جوبانىڭ ەكى نەگىزگى ماقساتى بار. ءبىرىنشىسى – زاماناۋي ستاندارتتارعا ساي ساپالى ءبىلىم بەرۋ, ال ەكىنشىسى – وقۋشىلاردا بولاشاقتا قاجەت بولاتىن داعدىلاردى قالىپتاستىرۋ. تىرەك مەكتەپتەر تەك جاقسارتىلعان ينفراقۇرىلىمنىڭ ارقاسىندا عانا ەمەس, ادامي كاپيتالدى دامىتۋ باعىتىنداعى جۇيەلى جۇمىستىڭ ناتيجەسىندە دە دامۋ ورتالىعىنا اينالىپ وتىر. ولار ءوز اينالاسىنداعى باسقا اۋىل مەكتەپتەرىن بىرىكتىرىپ, تاجىريبە الماسۋعا, مۇعالىمدەردىڭ كاسىبي دەڭگەيىن كوتەرۋگە ىقپال ەتەدى», دەدى ول.
NIS كومانداسى اۋىلدىق تىرەك مەكتەپتەردىڭ 500-گە جۋىق ديرەكتورى مەن ءپان مۇعالىمدەرىنە ارنالعان مازمۇندى باعدارلاما ازىرلەدى. الداعى ەكى كۇن ىشىندە قاتىسۋشىلار شەبەرلىك ساباقتارى ارقىلى وزدەرىنىڭ يدەيالارى مەن تاجىريبەلەرىن ورتاعا سالادى. جيىن بارىسىندا مۇعالىمدەر بىرنەشە ماڭىزدى باعىتتاردى تالقىلايدى. اتاپ ايتقاندا, فۋنكتسيونالدىق جانە وقۋ ساۋاتتىلىعىن دامىتۋعا ارنالعان ءتيىمدى ستراتەگيالار, ءماتىندى تەرەڭ تالداۋعا نەگىزدەلگەن شاعىن جوبالاردىڭ ماڭىزى, STEM-تەحنولوگيالارىن پاندىك وقىتۋعا ەنگىزۋ تاسىلدەرى, سونداي-اق ومىرلىك جاعداياتتارعا بەيىمدەلگەن تاپسىرمالاردى قۇراستىرۋ جولدارى ءسوز بولادى.
ايتا كەتەيىك, «اۋىلدىق جەرلەردەگى تىرەك مەكتەپتەردىڭ الەۋەتىن ارتتىرۋ» جوباسىندا «نازارباەۆ زياتكەرلىك مەكتەپتەرىنىڭ» نەگىزگى ءرولى – پەداگوگتەرگە ادىستەمەلىك قولداۋ كورسەتۋ. بۇل باعىت اياسىندا مۇعالىمدەردىڭ كاسىبي قاجەتتىلىكتەرىن انىقتاۋ, ساباقتارعا قاتىسىپ, باقىلاۋ جۇرگىزۋ جانە كەرى بايلانىس بەرۋ, وقىتۋ كۋرستارىن ۇيىمداستىرىپ, وتكىزۋ, وقىتۋ اياقتالعاننان كەيىن دە ادىستەمەلىك قولداۋ ءبىلدىرۋ, وقۋشىلاردىڭ ءال-اۋقاتىنا بايلانىستى ماسەلەلەردى بىرلەسە شەشۋ, سونداي-اق مۇعالىمدەردىڭ زياتكەرلىك مەكتەپتەر بازاسىندا تاعىلىمدامادان وتۋىنە مۇمكىندىك جاساۋ سەكىلدى ماڭىزدى مىندەتتەر كوزدەلگەن.
جوبانىڭ اۋىل مەكتەپتەرىن دامىتۋداعى وڭ اسەرىن كورسەتەتىن جارقىن مىسالداردىڭ ءبىرى – ۇلىتاۋ وبلىسى, ۇلىتاۋ اۋدانىنداعى №1 تىرەك مەكتەبى. وقۋ ورداسىنىڭ مۇعالىمدەرى ءتۇرلى ءبىلىم بەرۋ بايقاۋلارىنا بەلسەنە قاتىسىپ, جوعارى ناتيجەلەرگە قول جەتكىزىپ ءجۇر. سونداي-اق ءوز تاجىريبەلەرىن رەسپۋبليكالىق دەڭگەيدە ءبولىسىپ وتىر.
ينفورماتيكا ءپانى مۇعالىمى مارجان احانوۆا قازىرگى تاڭدا مۇعالىم ءۇشىن كاسىبي دامۋدىڭ مۇمكىندىكتەرى شەكسىز ەكەنىن ايتادى. ونىڭ پىكىرىنشە, قازىرگى زامانعى مەكتەپتەر تەك ءبىلىم بەرىپ قانا قويماي, وقۋشى مەن ۇستازعا شابىت بەرەدى.
«شاكىرتتەرىمىز رەسپۋبليكالىق جانە حالىقارالىق بايقاۋلاردا جەڭىسكە جەتىپ, ءبىلىم گرانتتارىن يەلەنىپ ءجۇر. سوڭعى ءۇش جىل قاتارىنان مەكتەبىمىز وبلىستا «ۇزدىك وليمپيادالىق كوماندا» اتاعىن الىپ ءجۇر. ال مەنىڭ «قازاقستان ۇستازى» ۇلتتىق سىيلىعىنىڭ 50 ءفيناليسى قاتارىنا ەنۋىم – وسى جوبانىڭ ارقاسىندا تۋعان مۇمكىندىكتەردىڭ ناتيجەسى», دەپ اتاپ ءوتتى مارجان احانوۆا.
ەسكە سالا كەتەيىك, رەسپۋبليكالىق ينتەنسيۆ «اۋىلدىق جەرلەردەگى تىرەك مەكتەپتەردىڭ الەۋەتىن ارتتىرۋ» جوباسى اياسىندا ءوتىپ جاتىر. بۇل قايىرىمدىلىق باستاما وقۋ-اعارتۋ مينيسترلىگىنىڭ قولداۋىمەن «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى, ءبىلىم بەرۋ سالاسىن تۇراقتى دامىتۋ قورى جانە «قازاقستان حالقىنا» قوعامدىق قورىنىڭ سەرىكتەستىگىمەن جۇزەگە اسىپ وتىر.
