سۋرەتتى تۇسىرگەن – دميتري ەروفەەۆ
تاياۋدا وبلىس اكىمى بەيبىت يساباەۆ كورشى مەملەكەتتەردەن كەلگەن بىرنەشە ينۆەستورمەن كەزدەسىپ, ۇسىنىس-تىلەگىن قۋاتتادى. «Qingdao Wanlin Food Co., Ltd» كومپانياسىنىڭ قۇرىلتايشىسى ءارى باس ديرەكتورى لي يانتاو وڭىردە پياز وڭدەۋ زاۋىتىن سالۋ تۋرالى ۇسىنىس ءبىلدىردى.
ء«بىز ءوز تاراپىمىزدان زاۋىتتى ورنالاستىرۋ ماسەلەسىن پىسىقتايمىز. ال سىزدەردەن بولاشاق كاسىپورىننىڭ ەگجەي-تەگجەيلى جوباسىن كۇتەمىز. ارينە, ءبىز ءۇشىن ينۆەستيتسيا, بيۋدجەتكە تۇسەتىن سالىق تۇسىمدەرى ماڭىزدى, بىراق ەڭ باستىسى – جەرگىلىكتى تۇرعىنداردى جۇمىسقا ورنالاستىرۋ, ولارعا لايىقتى جالاقى تولەۋ. جەتىسۋ وبلىسى مەن قحر-نىڭ گەوگرافيالىق جاعىنان قولايلى ورنالاسۋى بىرلەسكەن جوبالاردى ىسكە اسىرۋعا مۇمكىندىك بەرەدى. ءبىز ينۆەستورلارعا زاڭدىق نەگىزدە قاجەتتى قولداۋ كورسەتەمىز», دەدى ب.يساباەۆ.
سونداي-اق ءوڭىر باسشىسى وزبەكستاننىڭ ەلىمىزدەگى توتەنشە جانە وكىلەتتى ەلشىسى باحتيەر يبراگيموۆپەن ەكىجاقتى ىنتىماقتاستىقتىڭ مۇمكىندىكتەرى مەن الەۋەتىن تالقىلادى.
«جەتىسۋ – اگرارلىق ايماق. سونىمەن قاتار ءبىزدىڭ وبلىس ءتيىمدى گەوستراتەگيالىق جانە گەوەكونوميكالىق جاعىنان ەرەكشەلەنەدى. جەتىسۋ – قىتايمەن اراداعى شەكارادا 5 كەدەن بەكەتى بار رەسپۋبليكاداعى جالعىز ءوڭىر. باتىس ەۋروپا – باتىس قىتاي ترانسكونتينەنتالدى اۆتوبانى ءبىزدىڭ تەرريتوريا ارقىلى وتەدى. جالپى, وڭىردە اگروونەركاسىپتىك كەشەندى دامىتۋ, كولىك جانە لوگيستيكا, تۋريزم, بالامالى ەنەرگەتيكا جانە ونەركاسىپ – جالپى 5 ستراتەگيالىق باعىتتا ينۆەستورلار تارتۋ جۇمىستارى جۇرگىزىلىپ جاتىر», دەدى وبلىس اكىمى.
ءوز كەزەگىندە باحتيەر يبراگيموۆ جىلى كەزدەسۋ ءۇشىن العىس ءبىلدىرىپ, جەتىسۋدان ەت ەكسپورتتاۋعا قىزىعۋشىلىق تانىتىپ وتىرعانىن جەتكىزدى. سونىمەن بىرگە ساپار اياسىندا ەلشى باستاعان رەسمي دەلەگاتسيا تالدىقورعاندا بيزنەس-قاۋىمداستىقپەن كەزدەستى. سول سياقتى «قورعاس – شىعىس قاقپاسى» اەا, «قورعاس» شىحو, «نۇر جولى» اۆتوموبيل وتكىزۋ بەكەتىنىڭ جۇمىسىمەن تانىستى.
قىرعىز ەلىنىڭ رەسمي وكىلى جەنيشبەك اسانكۋلوۆ كەلىسسوز بارىسىندا اۋىل شارۋاشىلىعى جارمەڭكەلەرىن, بيزنەس فورۋمداردى بىرلەسىپ وتكىزۋ, تۋريستىك باعىتتاردى دامىتۋ, مادەنيەت جانە ءبىلىم سالالارىندا ءوزارا تاجىريبە الماسۋ جايىن ءسوز ەتتى. كەزدەسۋ قورىتىندىسىندا بەيبىت يساباەۆ باس كونسۋل تاراپىنان ايتىلعان ۇسىنىس-تىلەكتەردى قولدايتىنىن, ولاردى بىرلەسىپ اتقارۋعا, ناقتى جوبالاردى قاراستىرۋعا دايىن ەكەنىن جەتكىزدى.
جەتىسۋ وبلىسى
