سۋرەتتى تۇسىرگەن – اياۋجان وتەۋلينوۆا
بيىل شىعىستان شىققان قوس قالامگەر – قاليحان ىسقاق پەن ديداحمەت ءاشىمحان ۇلىنىڭ مەرەيتويلارى. وسى اتاۋلى كۇندەرگە ارنالعان ءىس-شارالار لەگى اقىن اقتان نۇرباەۆ اتىنداعى اقىندار مەكتەبىنىڭ اشىلۋىمەن باستالدى. اقتان نۇرباەۆ اقىن كەڭەس كەزەڭىندە وڭىرىمىزدە ايتىس ونەرىن دامىتۋعا اتسالىسقان ەدى. جازعان ولەڭدەرى دە ءورىلىپ تۇسكەن, ماعىناسى تەرەڭ. اقىن اتىنداعى مەكتەپ ايتىس ونەرىنە دەن قويعان دارىندى جاستاردىڭ باسىن قوسىپ, باعىت-باعدار بەرىپ, تالانتتارىن شىڭداۋدى ماقسات ەتكەن. لەنتاسىن ايتىستىڭ اتاسى ءجۇرسىن ەرمان, اقىن ۇلىقبەك ەسداۋلەت, جازۋشى الىبەك قاڭتارباي قيعان سوڭ جاڭا ورتا ىلگەرى باسىپ, ىرگەلى مەكتەپكە اينالۋعا ءتيىس تە. بۇل ءىس-شارادان سوڭ قۇرمەتتى قوناقتار ايتىسقا اسىققان. كەڭ سارايدىڭ ىشىنەن ينە شانشىر ورىن تاپپاعان كورەرمەن سىرتقا جايعاسىپ, ايتىس تىڭداۋعا ىڭعايلانىپتى. الايدا ورىننىڭ بولماعانىنا ەشكىم قاباق شىتپادى. كەرىسىنشە رۋحاني كەشكە حالىقتىڭ كوپتەپ جينالعانى قۋانتتى.
ايتىس ءا دەپ باستالعاندا-اق تىڭدارماندى ۇيىتىپ اكەتتى. اقىندار ءبىر-بىرىمەن تىستەسىپ, ازىلدەسىپ, جىر شۋماقتارىن توككەندە كورەرمەن «بارەكەلدى» دەسىپ, قولپاشتاپ وتىردى. ءوڭىردىڭ ماسەلەلەرىن دە تۇيرەپ ءوتتى. رۇستەم قايىرتاي وبلىستىق دراما تەاترعا قاليحان ىسقاقتىڭ اتىن بەرۋ كەرەك دەپ ءبىر وراپ وتسە, جازۋشىنىڭ اۋىلىندا اۋىزسۋدىڭ جوقتىعىن ايتىپ, ءبىر تۇيرەدى.
ايتىس كەشكە دەيىن جالعاستى. ورىن الىپ ۇلگەرمەگەن كورەرمەن سول قالپى تىكەسىنەن تىك تۇرىپ تاماشالادى. قانداي مەگا جۇلدىز كەلىپ ونەر كورسەتسە, سوڭىنا دەيىن شىداماس ەدى ەل. بۇل دەگەنىمىز ءتول ونەردىڭ قۇدىرەتى دەرسىز. ءسويتىپ, ايتىستىڭ باس بايگەسى جەرگىلىكتى اقىن سەرىك قۋانعانعا بۇيىرسا, ءبىرىنشى ورىندى رۇستەم قايىرتاي ەنشىلەپ, التىن دومبىراعا جولداما الدى. ەكىنشى ورىندى اسپانبەك شۇعاتاەۆ پەن يرانعايىپ كۇزەنباەۆ الدى. ال ءۇشىنشى ورىن جانسايا مۋسينا مەن ءبىرجان بايتۋوۆقا بەرىلدى.
جازۋشىلارعا ارنالعان رۋحاني ءىس-شارالاردىڭ بۇل – باسى. ءدۇبىرلى توي جازدىڭ كۇنى تۋعان جەرلەرىندە جالعاسىن تابادى.
وسكەمەن
