سۋرەتتى تۇسىرگەن – جۇماباي مۇسابەك
وڭىردە كەيىنگى جىلدارى بىرنەشە ەمحاناعا جاڭعىرتۋ جۇمىستارى جۇرگىزىلدى. كەيبىر شالعاي اۋىلدار جاڭا مەديتسينالىق نىسانعا قول جەتكىزدى. وتەنايلىقتار وسى كۇنگە دەيىن ىرگەتاسى 1986 جىلى قالانعان ەسكى عيماراتتا ەم قابىلداپ ءجۇردى. مۇندا ساپالى مەديتسينالىق كومەك الۋ, دارىگەرگە قارالۋ, جاتىپ ەم قابىلداۋ جاعى دۇرىس قاراستىرىلماعان. سوندىقتان وكرۋگتەگى 17 مىڭنان اسا حالىقتىڭ تەڭ جارتىسى قالالىق اۋرۋحانالاردا تىركەلگەن. جىلدان جىلعا تۇرعىن سانىنىڭ ارتۋىنا بايلانىستى ايماققا دارىگەرلىك امبۋلاتوريانىڭ قاجەتتىلىگى تۋىنداپ وتىر.
«اۋىلىمىزدا زاماناۋي امبۋلاتوريانىڭ اشىلاتىنىنا حالىق ءدان ريزا. ەندى اۋىل تۇرعىندارى تالدىقورعانعا, قالالىق ەمحانالارعا بارىپ اۋرە بولمايدى. قۇرىلىستىڭ 80%-ى اياقتالدى. ساپالى ءجۇرىپ جاتقانىنا ءجىتى كوز جەتكىزىپ, نىسان قولدانىسقا بەرىلگەن كۇنگە دەيىن پارتيالىق باقىلاۋدا ۇستايتىن بولامىز», دەيدى وبلىستىق ءماسليحاتتىڭ دەپۋتاتى قايرات كەرەەۆ.
باس مەردىگەر «جاركەنت العىر» جشس-مەن وتكەن جىلى كەلىسىمشارت جاسالعان. بۇگىندە قۇرىلىس الاڭىندا 20-25 مامان ەڭبەك ەتىپ ءجۇر. جوسپار بويىنشا امبۋلاتوريا 2025 جىلدىڭ مامىر ايىندا پايدالانۋعا بەرىلەدى.
جاڭا ەمحانا وتەناي اۋىلىنان بولەك, «ىنتىماق», «جاستار-1», «جاستار-1/1», «جاستار-2» تۇرعىن ءۇي الابىنىڭ حالقىنا دا قىزمەت ەتپەك. ايتا كەتەلىك, وڭىردە اۋىلدىق جەرلەردەگى مەديتسينا قۇرىلعىلارىن دامىتۋ جۇمىستارى دا ءجۇرىپ جاتىر. وبلىستىق دەنساۋلىق ساقتاۋ باسقارماسىنىڭ وكىلدەرى شەتەلدىك ارىپتەستەرىمەن تىعىز بايلانىس ورناتقان. ونداعى ماقسات – وپەراتسيا جاساۋدىڭ جاڭا ادىستەرىن ۇيرەنۋ. ماسەلەن, وبلىستىق ونكولوگيالىق كلينيكا بازاسىندا يزرايلدەن كەلگەن حالىقارالىق مامانداردىڭ قاتىسۋىمەن HIPEC اپپاراتىمەن وپەراتسيا جاساۋ جونىندە شەبەرلىك ساباعى ءوتتى. دارىگەرلەردى HIPEC تاسىلىمەن ەمدەۋدى ۇيرەتۋگە يزرايلدەن «حايم شيبا» مەديتسينالىق ورتالىعىنىڭ حيرۋرگيا جانە حيرۋرگيالىق ونكولوگيا ءبولىمىنىڭ اعا حيرۋرگى, مەديتسينا عىلىمدارىنىڭ دوكتورى الموگ بەن-يااكوۆ كەلدى. سونداي-اق كومپانيانىڭ وكىلى, ينجەنەر ۆياچەسلاۆ يۆانوۆ تا وپەراتسياعا قاتىستى. شەتەلدەن كەلگەن بىلىكتى مامانداردى ەمحانا دارىگەرلەرىنە كلينيكانىڭ ديرەكتورى ماديار ومىرباەۆ تانىستىردى.
تاجىريبەدە ونكولوگيا ماماندارى گيپەرتەرميالىق ينتراپەريتونەالدى حيميالىق تەراپيا تەحنولوگياسى ارقىلى ءسۇت بەزى, اسقازان, توق ىشەك وبىرىن ارالاس ەمدەۋدىڭ جاڭا, جوعارى تەحنولوگيالىق ءادىسىن كورسەتتى. وبلىستىق ونكولوگيالىق كلينيكا گيپەرتەرميالىق ينتراپەريتونەالدى حيميوپەرفۋزيا ءادىسىن العاش قولدانعان وڭىرلىك ونكولوگيالىق ورتالىق. وبلىس اكىمدىگى مەن دەنساۋلىق ساقتاۋ باسقارماسىنىڭ قولداۋىمەن 2024 جىلدىڭ قازان ايىندا جاڭا مەديتسينالىق جابدىق HIPEC اپپاراتى ساتىپ الىنعان ەدى. گيپەرتەرميالىق ينتراپەريتونەالدى حيميوتەراپيا – ونكولوگيانى ەمدەۋدىڭ يننوۆاتسيالىق ءادىسى. ول بارلىق ىسىك وشاعىن حيرۋرگيالىق تاسىلمەن الىپ تاستاپ, ءىش قۋىسىنا 42-43 °C دەيىن قىزدىرىلعان حيميالىق پرەپارات ەنگىزەدى. ول پەريتونەالدى كانتسەروماتوزعا (راك كلەتكالارىنىڭ زاقىمدانۋى) قولدانىلادى. HIPEC پايدا بولعاننان كەيىن وپەراتسيا جاساۋعا جاتپايدى دەپ سانالعان قاتەرلى ىسىكتى ەمدەۋ مۇمكىن بولادى.
الموگ بەن-يااكوۆ جۋرناليستەرگە بەرگەن سۇحباتىندا كلينيكاعا كەلگەندە وپەراتسيا جاساۋعا مۇمكىندىك بار ما ەكەن دەپ قوبالجىعانىن جاسىرمادى. بىراق قاتەرلى ىسىككە زاماناۋي تاسىلمەن وپەراتسيا جاساۋعا كىرىسكەندە بارلىق قۇرال-جابدىق, مۇمكىندىكتىڭ تالاپقا ساي ەكەنىن كورىپ قۋانعانىن, وپەراتسيانىڭ ءساتتى جاسالعانىن ايتتى.
ء«بىر ءۇيدىڭ بالاسىنداي تۇسىنىستىكتە, ىنتىماقتا, سىيلاستىقتا جۇمىس ىستەيتىن ۇجىمدا, ورتادا عانا ەم ناتيجە بەرەدى. مينيسترلىك, باسقارما, كلينيكا ءبىر-ءبىرىن جارتى سوزدەن تۇسىنىسەدى. ەم جاساۋعا كەلگەندە بىلەك سىبانا كىرىسەدى. بارلىعىنىڭ ماقساتى – وبىرعا شالدىققان ادامدارعا كومەكتەسسەك دەگەن وي», دەيدى ا.بەن-يااكوۆ.
حالىقارالىق دارەجەدەگى شەبەرلىك ساعاتى دارىگەرلەرگە ۇزىلگەن ءۇمىتتى ۇشتايتىن ءادىستى ۇيرەتتى. جاڭا ءتاسىل قاتەرلى ىسىكتى ەمدەۋگە بارىنشا مۇمكىندىك تۋعىزادى دەگەن سەنىم بار.
جەتىسۋ وبلىسى
