فوتو: جوعارعى سوت
دەپۋتاتتىڭ دەرەگىنشە, 2023 جىلدىڭ باسىنان بەرى ءبىلىم بەرۋ سالاسىندا 303 قىلمىستىق ءىس تىركەلىپ, جالپى شىعىن 17,5 ملرد تەڭگەنى قۇراعان. كوپ قارجى جىمقىرۋ فاكتىسى جەتىسۋ, تۇركىستان, قىزىلوردا, الماتى وبلىسىندا جانە الماتى قالاسىندا انىقتالعان.
وسى باعىتتا 249 ادام جاۋاپكەرشىلىككە تارتىلعان. ولاردىڭ اراسىندا 10 ءبىلىم ءبولىمىنىڭ باسشىسى, 2 كوللەدج ديرەكتورى, 28 مەكتەپ ديرەكتورى, 21 بالاباقشا باسشىسى جانە 136 ەسەپشى بار.
تەمىر قىرىقباەۆ پەداگوگيكالىق كادردى ىرىكتەۋدىڭ جاڭا ەرەجەسى ەنگىزىلگەنىنە قاراماستان مەكتەپكە قىزمەتكە تۇرۋ ءۇشىن زاڭسىزدىققا بارۋ فاكتىلەرى تىيىلماي تۇرعانىن اتاپ ءوتتى.
«حالىق اراسىندا مەكتەپكە جۇمىسقا ورنالاسۋ ءۇشىن ديرەكتورعا نەمەسە باسقارما قىزمەتكەرىنە «زاڭسىز سىياقى» بەرۋ قاجەت دەگەن قاۋەسەت جەلدەي ەسىپ ءجۇر. ويتكەنى وڭتۇستىك وڭىردە جۇمىسسىزدىق ستاتيستيكادا كورسەتىلگەننەن الدە قايدا جوعارى. اۋىلدىق جەرلەردە مەكتەپ, بالاباقشا, كلۋب ۇيىنەن باسقا جۇمىس كوزى تاپشى. سوندىقتان مۇعالىم بولۋعا تالپىناتىندار تىم كوپ. ءتىپتى لابورانت نەمەسە تەحنيكالىق قىزمەتكەر بولۋ ءۇشىن دە زاڭسىز اقشا بەرۋ جاعدايلارى كەزدەسەدى. سونىمەن قاتار, قىزمەتكەرلەردىڭ جۇمىستان شىقپاۋ ءۇشىن جالاقىسىنىڭ ءبىر بولىگىن بەرۋ فاكتىلەرى تۋرالى دا ايتىلىپ جاتىر. ال كاسىبي بىلىكتىلىگى تومەن مامانداردىڭ, ءتىپتى زاڭسىز جولمەن جۇمىسقا ورنالاسقانداردىڭ ساباق بەرۋى ءبىلىم جۇيەسىندەگى ادالدىق پەن كاسىبي ەتيكانىڭ بۇزىلۋىنا اكەلەتىنى انىق», دەدى دەپۋتات.
مۇعالىم – تەك ءبىلىم بەرۋشى عانا ەمەس, بولاشاق ۇرپاقتىڭ ادامگەرشىلىك قۇندىلىعىن قالىپتاستىرۋشى ەكەنىن ەسكەرگەن دەپۋتات ءبىلىم بەرۋ سالاسىنداعى كادرلاردى باسقارۋدىڭ بىرىڭعاي ەلەكتروندىق بازاسىن قۇرۋدى ۇسىندى.
«جۇمىسقا ورنالاسۋ پروتسەسىنىڭ اشىقتىعىن قامتاماسىز ەتىپ, پەداگوگيكالىق كادرلاردى ىرىكتەۋدىڭ اشىق جانە ءادىل جۇيەسىن قامتاماسىز ەتۋ قاجەت. قوعامدىق باقىلاۋدى كۇشەيتۋ ماڭىزدى. ياعني اتا-انالار كوميتەتى جانە باسقا قوعامدىق ۇيىمداردىڭ ءبىلىم بەرۋ پروتسەسىنە جانە قارجىلىق قىزمەتكە قاتىسۋىن كەڭەيتۋ كەرەك», دەدى ت. قىرىقباەۆ.
