فوتو: ۇكىمەتتىڭ ءباسپاسوز قىزمەتى
بيىل ونەركاسىپ جانە قۇرىلىس مينيسترلىگى مەن وڭىرلەردىڭ الدىندا ەلىمىزدە كەمىندە 19 ملن شارشى مەتر تۇرعىن ءۇي سالۋ مىندەتى تۇر. شتاب وتىرىسىندا 2025 جىلدىڭ العاشقى ەكى ايىندا قازاقستاندا 1,9 ملن شارشى مەتر تۇرعىن ءۇي پايدالانۋعا بەرىلگەنى ايتىلدى. بۇل 2024 جىلدىڭ قاڭتار-اقپان ايلارىمەن سالىستىرعاندا 6,8%-عا تومەن. ونىڭ ىشىندە 1,2 ملن شارشى مەترى – كوپپاتەرلى تۇرعىن ۇيلەر, ال 713 مىڭ شارشى مەترى – جەكە ۇيلەر. ونەركاسىپ جانە قۇرىلىس مينيسترلىگى قۇرىلىس جانە تكش ىستەرى كوميتەتى توراعاسىنىڭ ورىنباسارى قانات مىڭباەۆتىڭ ايتۋىنشا, قۇرىلىس قارقىنىنىڭ تومەندەۋى ماۋسىمدىق جاعدايلارعا بايلانىستى, دەگەنمەن كۇن جىلىنىسىمەن بۇل كورسەتكىشتەر قايتا قالپىنا كەلەدى.
«الماتى وبلىسىندا 2024 جىلى نەگىزگى كاپيتالعا سالىنعان ينۆەستيتسيا كولەمى 980 ملرد تەڭگەنى (80% جەكە, 20% بيۋدجەتتىك) قۇراسا, 2025 جىلعا قويىلعان KPI – 1,35 ترلن تەڭگە. الدىن الا مالىمەتتەر بويىنشا, 2024 جىلى تىكەلەي شەتەلدىك ينۆەستيتسيا كولەمى $541 ملن-عا جەتەدى, 2025 جىلى KPI – $532 ملن. بيىلعى ەكى ايدا 89 ملرد تەڭگە ينۆەستيتسيا تارتىلدى, بۇل وتكەن جىلدىڭ سايكەس كەزەڭىمەن سالىستىرعاندا 16%-عا ارتىق. ينۆەستيتسيالاردىڭ نەگىزگى ۇلەسى – بيۋدجەتتەن تىس قاراجات. وڭىردە ەڭ تارتىمدى ينۆەستيتسيالىق سالالار – ونەركاسىپ (32%), جىلجىمايتىن م ۇلىك (22%), كولىك جانە قويمالاۋ (16%), ءبىلىم بەرۋ (17%). قازىرگى ۋاقىتتا وبلىستىڭ ينۆەستيتسيالىق پورتفەلى 57 مىڭ جۇمىس ورنىن اشاتىن 6,3 ترلن تەڭگە سوماسىنداعى 200 جوبانى قۇرايدى. 2025 جىلى وسى جوبالاردىڭ 35-ءى ىسكە قوسىلىپ, 303 ملرد تەڭگەگە 4,8 مىڭ جاڭا جۇمىس ورنى اشىلادى», دەلىنگەن حابارلامادا.
شتاب وتىرىسىندا الماتى وبلىسىنىڭ اكىمى مارات سۇلتانعازيەۆ ينۆەستيتسيالىق جوبالاردىڭ جۇزەگە اسۋىن تەجەيتىن بىرقاتار ماسەلەلەردى كوتەردى. سولاردىڭ ءبىرى – الاتاۋ قالاسىنىڭ باس جوسپارىن تۇزەتۋگە بايلانىستى. بەس جوبا ىسكە اسىرۋدىڭ بەلسەندى كەزەڭىنە وتسە دە, 11 جوبا جوبالاۋ جانە قۇرىلىس جۇرگىزۋگە قاجەتتى رۇقسات قۇجاتتارىن الا الماي وتىر. ۆيتسە-پرەمەر وقم-گە بۇل ماسەلەنى جاقىن ارادا شەشۋدى تاپسىردى.
«تاعى ءبىر جوبا – بالىق شارۋاشىلىعى كەشەنىنىڭ قۇرىلىسى – ينۆەستيتسيالىق سۋبسيديالار بويىنشا ليميتتەردىڭ قىسقارۋىنا بايلانىستى وندىرىستىك قۋاتتاردى كەڭەيتۋدىڭ ودان ءارى كەزەڭدەرىن تەجەدى. قۋاتتىلىعى 1 مىڭ توننا, ال قۇنى 9,5 ملرد تەڭگەنى قۇرايتىن 1-كەزەڭ ىسكە قوسىلعاننان كەيىن, قالعان 70 ملرد تەڭگەنى قۇرايتىن 9 كەزەڭ ينۆەستيتسيالاردى مەملەكەت تاراپىنان ءارى قاراي وتەۋگە قاتىستى بەلگىسىزدىككە بايلانىستى توقتاتىلدى», دەلىنگەن حابارلامادا.
پرەمەر-ءمينيستردىڭ ورىنباسارى اشم-گە ينۆەستور كەشەننىڭ قۇرىلىسىن جالعاستىرا الۋى ءۇشىن بالىق ونىمدەرى جوباسىنداعى ليميتتەردى قايتا قاراۋدى تاپسىردى.
سونداي-اق وتىرىستا جەر ۋچاسكەلەرىن ءبولۋ, ينفراقۇرىلىمدى جۇرگىزۋ, الماتى وبلىسىنىڭ بىرقاتار تۋريستىك نىساندارىنا جول سالۋ ماسەلەلەرى قارالدى.
«تۇركىستان وبلىسى كلاستەرلىك ۇلگىدە دامىپ كەلەدى. قازىرگى ۋاقىتتا وڭىردە ءۇش ءىرى كلاستەر قۇرىلعان: ماقتا-ماتا (5 جوبا, 197 ملرد تەڭگە), جۇگەرى (2030 جىلعا دەيىن جۇگەرى ءوسىرۋ كولەمىن 30%-عا ارتتىرۋ جانە كراحمال-پوتوكاسى زاۋىتىن ىسكە قوسۋ) جانە ەت ءوندىرىسى (5 جوبا, 43 ملرد تەڭگە). جالپى, 2024-2027 جىلدارعا ارنالعان ينۆەستيتسيالىق جوبالار پورتفەلىنىڭ قۇنى 2,5 ترلن تەڭگەنى قۇرايتىن 145 جوبانى قامتيدى. بۇل جوبالار اياسىندا 20,3 مىڭ جاڭا جۇمىس ورنى اشىلىپ, بيۋدجەتكە 100 ملرد تەڭگە قوسىمشا سالىق ءتۇسىمى كۇتىلۋدە. 2024 جىلى 137 ملرد تەڭگەگە 57 جوبا ىسكە اسىرىلىپ, 2,2 مىڭنان استام جاڭا جۇمىس ورنى اشىلدى. 2025 جىلى تاعى 57 جوبا 322 ملرد تەڭگەگە ىسكە قوسىلىپ, 6,9 مىڭ جاڭا جۇمىس ورنى اشىلادى. تەك اۋىل شارۋاشىلىعى سالاسىندا 68 جوبا جۇزەگە اسىرىلىپ, 423,7 ملرد تەڭگە ينۆەستيتسيا تارتىلادى, ناتيجەسىندە 9,2 مىڭنان استام جاڭا جۇمىس ورنى اشىلادى دەپ كۇتىلەدى», دەپ حابارلادى ۇكىمەتتىڭ ءباسپاسوز قىزمەتى.
شتاب وتىرىسىنىڭ قورىتىندىسى بويىنشا سەرىك جۇمانعارين بارلىق وڭىرلەرگە جەرگىلىكتى بيۋدجەتتەن ينۆەستيتسيالىق جوبالارعا قارجى ءبولۋدى ۋاقىتىلى قامتاماسىز ەتۋدى تاپسىردى. ال رەسپۋبليكالىق بيۋدجەتتەن قاراستىرىلعان ترانسفەرتتەر بەلگىلەنگەن مەرزىمدە بولىنەتىن بولادى.
«بيىل ۇكىمەت الەۋمەتتىك-ەكونوميكالىق ءوسۋ بولجامدارىمەن سالىستىرعاندا ەكونوميكالىق ءوسۋ ينديكاتورلارىن ۇلعايتۋ مىندەتىن قويىپ وتىر. بۇل ءۇشىن ءبىز «بايتەرەك» حولدينگى ارقىلى ءىرى بيزنەس پەن شوب-تى 8 ترلن تەڭگەگە نەسيەلەندىرۋگە 1 ترلن تەڭگە باعىتتايمىز. ەڭ باستى نازار – جقق بەرەتىن قايتا وڭدەۋ جوبالارىنا اۋدارىلادى. ۇلتتىق ەكونوميكا مينيسترلىگى ءاربىر ءوڭىر ءۇشىن ەكونوميكالىق ءوسىم يندەكسىنىڭ سالالىق دەكومپوزيتسياسىن جاسادى, ال وقم جاقىن ارادا تۇرعىن ءۇي قۇرىلىسىنىڭ 19 ملن شارشى مەتر كولەمىنە قول جەتكىزۋ بويىنشا ۇقساس سحەمانى ۇسىنادى. بارلىق قويىلعان ينديكاتورلار بەلگىلەنگەن مەرزىمدە ورىندالۋى ءتيىس», دەدى سەرىك جۇمانعارين.
