– تاۋارلاردىڭ ەلەكتروندى كاتالوگى قانداي ماقساتتا قولعا الىندى؟
– باستى مىندەت – تاۋارلاردى ساتىپ الۋ ۇدەرىسىن جەڭىلدەتۋ جانە ولاردى تەز ءارى ىڭعايلى ەتۋ. اۋەلگىدە كاتالوگ تەك مەملەكەتتىك ساتىپ الۋعا قاتىسۋعا, ياعني اۆتوماتتى تۇردە كاتالوگتەن الىنعان تاۋارلارعا تەحنيكالىق سيپاتتامالاردى قالىپتاستىرۋ ءۇشىن جاسالعان بولاتىن. الايدا ءبىز دەرەكتەردى دۇرىس جانە تولىق سيپاتتاي وتىرىپ, تاۋار, جۇمىس جانە قىزمەتتەردىڭ بىرىڭعاي جىكتەلۋى مەن سايكەستىگىن قامتيتىن مەملەكەتتىك انىقتامالىقتىڭ نەمەسە كاتالوگتىڭ جوقتىعىنا بايلانىستى ماسەلەگە بىرنەشە رەت تاپ بولدىق. ارنايى تالداۋ كورسەتكەندەي, ءتۇرلى انىقتامالىقتار مەن كاتالوگتەر بار ەكەن.
– تەك جۇمىسى اياسىندا قانداي نەگىزگى ماقساتتارعا جەتۋدى كوزدەدى جانە ونىڭ تابىستىلىعىن ايقىندايتىن ناقتى ولشەم بار ما؟
– اتالعان ماسەلەنىڭ شەشىمىن ىزدەۋ بارىسىندا الدىمىزعا اۋقىمدى ماقسات قويىلدى: تسيفرلاندىرۋ ارقىلى تاۋاردى ءوندىرۋ/يمپورتتاۋ ساتىنەن باستاپ ونى تۇپكىلىكتى ساتۋعا دەيىنگى بارلىق تسيكلدىڭ اشىقتىعىن قامتاماسىز ەتۋ. جوبانىڭ تابىستى بولۋى تەك ءبىر تاۋار كاتالوگىن مەملەكەت پەن بيزنەستىڭ قولدانۋى ارقىلى انىقتالادى.
– كاتالوگ بيزنەس پەن مەملەكەتتىك ورگاندار ءۇشىن تاۋارلار تۋرالى اقپاراتتىڭ اشىقتىعى مەن قولجەتىمدىلىگىن ارتتىرۋعا قالاي اسەر ەتەدى؟ ناقتى مىسالدار كەلتىرە الاسىز با؟
– بۇل – بيزنەس ءۇشىن چەكتەردەگى تاۋار تۋرالى جانە بۋحگالتەرلىك جۇيەلەردە ەشف تۋرالى ناقتى ءارى تۇسىنىكتى اقپارات. كەي جاعدايدا چەكتە نە جازىلعانى تۇسىنىكسىز. ويتكەنى ءار دۇكەن تاۋارعا بايلانىستى تەرمينولوگيانى دەربەس جۇرگىزەدى. سونداي-اق تاۋار كاسىپورىنعا نەمەسە مەملەكەتتىك ورگانعا تۇسكەن كەزدە جۇيە اۆتوماتتى تۇردە تاۋاردى قايدا تىركەۋ كەرەگىن كورسەتىپ, كەمشىلىككە جول بەرمەيدى. بۇل ءوز كەزەگىندە مەملەكەتتىك ورگانعا ساتىلعان تاۋارلاردىڭ سانى مەن ولاردىڭ ەلدەگى باعاسى تۋرالى دەرەكتەردى كورۋگە مۇمكىندىك بەرەدى.
– وسىنداي تەتىكتى ەنگىزۋ ارقىلى زاڭنامادا نەمەسە ساتىپ الۋ تاجىريبەسىندە قانداي وڭ وزگەرىستەر بولۋى مۇمكىن؟
– بۇگىندە مەملەكەتتىك ساتىپ الۋلاردا «ەلەكتروندى دۇكەن» ءتاسىلى جولعا قويىلعان. بۇرىن وسىعان سايكەس ساتىلىم ۇدەرىسىنە تەك ءتورت سانات بويىنشا تاۋارلار قاتىسا الاتىن. قازىر كاتالوگتە ۇسىنىلعان بارلىق تاۋاردىڭ مەملەكەتتىك ساتىپ الۋعا قاتىسۋعا مۇمكىندىگى بار. سونداي-اق ەلەكتروندىق قارجى ورتالىعى بىرىڭعاي وپەراتور رەتىندە «ەلەكتروندى دۇكەن اگرەگاتورى» دەيتىن ساۋدا الاڭدارى ارقىلى ساتىپ الۋ تەتىگىن ازىرلەدى. بۇل ساتىپالىمدى 15 مينۋتقا دەيىن قىسقارتۋعا جول اشىپ, تاۋار كەلەسى كۇننىڭ وزىندە جەتكىزىلۋى مۇمكىن. مۇنىڭ ءبارى ادامنىڭ قاتىسۋىنسىز اۆتوماتتى تۇردە جۇزەگە اسىرىلادى.
– راحمەت.
اڭگىمەلەسكەن –
اباي ايماعامبەت,
«Egemen Qazaqstan»
