– نيكولاي سەرگەەۆيچ, ءسوز باسىن تۋعان جەر, وسكەن ورتاڭىزدان باستاساڭىز. مەديتسيناعا جۇرەك قالاۋىڭىزبەن كەلدىڭىز بە؟
– اۋىل – قازاقتىڭ التىن تامىرى, ۇلتىمىزدىڭ ۇيتقىسى عوي. سوندىقتان ءوزىم تۋىپ-وسكەن مەكەنىم وڭتۇستىك قازاقستان وبلىسى شاقپاق بابا اۋىلىن ماقتان ەتەمىن. كيەلى مەكەندە 14 جاسىما دەيىن اتا-اناممەن تۇردىم. دوستارىم ايان جانە راشيد ۇشەۋمىز اۋىلدىڭ شاڭىنا اۋناپ-قۋناپ, اۋىر جۇمىسقا ابدەن ىسىلىپ, مال باعىپ, ءشوپ شاۋىپ, كوكپار تارتىپ وستىك. اۋىلىمىزدا بارلىعى قازاق تىلىندە سويلەيتىن ەدى. سوندىقتان وتباسىمىزبەن قوناەۆ قالاسىنا قونىس اۋدارعانىمىزدا ورىس ءتىلىن مەڭگەرىپ, ەركىن سويلەۋ قيىنعا سوقتى. سەبەبى ورىس بولسام دا, جۇرەگىم «قازاق» دەپ سوققان ازاماتپىن. مەكتەپتەن سوڭ مەديتسينالىق كوللەدجگە ءتۇسىپ, وقۋىمدى ويداعىداي اياقتاعانىما دا بەس جىل تولىپ قالىپتى. ماماندىعىمدى اداسپاي تاڭداعانىما كۇندە قۋانامىن. مەديتسينا سالاسىندا ەڭبەك ەتەتىنىمدى كىشكەنتاي كەزىمنەن-اق بىلەتىنمىن. ويتكەنى دارىگەر, مەدبيكەلەردى كورگەنىمدە جۇرەگىم ەرەكشە سەزىمدە بولاتىن.
– ەڭبەك ەتەتىن بولىمشەڭىزدىڭ جۇمىس جايىن تارقاتا كەتسەڭىز.
– بولىمشەنىڭ قۇرامىنا رەنتگەنودياگنوستيكالىق كابينەت, فليۋوروگرافيالىق كابينەت, رەنتگەندىك كومپيۋتەرلىك توموگرافيا كابينەتى, ماگنيتتى-رەزونانستى توموگرافيا كابينەتى كىرەدى. بولىمشەدە جۇمىس ىستەيتىن دارىگەرلەر جاقىن جانە الىس شەت ەلدەردەگى ءىرى رەسپۋبليكالىق ورتالىقتاردا وقىعان. ءبولىم جەتەكشى الەمدىك وندىرۋشىلەردىڭ دياگنوستيكالىق جابدىقتارىنىڭ تولىق جيىنتىعىمەن جابدىقتالعان. جالپى, كەز كەلگەن ەمدەۋ ۇدەرىسىنىڭ ساپاسى ەڭ الدىمەن سەنىمدى جانە تولىق دياگنوزعا بايلانىستى عوي. سوندىقتان مەن جۇمىس ىستەيتىن بولىمشەدە دياگنوزعا ەرەكشە جاۋاپكەرشىلىكپەن قارايدى. ساۋلەلىك دياگنوستيكانىڭ جوعارى بىلىكتى دارىگەرلەرى مەن زاماناۋي رەنتگەنودياگنوستيكالىق اپپاراتۋرانىڭ بارلىق سپەكترى – دۇرىس دياگنوز قويۋداعى تابىستىڭ كەپىلى. ساۋلەلىك دياگنوستيكا – بۇل مەديتسيناداعى دەربەس ءبولىم, ول ساۋلەلەنۋدىڭ ءارتۇرلى تۇرلەرىن قولدانۋ نەگىزىندە دياگنوستيكالىق ماقساتتارعا كەسكىن الۋدىڭ ءارتۇرلى ادىستەرىن بىرىكتىرەدى.
– قازىرگى ورتاڭىزدا قانداي ەتنوس وكىلدەرىمەن ارالاسىپ تۇراسىز؟
– ۇجىمىمىز وتە ۇلكەن. مۇندا تاتار, وزبەك, ۇيعىر, كارىس, ۋكراين, باسقا دا ەتنوس وكىلدەرىمەن ءبىر وتباسىنىڭ بالالارىنداي ەڭبەك ەتەمىز. ءبىر-بىرىمىزگە باعىت بەرىپ, قامقور بولۋ, سۇرىنگەنگە سۇيەنىش, جىلاعانعا جۇبانىش بولۋدى باستى پارىزىمىز سانايمىز. مۇنداي اسىل قاسيەت پەن كەڭ پەيىل دارقان دالامىزدان, قازاقى قاسيەتتەن بويىمىزعا دارىدى.
كەيىنگى ۋاقىتتا قازاقشا سويلەيتىن ەتنوس وكىلدەرىنىڭ ايتارلىقتاي كوبەيگەنىن باستى جەتىستىگىمىز دەپ بىلەمىن. قازاقشا ءوزىم عانا ەمەس, ۇيدەگى اتا-انام, باۋىرىم, جۇبايىم ناستيا, قىزىم ەميليا دا سويلەيدى. مەملەكەتتىك ءتىل – انا ءتىلىمىز ءتارىزدى, ارقاشان قۇرمەتتەيمىز. قابىلداۋىما كەلگەن پاتسيەنتتەردىڭ قالاۋىنا قاراي ەكى تىلدە ەركىن تىلدەسەمىن.
ناۋرىز – ىرىس-ىنتىماعىمىز ارتىپ, ورتاق تاعدىر توعىستىرعان حالقىمىز ءبىر-بىرىنە شىنايى العىس سەزىمى مەن ريزاشىلىعىن بىلدىرەتىن ايتۋلى اي ەكەنى ءسوزسىز. ۇلت پەن ۇلىس اراسىنداعى ءوزارا قۇرمەت پەن سىيلاستىق ءبىزدى جاڭا بيىكتەر مەن بەلەستەرگە باستاي بەرەتىنىنە سەنىمىم مول. مۇمكىندىكتى پايدالانا وتىرىپ, تۋعان ەلىمە, جەرلەستەرىمە, ءوزىم ەڭبەك ەتىپ جۇرگەن اۋرۋحانانىڭ ديرەكتورى ايمان عالىمجانقىزىنا, ارىپتەستەرىمە, اتا-اناما, جاقىندارىما ەرەكشە العىسىمدى بىلدىرەمىن!
الماتى وبلىسى,
قوناەۆ قالاسى
