توتەنشە جاعداي قىزمەتى ماماندارىنىڭ پىكىرىنشە, مۇنداي فورمات ورتتەرگە, جول-كولىك وقيعالارىنا, وزگە دە توتەنشە جاعدايلارعا تەز ارادا دەن قويۋعا مۇمكىندىك بەرەدى. پاۆلودار قالاسىنان 100 كم جەردە ورنالاسقان جاڭا كەشەن – ەلىمىزدەگى ءۇشىنشى نىسان. ونىڭ بىرەگەيلىگى – بىرنەشە شۇعىل قىزمەتتىڭ بىرگە قىزمەت اتقارۋىنا جاعداي جاسالعان. ياعني ءبىر اۋماقتا ءورت ءسوندىرۋ ءبولىمى, اپاتتار مەديتسيناسى ورتالىعىنىڭ تراسسالىق مەديتسينالىق-قۇتقارۋ بەكەتى توعىسقان. جاقىن ارادا مۇندا وبلىستىق توتەنشە جاعدايلار دەپارتامەنتى جەدەل-قۇتقارۋ جاساعىنىڭ قىزمەتكەرلەرى جۇمىس ىستەي باستايدى.
– مينيسترلىك اۋىلدى جەرلەردەگى قاۋىپسىزدىكتى ارتتىرۋعا باعىتتالعان «اۋىل قۇتقارۋشىلارى» باعدارلاماسىن ىسكە اسىرۋدى جالعاستىرىپ جاتىر. بىرلەسكەن قىزمەت ۋاقىتتى قىسقارتۋعا مۇمكىندىك بەرەدى. توتەنشە جاعدايدىڭ سيپاتىنا قاراماستان, ياعني ءورت, جول-كولىك وقيعاسى نەمەسە شۇعىل مەديتسينالىق كومەك بولسىن, ماماندار ۇيلەسىمدى, جەدەل, ءتيىمدى ارەكەت ەتەدى. نىساندى جاڭارتۋ بيۋدجەت قاراجاتىنسىز جۇزەگە اسىرىلدى. ءورت سوندىرۋشىلەردى, قۇتقارۋشىلار مەن دارىگەرلەردى ءبىر بازادا بىرىكتىرۋ جاي عانا ىڭعايلىلىق ءۇشىن جاسالعان دۇنيە ەمەس. بۇل – توتەنشە جاعدايدان زارداپ شەككەندەرگە العاشقى مينۋتتاردا جەدەل كومەك كورسەتۋدىڭ ناقتى مۇمكىندىگى. مۇنداي كەشەندەردىڭ اۆتوجولداردىڭ ستراتەگيالىق ماڭىزدى ۋچاسكەلەرىندە ورنالاسقانى ءجون, – دەدى نىساننىڭ اشىلۋ سالتاناتىنا قاتىسقان توتەنشە جاعدايلار ءمينيسترى شىڭعىس ءارىنوۆ.
ورتالىقتىڭ اققۋلى اۋدانىندا ورىن تەبۋى ونىڭ ستراتەگيالىق ماڭىزدىلىعىن ەسكەرە وتىرىپ تاڭدالعان. سەبەبى ول پاۆلودار وبلىسىنىڭ اۋماعىن عانا ەمەس, «سەمەي ورمانىن» دا قامتي الادى. رەزەرۆاتتار مەن كولىكتىڭ جەتۋى قيىن ۋچاسكەلەرگە دە كومەك كورسەتۋگە مۇمكىندىك بەرەدى. كەشەن توتەنشە جاعداي سالدارىن جويۋعا قاجەتتى زاماناۋي تەحنيكامەن, جابدىقتارمەن جاراقتالعان. اۋماعىندا زارداپ شەككەندەردى شۇعىل ەۆاكۋاتسيالاۋ, قۇتقارۋ توپتارىن شالعاي اۋداندارعا جەدەل تاسىمالداۋعا لايىقتالعان تىكۇشاق الاڭى قاراستىرىلعان.
ەكى قاباتتى عيماراتتا ماماندار تاۋلىك بويى كەزەكشىلىك ەتەدى. جەكە قۇرامعا قولايلى جاعداي جاسالعان: دەمالۋعا ارنالعان, جۋىناتىن بولمەلەر, اس ءۇي, سونداي-اق ارنايى تەحنيكاعا قىزمەت كورسەتەتىن تەحنيكالىق ايماق قاراستىرىلعان. مينيستر اتاپ وتكەندەي, بۇعان دەيىن مۇنداي كەشەندەر اقمولا, قاراعاندى وبلىستارىندا پايدالانۋعا بەرىلگەن. ءىس-شارا سوڭىندا قىزمەتكەرلەرگە جاڭا ارنايى تەحنيكانىڭ كىلتتەرى, العىسحاتتار تابىس ەتىلدى. سونداي-اق وڭىرلىك دەپارتامەنتتەگى بىرنەشە قىزمەتكەردىڭ كاسىبيلىگى مەن ادالدىعى اتاپ ءوتىلىپ, ولارعا كەزەكتەن تىس شەندەر بەرىلدى.
پاۆلودار وبلىسى,
اققۋلى اۋدانى
