تۋريزم • 11 ناۋرىز, 2025

تاعى بەس شەتەلدىك ازامات Neo Nomad ۆيزاسىن الدى

70 رەت

كورسەتىلدى

1 مين

وقۋ ءۇشىن

بىلتىر قاراشا ايىنان باستاپ ىسكە قوسىلعان Neo Nomad ۆيزاسىن تاعى بەس شەتەلدىك ازامات الدى. بۇل تۋرالى تۋريزم جانە سپورت مينيسترلىگى حابارلادى, دەپ جازادى Egemen.kz.

دانا مىرزاقادىر

تاعى بەس شەتەلدىك ازامات Neo Nomad ۆيزاسىن الدى

فوتو: inbusiness.kz

Neo Nomad ۆيزاسىن وسى جولى العانداردىڭ ۇشەۋى - اقش, بىرەۋى ۇلىبريتانيا جانە تاعى بىرەۋى لاتۆيا ازاماتى.

Neo Nomad ۆيزاسى شەتەلدىك ازاماتتارعا قازاقستاندا ءبىر جىلعا دەيىن تۇرۋعا مۇمكىندىك بەرەدى. بۇل رەتتە ولار شەتەلدەگى كومپانيالاردا قاشىقتان جۇمىس ىستەي الادى. ۆيزا IT, ماركەتينگ, قارجى, ديزاين جانە كونسالتينگ سالالارىنداعى جۇمىسىن ساياحاتپەن ۇشتاستىراتىن زاماناۋي كوشپەندىلەرگە ارنالعان.

ول ءۇشىن شەتەلدىك ازاماتتار قازاقستان رەسپۋبليكاسىنىڭ شەتەلدەگى ەلشىلىكتەرىنە مىناداي قۇجاتتاردى تاپسىرۋ قاجەت:

كەيىنگى 6 ايداعى بانك شوتىنان ءۇزىندى كوشىرمە, اي سايىنعى تابىسى 3 000 اقش دوللارىنان جوعارى ەكەنىن راستايتىن قۇجات;

ازاماتتىعى بار ەلدىڭ ۋاكىلەتتى ورگانى بەرگەن سالىق دەكلاراتسياسى;

ازاماتتىعى نەمەسە تۇراقتى مەكەنجايى بار ەلدىڭ ورگانى بەرگەن سوتتالماعانى تۋرالى انىقتاما;

ۆيزانىڭ قولدانىلۋ مەرزىمىنە دەيىن جارامدى مەديتسينالىق ساقتاندىرۋ;

قازاقستانداعى تۋريستىك كومپانيالاردان شاقىرۋ (48 ەلدىڭ ازاماتى ءۇشىن تالاپ ەتىلمەيدى).

ايتا كەتەيىك, بۇعان دەيىن Neo Nomad ۆيزاسىن ءۇش شەتەلدىك تۋريست العان ەدى. ۆيزانى ءبىرىنشى بولىپ ەنەرگەتيكا سالاسىندا جۇمىس ىستەيتىن ۇلىبريتانيا ازاماتى يەلەنگەن. سونداي-اق ۆيزالار وڭتۇستىك كورەيا جانە سينگاپۋر ازاماتتارىنا بەرىلگەن.