شىعىس شاھارداعى ۇلتتى اعارتۋدىڭ شام-شىراعى بولىپ وتىرعان Shakarim University ءبىلىم مەن عىلىمنىڭ شەكاراسىن كەڭەيتىپ, حالىقارالىق ىنتىماقتاستىقتى نىعايتا ءتۇستى. قازاقستان پرەزيدەنتىنىڭ عىلىم جانە جوعارى ءبىلىم سالاسىندا قىتاي حالىق رەسپۋبليكاسىمەن ىنتىماقتاستىقتى دامىتۋ جونىندەگى ستراتەگيالىق باستاماسى اياسىندا Shakarim University مەن Northwest A&F University (NWAFU, قحر) اراسىندا ارىپتەستىك تۋرالى كەلىسىمگە قول قويدى.
اتالعان قۇجاتقا قول قويۋ بارىسىندا Northwest A&F University (قحر) اتىنان رەكتور ۋ پۋ-تە, ۆيتسە-رەكتور ما چجۋان, حالىقارالىق ىنتىماقتاستىق جانە الماسۋ كەڭسەسىنىڭ ديرەكتورى ۋاڭ چياۋلۋڭ, اگرونوميا كوللەدجىنىڭ دەكانى لي سيۋەتسزيۋن, زووتەحنيكا جانە مال شارۋاشىلىعى تەحنولوگيالارى كوللەدجىنىڭ دەكانى چيان يۋ, لاندشافتىق ساۋلەت جانە ونەر كوللەدجىنىڭ دەكانى گاو تيان, سونداي-اق حالىقارالىق ىنتىماقتاستىق جانە الماسۋ كەڭسەسى ديرەكتورىنىڭ ورىنباسارى چوۋ يۋفەن قاتىستى.
ال Shakarim University دەلەگاتسياسىنىڭ قۇرامىندا رەكتور دۋمان ورىنبەكوۆ, ينتەرناتسيونالداندىرۋ جانە يننوۆاتسيالار جونىندەگى پرورەكتور ەراسىل دۋلاتباي, عىلىمي زەرتتەۋلەردى ۇيىمداستىرۋ ورتالىعىنىڭ ۇيلەستىرۋشىسى ەرناز ەرمەكوۆ, زووتەحنيكا سالاسىنداعى قوس ديپلوم باعدارلاماسىنىڭ جەتەكشىسى گ ۇلىم قامزينا بولدى.
«شاكارىم ۋنيۆەرسيتەتى مەن Northwest A&F University (قحر) اراسىنداعى سەرىكتەستىك تۋرالى مەموراندۋم اياسىندا, مال شارۋاشىلىعى سالاسىندا قوس ماگيسترلىك ءبىلىم بەرۋ باعدارلاماسىن ىسكە قوسۋ تۋرالى كەلىسىم بەكىتىلدى. Northwest A&F University رەكتورى ۋ پۋ-تە مىرزاعا شىنايى العىسىمدى بىلدىرەمىن. ول بۇل سالاعا تەرەڭ قىزىعۋشىلىق تانىتىپ, بىرلەسكەن قادامدارعا ارقاشان دايار ەكەنىن كورسەتتى. يدەيالار قولداۋ تاپقاندا, سەرىكتەستەر ساپالى بىلىممەن قاتار ۇلكەن مۇمكىندىكتەرگە جول اشۋى – باعا جەتپەس قۇندىلىق», دەدى Shakarim University رەكتورى دۋمان ورىنبەكوۆ.
كەلىسىم قۇجاتىندا «مال شارۋاشىلىعى» باعىتى بويىنشا قوس ماگيسترلىك ديپلوم باعدارلاماسى; قىتايدىڭ جەتەكشى اگرارلىق ۋنيۆەرسيتەتىنىڭ عىلىمي-زەرتتەۋ رەسۋرستارىنا قولجەتىمدىلىك; ءبىلىم الماسۋ باعدارلامالارى, تاعىلىمدامالار مەن حالىقارالىق عىلىمي جوبالار سىندى تارماقتار قامتىلدى.
«ارىپتەستىك كەلىسىمدەردى بەكىتۋ – قازاقستاننىڭ حالىقارالىق ءبىلىم كەڭىستىگىنە ينتەگراتسيالانۋ جونىندەگى ۇلتتىق باسىمدىقتارىنا تولىق سايكەس كەلەدى. اۋىل شارۋاشىلىعى جانە اگرارلىق يننوۆاتسيالار سالاسىنداعى ءبىلىم مەن تەحنولوگيالار الماسۋى ستۋدەنتتەر مەن عالىمدارعا مال شارۋاشىلىعى سالاسىنداعى وزەكتى ماسەلەلەردى شەشۋگە مۇمكىندىك بەرەدى. ءبىز تاعى دا عىلىم مەن ءبىلىمنىڭ شەكاراسى جوق ەكەنىنە كوز جەتكىزىپ وتىرمىز. Northwest A&F University-مەن سەرىكتەستىك ءبىزدىڭ ستۋدەنتتەر مەن وقىتۋشىلارعا حالىقارالىق دەڭگەيدە مول تاجىريبە جيناۋعا, وزىق تەحنولوگيالاردى مەڭگەرۋگە جانە جاھاندىق عىلىمي ورتادا جۇمىس ىستەۋگە جول اشادى. قورىتىندىلاي كەلە, ۇزاق مەرزىمدى ءارى ناتيجەلى ىنتىماقتاستىقتىڭ باستاۋ العانىن ايتقىم كەلەدى», دەدى رەكتور.
