قۇرىلتايدىڭ ءبىر جاقسى جەرى – وسى جەردە ماماندار ايتقان ۇسىنىستار وتىرىس حاتتاماسىنا ەنگىزىلىپ, بىردەن مينيسترلىكتەرگە جولدانادى. سوندىقتان قۇرىلتاي بيۋروكراتيالىق كەدەرگىلەردى جويعان بىردەن-ءبىر مىنبەر دەپ بىلەمىن.
ءبىز بۇعان دەيىن قۇرىلتاي مۇشەلىگىنە كىرگەن ەلىمىزدەگى ءۇش جوو رەكتورى اقىلداسا كەلە ءبىلىم مەن عىلىم سالاسىنىڭ دامۋىنا قاتىستى پىكىرلەر مەن ۇسىنىستاردى جۇيەلەۋ ماقساتىندا الدىن الا ساراپشىلىق توپتار قۇرىپ الىپ, سونىڭ نەگىزىندە ناقتى ۇسىنىستاردى جەتكىزۋگە تىرىسىپ باعامىز. مىنە, سول ءىسىمىز ناتيجەسىن بەرىپ جاتىر. كەشە عانا ارقالىقتاعى پەداگوگيكالىق ينستيتۋت الداعى ۋاقىتتا ۇلكەن ۋنيۆەرسيتەت بولادى دەگەن ءسۇيىنشى جاڭالىق ەڭسەمىزدى كوتەرىپ تاستادى.
سودان كەيىن ۇلتتىق قۇرىلتايدا, پرەزيدەنت جولداۋىندا ايتىلعان وڭىرلىك جوعارى وقۋ ورىندارىنا قولداۋ ءبىلدىرۋ, عىلىمي الەۋەتىن كوتەرۋ ءۇشىن تەحنوپاركتەر سالۋ ءىسى دە قولعا الىنا باستادى. جالپى, كەيىنگى ءتورت جىلدا عىلىم مەن بىلىمگە جوعارى دەڭگەيدە قاراجات ءبولىنىپ كەلەدى. ءتىپتى بىلتىرعى قيىن جاعدايدىڭ وزىندە ۋنيۆەرسيتەتتەرگە, عىلىم باعىتىندا جاقسى قارجىلىق قولداۋ كورسەتىلدى.
ارينە, كەمشىلىكتەر دە بار. ايتالىق, وتىز جىلدىڭ ىشىندە ۋنيۆەرسيتەتتەردەگى ينفراقۇرىلىم دامىماي قالدى. جاتاقحانالار مەن زەرتحانالار سالىنبادى. ەندى سونشالىقتى ءبولىنىپ جاتقان قارجىنىڭ قايتارىمىن ەلىمىز عىلىمنان دا, بىلىمنەن دە كۇتەدى. عىلىم مەن ءبىلىم دە مەملەكەت دامۋىنا قىزمەت ەتۋ قاجەت. عىلىمدى كوممەرتسيالاندىرۋ, بيزنەس ورتامەن, ءوندىرىس ورىندارىمەن جۇمىس جۇرگىزۋ سىندى شارۋالار قولعا الىنۋى كەرەك.
سونىمەن قاتار «سەرپىن» باعدارلاماسىن توقتاتپاي, ءارى قاراي دامىتقان ءجون. ياعني بۇل جوبامەن تەك باكالاۆر عانا ەمەس, ماگيسترانت, PhD دايارلاۋدى دا قولعا السا, ارتتا قالىپ وتىرعان شالعاي وبلىستارعا ۇلكەن سەرپىن بولار ەدى.
نۇرلان دۋلاتبەكوۆ,
ە.بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ رەكتورى, اكادەميك
