فوتو: «قازاۆتوجول» ۇق» اق
19 ناۋرىز ساعات 01:50 شاماسىندا اۋا تەمپەراتۋراسىنىڭ كوتەرىلۋى مەن قاردىڭ جىلدام ەرۋىنەن «استانا – شىدەرتى – پاۆلودار – ۋسپەنكا» رەسپۋبليكالىق اۆتوجولىنىڭ 217–218 شاقىرىمى ارالىعىنداعى جولدى سۋ باسىپ قالعان.
سۋ باسقان ۋچاسكەنىڭ جالپى ۇزىندىعى 100-150 مەترگە, ال سۋ بيىكتىگى 5-8 سم-گە جەتكەن.
«بۇل ۋچاسكە تومەن ورنالاسقاندىقتان, ەرىگەن قار سۋى وسى ايماققا شوعىرلانعان. 217-شاقىرىمدا ديامەترى 1×1 م بولاتىن سۋ وتكىزگىش قۇبىر بار, ول قازىرگى ۋاقىتتا اشىق جانە تازارتىلعان كۇيدە جۇمىس ىستەپ تۇر. تاسقىننىڭ ارى قاراي جايىلۋىنىڭ الدىن الۋ جانە سالدارىن بارىنشا ازايتۋ ماقساتىندا 200 توننا قۇم مەن 800 قاپ دايىندالدى, سونداي-اق 1 ەكسكاۆاتور, 1 تيەگىش, 3 ساموسۆال, 2 جول جوندەۋ قىزمەتىنىڭ تەحنيكاسى جانە دەۋ-60-تىڭ 30 قىزمەتكەرى جۇمىلدىرىلدى», دەلىنگەن «قازاۆتوجول» ۇق» اق حابارلاماسىندا.
بۇگىن ساعات 10:30-دا جولداعى كولىك قوزعالىسى قالىپىنا كەلتىرىلگەن. ماماندار جاعدايدى تۇراقتى باقىلاۋعا العان.
