سۋرەتتى تۇسىرگەن – جۇماباي مۇسابەكوۆ
قاراتال توپىراعىنا بارىپ «شاكيرا نۇرجۇمانقىزى» دەسەڭىز, جۇرتشىلىق «الگى تراكتور جۇرگىزگەن شاكيرا عوي» دەپ, بىردەن تانيدى. بۇل مۇمكىن بۇگىندە جەڭىل اۆتوكولىكتى تىزگىندەپ جۇرگەن كوپشىلىك قىز-كەلىنشەكتەرگە تاڭسىق بولار. بىراق وتكەن عاسىردىڭ ورتا شەنىندەگى ايەل-انالار جاستايىنان اۋىر تەحنيكاعا وتىرىپ, ەڭبەكتىڭ ناق ۇلگىسىن كورسەتە ءبىلدى.
شاكيرا نۇرجۇمانقىزى قاراتال اۋدانى, كالپە ۇجىمشارى, كيروۆ تاۋارلى ءسۇت بولىمشەسىندە كوپبالالى قاراپايىم وتباسىندا دۇنيەگە كەلگەن. ءبىر وتباسىندا 10 بالا تاربيەلەنىپ وسكەن. اكەسى نۇرجۇمان سول اۋىلداعى ءسۇت فەرماسىندا بىرنەشە جىل مال دارىگەرى بولىپ قىزمەت اتقارعان. اناسى بولسا سول فەرمادا 40 جىلدان استام ۋاقىت بويى ساۋىنشى بولىپ ەڭبەك ەتكەن. ەكى ەڭبەك ادامىنىڭ تاربيەسىن كورگەن جاننىڭ ەر ادامعا بەرگىسىز قارەكەتكە بارۋى قايران قالدىرادى.
ء«بىزدىڭ زاماننىڭ بەت-بەينەسى بەتىمىزگە تۇسكەن اجىممەن ولشەنسە كەرەك. اكە-شەشەمىزدىڭ ەتەگىندە ءجۇرىپ, تىرلىككە ەرتە ارالاستىق. زامان قيىن, ەڭبەك ەتسەڭىز عانا ەلدەن قالمايسىز. سيىر ساۋدىق, جەر جىرتتىق, ەگىن ەكتىك, قولىمىزدان نە كەلەدى, ءبارىن اتقاردىق. ول ۋاقىتتا مىنا جۇمىس ۇنامايدى, مىنا جۇمىس ۇنايدى دەگەن ءسوز جوق. بەرىلگەن تاپسىرمانى ورىنداۋعا مىندەتتىسىڭ. ءسويتىپ ءجۇرىپ جەتىلدىك. قازىر قاراپ وتىرساڭىز, ءبارى ەرتەگى سەكىلدى», دەيدى كەيىپكەرىمىز.
بالا كۇنىندە ءسۇت فەرماعا بارىپ انالارىمەن بىرگە سيىر ساۋعان. مەكتەپتەن تىس ۋاقىتىندا سول اكە-شەشەسى ەڭبەك ەتەتىن زاۋىتتى جاعالاعان. اكەلەرىنە ىلەسىپ, مالعا جەمشوپ بەرىپ, كومەكتەسىپ تە جۇرگەن. ءۇيدىڭ ۇلكەنىنىڭ ءبىرى بولعاندىقتان, وزىنەن كەيىنگى باۋىرلارىنا قامقورلىق تانىتىپ, قاداعالاپ وتىرعان. ولاردىڭ كىرىن جۋىپ, تاماعىن ىستەپ, جۇمىستان قولى بوساي بەرمەيتىن اناسىنا قولعابىس ەتكەن.
جازعى دەمالىس كەزىندە كالپە ۇجىمشارىنىڭ ەگىستىك القابىنا بارىپ, قانت قىزىلشاسىنىڭ ارام ءشوبىن شاۋىپ, مەكتەپكە بارار كيىم-كەشەگىن ساتىپ العان. بالا كەزدەن وسىنداي اۋىل شارۋالارىنا ەرتە ارالاسقاننىڭ ناتيجەسىندە كالپە ورتا مەكتەبىن بىتىرىسىمەن, 17 جاسىندا وسى كەڭشاردا ساۋىنشى بولىپ ەڭبەك جولىن باستادى. ەڭبەكسۇيگىشتىگىنىڭ ارقاسىندا ءۇش ايلىق مەحانيزاتورلىق كۋرستى ءبىتىرىپ الدى. قولىنا قۇجاتىن العان بەتتە بىردەن متز-40 تراكتورىنا وتىرىپ, ەڭبەك جولىن مەحانيزاتور بولىپ جالعاستىردى.
«ول كەزدە كەڭشاردا ءتورت قىزدان قۇرىلعان «قارلىعاش» اتتى كومسومول جاستارى مەحانيزاتورلار بريگاداسى بولاتىن. مەن وسى بريگاداعا بەسىنشى بولىپ قابىلداندىم. بريگادا مۇشەلەرى ىشىندە اۋىلداعى قۇتجان بايگوزوۆا, باقىت سادازباەۆا بار ەدى. پارتيا قاتارىنا ءوتتىم. كالپە ۇجىمشارى كيروۆ اۋىلدىق وكرۋگىنە ەكى مارتە دەپۋتات بولىپ سايلاندىم. اۋداندا ەڭبەك وزاتتارى قاتارىنا ءىلىنىپ, اۋدان, وبلىس اكىمشىلىگىنىڭ بىرنەشە العىسحاتتارى, ماقتاۋ گراموتاسى, ديپلومدارىمەن ماراپاتتالدىم. ەرەن ەڭبەگىمىز جونىندە وبلىستىق, اۋداندىق گازەتتەردە بىرنەشە ماقالا جاريالاندى. ەڭبەك وزاتى رەتىندە وبلىس, اۋدان اكىمشىلىگىنىڭ الدىنداعى ەڭبەك وزاتتارى تاقتاسىنا سۋرەتىمىز ءىلىندى», دەپ ەسكە الادى ءوزى سول ءبىر اياۋلى ساتتەردى.
كالپە ۇجىمشارىندا ايدار تاۋارلى ءسۇت بولىمشەسىندە تۇراتىن اسىلحان ەسىمدى ازاماتپەن وتباسىن قۇرىپ, ءتورت بالانىڭ اناسى اتاندى. وتباسىلىق ومىرىمەن عانا شەكتەلىپ قالماي, اۋىلداعى ءتۇرلى شارۋاشىلىق جۇمىستارعا دا بەلسەنە ارالاسىپ تۇردى. كورشى اۋىلدا «جاعاتال» اسىل تۇقىمدى قۇس فەرماسى اشىلىپ, ەڭبەك جولىن سول ءوندىرىس ورنىندا بريگادير بولىپ جالعاستىرۋدى جۇرەگى قالادى. كەيىن تالدىقورعان قالاسىنداعى زووتەحنيكالىق تەحنيكۋمىن ءبىتىرىپ, ءسۇت فەرماسىندا بىرنەشە جىل تەحنيك-وسەمەناتور بولىپ جۇمىس ىستەدى.
«ۇيادا نە كورسەڭ, ۇشقاندا سونى ىلەرسىڭ» دەمەكشى, ۇلدارىم دا ءبىزدىڭ جولىمىزدى قۋىپ اۋىل شارۋاشىلىعىندا ەڭبەك ەتىپ جاتىر. ايدوس ەكى قىز تاربيەلەپ وتىر, ەلدوستىڭ ءۇش قىزى بار. كەلىندەرىم مادەنيەت سالاسىندا قىزمەت ىستەيدى. قىزىم گۇلميرا تۇرمىستا, ۇل-قىز ءوسىرىپ وتىرعان انا. وبلىس ورتالىعىنداعى №24 مەكتەپ-ليتسەيدە اقپاراتتانۋ ءپانىنىڭ مۇعالىمى», دەيدى شاكيرا اپا.
2000 جىلى وتباسىمەن جەكە شارۋا قوجالىعىن قۇرعان. بۇگىندە سول قوجالىققا باسشىلىق جاساپ وتىر. جولداسى اسىلحان, ۇلدارى ايدوس پەن ەلدوستىڭ قولداۋىمەن شارۋاشىلىقتى كەڭەيتىپ جاتىر. كەيىنگى جىلدارى قوسىمشا قانت قىزىلشاسىن ءوسىرۋدى قولعا العان. جىل سايىن 19 گەكتار سۋارمالى جەردىڭ ءار گەكتارىنان 70-80 توننادان ءتاتتى ءتۇبىر الادى.
جەتىسۋ وبلىسى
