بۇل برەندتىڭ ارتىندا قانات يماتاەۆ پەن كيم يانا تۇر. وتباسىلىق جۇپ كاسىبىن 2023 جىلى اشقان. ولاردىڭ ماقساتى – جاي عانا حوش ءيىستى شامدار جاساۋ ەمەس, ۇلتتىق مادەنيەتتى دارىپتەۋ, قازاق رۋحانياتىن زاماناۋي تۇرعىدا تانىتۋ ەكەن.
– بۇل – جۇرەكتەن شىققان جوبا. ءبىز تەك ادەمى شامدار جاساۋدى ەمەس, مادەنيەتىمىزدى حوش ءيىس ارقىلى جاڭعىرتۋدى ماقسات ەتتىك. برەندتىڭ ەڭ العاشقى تۋىندىسى – قازاقى ويۋ-ورنەكپەن كومكەرىلگەن كەسەدەگى شام. ۇلتىمىزدىڭ قاراپايىم تۇرمىسىندا ماڭىزدى ورىن العان كەسە – ەندى تەك شاي ىشۋگە عانا ارنالىپ قويماي, جانعا جىلۋ سىيلايتىن شامعا دا اينالدى. بۇل ەرەكشە ءونىم كوپتىڭ كوڭىلىنەن شىعىپ, ۇلتتىق ناقىشتاعى ينتەرەر بۇيىمدارىن ۇناتاتىن جانداردىڭ سۇيىكتى دۇنيەسىنە اينالدى. ءبىرى ونى تۋعان جەرىن ەسكە الۋ ءۇشىن السا, ەندى ءبىرى قازاق مادەنيەتىمەن جاقىنىراق تانىسۋ ماقساتىندا ساتىپ الدى. كوبىنە شەتەلگە الىپ كەتىپ جاتادى. شامدارىمىزعا جاپونيا, اۋستراليا, يتاليا, سكانديناۆيا, نيدەرلاند سياقتى ەلدەردە سۇرانىس جوعارى, – دەيدى قانات يماتاەۆ.
بۇل شامدارىنىڭ باستى ەرەكشەلىگى – ەكولوگيالىق تازا ماتەريالداردان جاسالۋى. ولار تابيعي سويا مەن كوكوس بالاۋىزىنان قۇيىلادى. ياعني پارافين شامدارعا قاراعاندا زياندى ءتۇتىن شىعارمايتىن, ەكولوگيالىق تۇرعىدا قاۋىپسىز ءارى ۇزاق جاناتىن ءونىم. سونىمەن قاتار شامداردا اقش-تىڭ ەڭ ساپالى حوش ءيىستى مايلارى قولدانىلادى. ال ەڭ قىزىعى, ولاردىڭ ارقايسىسى قازاق دالاسىنىڭ, كوشپەندى ءومىر سالتىنىڭ, تابيعاتىمىزدىڭ ءبىر بولشەگىن بەينەلەيتىن مۇقيات تاڭدالعان كومپوزيتسيالاردان تۇرادى.
– ءبىز قىتايدان 100 تەڭگەگە الىپ, ونى قازاقستاندا 150 تەڭگەگە ساتۋدى كوزدەگەن جوقپىز. ءوز ءوندىرىسىمىزدى دامىتىپ, ساپالى ءونىم جاساۋدى, ۇلتتىق مادەنيەتىمىزدى دارىپتەۋدى ماقسات ەتتىك. ءبىزدىڭ ءداستۇرىمىز بەن مادەنيەتىمىز – وتە باي. ول مىڭداعان جىلدار بويى قالىپتاسقان. الەمگە ايگىلى «Hermes», «New Balance», «Cartier», «Gucci» سىندى برەندتەر ءوز كوللەكتسيالارىندا ورتالىق ازيانىڭ, سونىڭ ىشىندە ءبىزدىڭ كوشپەندى مادەنيەتىمىزدەن شابىت العان دەسەدى. ال سول الىپ اعاشتىڭ جاپىراعى رەتىندە ءوز مادەنيەتىمىزدى ناسيحاتتاۋ – ارقايسىمىزدىڭ بورىشىمىز. وتكەن جىلى كيىز ءۇي پىشىنىندەگى شام شىعارىلدى, ول حالىق اراسىندا ۇلكەن سۇرانىسقا يە بولدى. بيىل ناۋرىز مەرەكەسىنە وراي تۇيە پىشىنىندەگى شام جاسالدى. بۇل – قازاق حالقىنىڭ كوشپەلى تاريحىن, ءداستۇرىن بەينەلەيتىن ماڭىزدى سيمۆول, – دەيدى قانات.
