فوتو: freepik
بۇگىن ءبىر مەزەتتە ەلورداداعى 111 مەكتەپتە سىنىپ ساعاتتارى ءوتىپ, 200 مىڭعا جۋىق وقۋشى ەلىمىزدىڭ سۋ رەسۋرستارى جانە ونى ۇنەمدەپ پايدالانۋ تۋرالى اقپاراتپەن تانىستى.
وسى مازمۇنداعى باس قوسۋعا سالا ءمينيسترى نۇرجان نۇرجىگىتوۆ قاتىستى.
مينيستر №104 مەكتەپتىڭ وقۋشىلارىنا ەلىمىزدە سۋ رەسۋرستارىن ۇنەمدەۋ جانە ونى ءتيىمدى پايدالانۋ بويىنشا ۆەدومستۆونىڭ اتقارىپ جاتقان جۇمىسى تۋرالى ايتىپ بەردى. مينيسترلىك 2024-2026 جىلدارعا ارنالعان سۋ ۇنەمدەۋدىڭ جول كارتاسىن ازىرلەدى. قۇجات سۋ زاڭناماسىن جەتىلدىرۋ, سۋ سالاسىن تسيفرلاندىرۋ, سۋدى ەسەپكە الۋ مەن سۋ ۇنەمدەۋدىڭ زاماناۋي تەحنولوگيالارىن ەنگىزۋ جونىندەگى ءىس-شارالاردى كوزدەيدى. بۇدان بولەك, تۇرمىستىق جاعدايدا سۋ ۇنەمدەۋ بويىنشا ادىستەمەلىك نۇسقاۋلىق ازىرلەنگەن.
ء«بىز تىرشىلىك ءۇشىن ماڭىزدى بۇل جوبانى مەكتەپ وقۋشىلارىنان باستاۋدى ءجون كوردىك. سەبەبى, مەكتەپ جاقسى ادەت پەن دۇرىس داعدى ۇلگىسىن قالىپتاستىرۋدىڭ باستاماسى. بۇل جوبا وقۋشىلاردىڭ سۋ رەسۋرستارىنىڭ ماڭىزى تۋرالى ءبىلىمىن ارتتىرۋعا, جاستاردىڭ ەكولوگيالىق جاۋاپكەرشىلىگىن دامىتىپ, قالا مەكتەپتەرىندە سۋدى ۇنەمدەۋ قوزعالىسىن قالىپتاستىرۋعا ارنالعان. ءبىز الداعى ۋاقىتتا بۇل جوبانىڭ اۋقىمىن رەسپۋبليكا كولەمىندە ودان ءارى دامىتىپ, بارلىق جاستاعى ازاماتتاردى قامتۋدى جوسپارلاپ وتىرمىز», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
شارا بارىسىندا وقۋشىلار تاقىرىپ توڭىرەگىندە ويىمەن ءبولىسىپ, سۋدى ۇنەمدەۋگە قاتىستى تىڭ يدەيالارىن ورتاعا سالدى.
