وبلىس ورتالىعىندا اۋەلى 80-نەن استام بالا العاش قاز باسسا, قالعان بالالاردىڭ سول ۋاقىتتا اۋدان-اۋدانداردا تۇساۋى كەسىلدى. وزگە ەلدى مەكەندەردەگى ءراسىمدى قالا حالقى ونلاين تۇردە تاماشالادى. مەرەكەلىك جيىن قىدىر اتا كەيپىندەگى قاريانىڭ كوپكە باتا بەرۋىمەن باستالدى. وسى كۇنى كەربۇلاق, كوكسۋ, قاراتال, ەسكەلدى, الاكول, سارقان اۋداندارىندا 30 بالادان, اقسۋ اۋدانى مەن تەكەلى قالاسىندا 20 بالادان – جالپى سانى 336 بالانىڭ قۋانىشىنا ەل كۋا بولدى. تۇساۋكەسۋ ءراسىمىن بالالاردىڭ جولى اشىق, قادامى نىق, ءومىرى ۇزاق بولسىن دەگەن نيەتپەن كوپكە سىيلى ارداگەرلەر, ونەر قايراتكەرلەرى, قالامگەرلەر, جۋرناليستەر, دارىگەرلەر, مەملەكەتتىك قىزمەتشىلەر, كاسىپكەرلەر, قوعامدىق بىرلەستىك وكىلدەرى, ت.ب. اتقاردى.
«ەلىمىزدە ءۇش جۇزدەن استام بالانىڭ تۇساۋىن ءبىر مەزگىلدە كەسۋ العاش رەت جەتىسۋ وبلىسىندا وتكىزىلىپ وتىر. سوندىقتان بۇل فاكت قازاقستاننىڭ رەكوردتار كىتابىنا ەنگىزىلدى», دەگەن رەكوردتاردى تىركەۋ كوميسسياسىنىڭ مۇشەسى باقىتجان تاستۇلەكوۆ ۇيىمداستىرۋشىلارعا ارنايى سەرتيفيكات ۇسىندى.
كوپبالالى انا, ۇشەمدەردى ومىرگە اكەلگەن سەنباي تۇرسىنبەك تە وسى مەرەكەدە سابيلەرىنىڭ تۇساۋىن كەسكىزۋگە ارنايى الىپ كەلدى. العاشقى قادامىن جاساعان بالدىرعانداردىڭ تۇساۋىن ءبىلىم بەرۋ سالاسىنىڭ ۇزدىگى, 40 جىلعا جۋىق تاجىريبەسى بار ينجەنەر-پەداگوگ اسەت ءجۇمادىلوۆ كەستى.
«وتباسىندا التى بالامىز بار, تۇڭعىشىمىز دارىن 13 جاستا, ول دا بۇگىن مەنىمەن بىرگە كەلدى. كۇيەۋىم اسپاز بولىپ جۇمىس ىستەيدى. بۇگىن وسى مەرەكە كۇنى ءۇش كىشكەنتايىم – دارحان, ديانا, داريانىڭ تۇساۋىن كەسكىزدىم. بۇل ءراسىمنىڭ ءدال ناۋرىز كۇندەرىندە اتقارىلعانىن جاقسى ىرىمعا بالاپ وتىرمىن. بالالارىمنىڭ الداعى بولاشاق جولى ءۇشىن جاقسى ءبىر بەلگى دەپ سانايمىن», دەدى ول.
وسى كۇنى ناۋرىزباەۆتار وتباسى دا قۋانىشقا كەنەلىپ, 22 ناۋرىزدا ءبىر جاسقا تولاتىن كىشكەنتاي يناياتتىڭ تۇساۋى كەسىلدى:
«تۇڭعىش بالامىزدىڭ وسىنداي سالتاناتتى جاعدايدا العاشقى قادامىن جاساعانىنا قاتتى قۋانىپ تۇرمىز. جاستاردىڭ ۇلتتىق داستۇرلەرىمىزدى ساقتاپ, ونى ۇستانۋعا بەلسەندى قاتىسقانىن قوشتايمىن», دەيدى يناياتتىڭ اناسى ديانا الىمبەك.
ال بۇل كۇنى قاراتال اۋدانىندا تۇساۋى كەسىلگەن 30 بالاعا بايعازى رەتىندە قوزى بەرىلدى. قۋانىش اسەرىمەن بولىسكەن كوپبالالى انا, «التىن القا» يەگەرى ليدا جانبوتا:
ء«بىزدىڭ وتباسىمىز ءۇشىن بۇگىن قۋانىش, قىزىمىز العاشقى قادامىن جاسادى. ناۋرىز مەرەكەسىمەن, قاسيەتتى رامازان ايىمەن تۇسپا-تۇس كەلگەن جاقسىلىققا اۋلەتىمىز ەرەكشە قۋانىپ وتىر. ۇيىمداستىرۋشىلارعا ۇلكەن راحمەت. بۇگىن قىزىما سىيعا تارتىلعان كىشكەنتاي قوزىسى ەندى وزىمەن بىرگە شاپقىلاپ ويناپ وسەتىن بولدى», دەپ ۇيىمداستىرۋشىلارعا العىسىن جاۋدىردى.
جەتىسۋ وبلىسى
