سۋرەتتەردى تۇسىرگەن – جۇماباي مۇسابەكوۆ
بىلىكتى سالا ماماندارى تاعدىردىڭ تاۋقىمەتىن تارتقان جاندارمەن تۇنگى ۋاقىتتا دا جۇمىس ىستەيدى. الەۋمەتتىك جوبانىڭ ماڭىزدىلىعى دا سول. ەم-شارالار ادەتتەگىدەي «اسار» مۇگەدەكتەرگە ارنالعان سپورتتىق-وڭالتۋ ورتالىعىنىڭ بازاسىندا وتەدى. يگىلىكتى ىسكە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى مۇرىندىق بولعان. «اسار» ورتالىعىنىڭ ديرەكتورى ەلدوس بايالىشباەۆتىڭ ايتۋىنشا, جوبا ورتالىققا وزدىگىنەن كەلە المايتىندار ءۇشىن اسا پايدالى.
ء«بىز جۇمىس بارىسىندا مۇگەدەكتىگى بار ادامداردىڭ كوپشىلىگىنە وڭالتۋ ورتالىعىنا كەلۋدىڭ قيىندىق تۋعىزاتىنىن بايقادىق. كۇندىزگى ۋاقىتتا كەيبىرەۋلەر جۇمىستا بولسا, كەيبىرىنە ۇيلەرىنەن ورتالىققا جەتۋ وڭاي ەمەس. سوندىقتان وسى كوشپەلى وڭالتۋ جوباسىن قولعا الدىق. ماڭىزدى باستامامىزعا وبلىس باسشىلىعى قولداۋ ءبىلدىردى», دەدى ە.بايالىشباەۆ.
جالپى, باعدارلامادا پاتسيەنتتەردىڭ ەكى توبى قامتىلعان. اتاپ ايتقاندا, كۇندىزگى شارالار وزدىگىنەن قوزعالا المايتىن ازاماتتارعا باعىتتالىپ وتىر. ساعات 21-دەن 23-كە دەيىن تۇنگى توپ جۇمىس ىستەيدى. بۇل ۋاقىت ارالىعىندا كۇندىز جۇمىستا بولاتىندىقتان ورتالىققا كەلە المايتىن مۇگەدەك ازاماتتارعا ەم-شارالارى جۇرگىزىلەدى. جوبانىڭ ەرەكشەلىگى سول, ماماندار پاتسيەنتتەردىڭ ۇيىنە بارىپ, ولارعا ساۋىقتىرۋ ماسساجى مەن ەمدىك جاتتىعۋلار جاساتادى. ءار سەانس شامامەن ءبىر ساعاتتى الادى, ءار پاتسيەنتپەن جەكە جۇمىس جۇرگىزىلەدى. كوشپەلى بريگادا قۇرامىندا ماسساجيست, ەمدىك دەنە شىنىقتىرۋ نۇسقاۋشىسى مەن جۇرگىزۋشى بار. بۇل رەتتە مامانداردىڭ جۇمىسىنا قولايلى جاعداي جاساۋ ماقساتىندا ارنايى تاڭبالانعان اۆتوكولىك ساتىپ الىنعان. تالدىقورعاندىق وتباسىلار كوشپەلى وڭالتۋ شارالارىنىڭ يگىلىگىن العاشقىلاردىڭ ءبىرى بولىپ كوردى.
«زايىبىم انار 11 جىل بۇرىن ينسۋلت الدى. ءۇشىنشى قاباتتا تۇرامىز, ارنايى كوتەرگىش جوق بولعاندىقتان, سىرتقا شىعۋ, وڭالتۋ ورتالىعىنا بارۋ قيىندىق تۋعىزادى. قازىر ۇيىمىزگە كەلىپ, وڭالتۋ قىزمەتىن كورسەتىپ جاتىر. بۇل بىزگە وتە قولايلى. مامانداردىڭ ءتيىستى ەم-شارالارىن جاساپ جاتقانىنا ون كۇندەي بولدى. وسى باستامانى ىسكە اسىرىپ جاتقان ازاماتتارعا العىس ايتامىز», دەدى ا.باسشىعۇلوۆانىڭ جۇبايى قانات قوسۋحانوۆ.
تالدىقورعان قالاسىندا ورنالاسقان ورتالىقتا نەگىزىنەن ومىرتقانىڭ ءتۇرلى جاراقاتىنان, ينسۋلتتان, بالالاردىڭ تسەرەبرالدى سالدىعى, ءى-ءىىى توپتاعى مۇگەدەكتىكتەن كەيىن وڭالتۋ جۇرگىزىلەدى. مەملەكەتتىك تاپسىرىس ارقىلى وبلىستىق بيۋدجەتتەن حالىقتىڭ جوعارىدا اتالعان توپتارىنداعىلارعا وسى ورتالىقتا تەگىن نەگىزدە وڭالتۋ قىزمەتتەرىن كورسەتۋ ءۇشىن 80 ملن تەڭگە بولىنگەن. جىلىنا 400-گە دەيىن ادام قابىلدايدى. مۇندا ادامنىڭ قايتادان اياعىنان تىك تۇرۋىنا كومەكتەسەتىن الەمنىڭ ءتۇرلى ەلىنەن اكەلىنگەن زاماناۋي جابدىقتار ورناتىلعان.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆتىڭ ايتۋىنشا, جوبا – تەڭ مۇمكىندىكتەر قوعامىن قالىپتاستىرۋعا جاسالعان يگى شارانىڭ ءبىرى. جىل سوڭىنا دەيىن وسىنداي قىزمەت تۇرىمەن 200-دەن استام ادامدى قامتۋ جوسپارلانعان. الداعى ۋاقىتتا كوشپەلى وڭالتۋ توبى وبلىس ورتالىعى ماڭىنداعى اۋداندارعا دا شىقپاقشى. جوبانى جۇزەگە اسىرۋعا جەرگىلىكتى بيۋدجەتتەن 30 ملن تەڭگە بولىنگەن. قاراجات جوباعا تارتىلعان ماماندارعا, ياعني كولىك جۇرگىزۋشى, ەمدىك دەنە شىنىقتىرۋ نۇسقاۋشىسى مەن ماسساجيست ماماننىڭ جالاقىسىنا جۇمسالادى.
«سپورتتىق-وڭالتۋ ورتالىعىنىڭ جوعارى تەحنولوگيالىق جابدىقتارى ەرەكشە. مىسالى, يسپاندىق ەكزوسكەلەت ادامعا قايتادان ءجۇرۋدى ۇيرەنۋگە كومەكتەسەدى. «بۇل سالماعى نەبارى 17 كگ بولاتىن مودەل, رەسەيلىك ءوندىرىس مودەلىنىڭ سالماعى – 46 كگ. ەلىمىزدە مۇنداي مودەل جوق, بۇل ۇلگى قوزعالىس داتچيكتەرىنىڭ فۋنكتسياسىنا يە. ترەناجەردىڭ قۇنى شامامەن 107 ملن تەڭگە», دەپ ءتۇسىندىردى ورتالىق ديرەكتورى.
زاماناۋي ەمدەۋ جابدىقتارىنىڭ تاعى ءبىرى – «لۋنا» كوپفۋنكتسيونالدى روبوتتانعان وڭالتۋ جۇيەسى. ەرەكشە ترەناجەر نەۆرولوگيالىق, ورتوپەديالىق پاتولوگياسى بار, باستان وتكەرگەن جاراقاتتارى مەن اۋرۋلارىنا بايلانىستى قوزعالىس بۇزىلىستارى بار ناۋقاستاردى ەمدەيدى. «اسار» ورتالىعىندا اقش, جاپونيا, گەرمانيا, يتاليا, ۇلىبريتانيا, يسپانيا, پولشادان اكەلىنگەن ەرەسەكتەر مەن بالالاردى وڭالتۋعا ارنالعان 30-دان استام ترەناجەر مەن ارنايى جابدىقتار بار.
ءوڭىر اكىمى ءباسپاسوز قىزمەتىنىڭ مالىمەتىنشە, وبلىستا مۇگەدەك جاندارعا ارنالعان عيماراتتاردى ينفراقۇرىلىممەن قامتاماسىز ەتۋ 69%-دى قۇراپ وتىر. بۇل – رەسپۋبليكاداعى ەڭ جوعارعى كورسەتكىش. بيىل مەملەكەتتىك جانە جەكەمەنشىك مەكەمەلەردىڭ شامامەن 195 نىسانىن بەيىمدەۋ جوسپاردا بار. وبلىس كولەمىندە قازىر ينۆاتاكسي سانى 32-گە جەتتى.
جەتىسۋ وبلىسى
