مامانداردىڭ باعالاۋىنشا, بيىلعى سۋ تاسقىنى كەزەڭى اۋا رايىنىڭ كۇردەلىلىگىنە قاراماستان, تۇراقتى ءوتىپ جاتىر.
كۇننىڭ كۇرت جىلىنۋى قاردىڭ ەرۋىن جەدەلدەتىپ, ەسىل, جاباي جانە نۇرا وزەندەرىندە مۇز قاباتىنىڭ السىرەۋىنە اكەلدى, بۇل قار سۋىنىڭ اعۋىن كۇشەيتتى.ەلدى مەكەندەردى سۋ باسۋ قاۋپىنىڭ الدىن الۋ ءۇشىن شۇعىل شارالار قابىلدانىپ جاتىر. قازىردىڭ وزىندە ءۇش ميلليون تەكشە مەتردەن استام قار شىعارىلىپ, 300 مىڭ تەكشە مەتر ەرىگەن سۋ سورىلدى. تۇرعىن ۇيلەردى قورعاۋ ماقساتىندا 25 مىڭ قاپ ينەرتتى ماتەريال توسەلدى. سونداي-اق, وزەندەردەگى مۇز كەپتەلىسىنىڭ الدىن الۋ ءۇشىن 25 مىڭ شارشى مەتر اۋماقتا جارۋ جۇمىستارى جۇرگىزىلدى. بۇل سۋ اعىسىنىڭ ەركىن قوزعالۋىنا جانە مۇز بوگەتتەرىنىڭ پايدا بولۋ قاۋپىن ازايتۋعا كومەكتەسەدى.
كوكتەمگى ەرىگەن قار سۋىنىڭ دەڭگەيى كوتەرىلۋى اۆتوجولدارعا دا اسەر ەتتى. الايدا, بيىلعى سۋ تاسقىنى ەلدى مەكەندەرگە قاۋىپ توندىرمەيدى. سۋ دەڭگەيى تومەندەگەننەن كەيىن قالپىنا كەلتىرۋ جۇمىستارى دەرەۋ جۇرگىزىلۋدە. مىسالى, ششۋچينسك – ستەپنياك – ءۋاليحانوۆ تاس جولىنداعى قوزعالىس قىسقا مەرزىمدە قالپىنا كەلتىرىلدى.
«قازگيدرومەت» مالىمەتىنشە, سۋ تاسقىنىنىڭ بەلسەندى كەزەڭى 24 ناۋرىزدان كەيىن باستالادى.
وسىعان بايلانىستى وبلىستاعى بارلىق كۇشتەر مەن تەحنيكا كۇشەيتىلگەن رەجيمگە اۋىستىرىلدى. قۇتقارۋ شارالارىنا استانا, قاراعاندى جانە الماتى وبلىستارىنان كەلگەن تجم بولىمشەلەرى مەن اقمولا وبلىسىنىڭ اۋماقتىق قورعانىس قىزمەتكەرلەرى جۇمىلدىرىلدى.
سۋ تاسقىنىنا قارسى ءىس-شارالار اۋا رايى جاعدايىنا جانە بولجامدارعا سايكەس ۋاقىتىلى تۇزەتىلىپ وتىرادى. جاعداي وڭىرلىك بيلىكتىڭ ەرەكشە باقىلاۋىندا.
