وبلىستىق مادەنيەت باسقارماسىنىڭ باستاماسىمەن اشىلىپ وتىرعان ايماعىمىزداعى العاشقى اقىندار مەكتەبى ايتىس ونەرىنە دەن قويعان دارىندى جاستاردىڭ باسىن قوسىپ, باعىت-باعدار بەرىپ, تالانتتارىن شىڭداماق. قازاق ايتىسىنىڭ قارا نارى, اقىن, قوعام قايراتكەرى ءجۇرسىن ەرمان باستاعان ەل اعالارى اقىندار مەكتەبىنىڭ تۇساۋىن كەسىپ, جاس تالانتتاردى ايتىس ونەرىنە باۋليتىن مەكتەپ جۇمىسىنا ساتتىلىك تىلەدى. سالتاناتتى جيىنعا ارقا تورىنەن, الاتاۋ باۋرايىنان, شەجىرەلى سەمەي وڭىرىنەن كەلگەن ەسىمدەرى رەسپۋبليكاعا تانىمال امانجول ءالتاي, سەرىكزات دۇيسەنعازى, جاناربەك ءاشىمجان, داۋلەت سمەتوۆ, تالاي ءدۇبىرلى ايتىس دودالارىندا وبلىسىمىزدىڭ قانجىعاسىن مايلاعان جەرلەستەرىمىز اباش كاكەنوۆ, سەرىك قۇسانباەۆ سىندى اقىن اعالارىمىز بەن اقتان اقىننىڭ ۇرپاقتارى, زيالى قاۋىم وكىلدەرى قاتىستى.
ا.س. پۋشكين اتىنداعى شىعىس قازاقستان وبلىستىق كىتاپحاناسىندا اشىلعان اقىندار مەكتەبىنە دەمەۋشىلىك جاساعان ەرجان نۇرباەۆ باستاعان اقتان اقىننىڭ ۇرپاقتارى.
بۇل يگىلىكتى شارا «قاراسوزدىڭ قاراگەرى قاليحان» اتتى ءدۇبىرلى رەسپۋبليكالىق اقىندار ايتىسىمەن, جاز ايلارىندا قاليحان مەن ديداحمەتتىڭ تۋعان جەرى كاتونقاراعاي اۋدانىندا وتەتىن اۋقىمدى رەسپۋبليكالىق شارالارمەن جالعاسپاق.
جاستاردىڭ جىر كوكجيەگىن كەڭەيتىپ, جاڭا ەسىمدەردىڭ قالىپتاسۋىنا جول اشاتىن بۇل مەكتەپ – شىعىستاعى رۋحاني ورتانىڭ جاڭا تىنىسى.
