بىلتىرعا دەيىن پاراليمپيادا عانا ەمەس, جازعى وليمپيا ويىندارىندا دزيۋدو كۇرەسىنەن قازاق قىزدارىنا مەدال بۇيىرماي كەلگەن ەدى. ويسىراعان ولقىلىقتى قارشاداي قىز بۇتىندەپ بەردى. اقمارال پاراليمپيا ويىندارىنىڭ شيرەك فينالىندا ۇندىستاندىق كوكيلونى ايقىن باسىمدىقپەن جىقتى. جارتىلاي فينالدا تۇرىك قىزى جاحيدە ەكەنى دە ەركىن ەڭسەردى. فينالدا سىرالعى قارسىلاس, فرانتسۋز قىزى مارتينە ساندرينمەن بەلدەستى. ءوز ەلىندە ءوتىپ جاتقان تورتجىلدىق الاماننىڭ التىن مەدالى ءۇشىن ساندرين بارىن سالىپ كۇرەسكەنىمەن, قازاقتىڭ قارشىعاداي قىزىنىڭ قايراتىنا توتەپ بەرە الماي, ويسىراي جەڭىلدى.
ودان بۇرىن, 2022 جىلى ازەربايجاننىڭ باكۋ قالاسىندا پارادزيۋدودان الەم چەمپيوناتى ءوتتى. اقمارال ءوزىنىڭ ۇيرەنشىكتى سالماعى سانالاتىن 48 كيلودا بەلدەسۋگە ءتۇستى. بارلىق قارسىلاستارىن ايقىن ۇتىپ, جاھاندىق دودانىڭ التىن مەدالىن يەلەندى. جالپى, پارادزيۋدودان الەم چەمپيوناتىنىڭ التىن مەدالىن سپورتشىلارىمىزدىڭ اراسىنان العاش بولىپ 2018 جىلى ولجاس ورازالى ولجالاسا, ايەلدەر اراسىندا اقمارال تۇڭعىش توپ جاردى. فينالدىق تارتىستا فرانتسيانىڭ ماقتانىشى مارتينە ءساندريندى ۇتتى. وزىنەن 17 جاس ۇلكەن قارسىلاسىنان قايمىققان جوق. اقمارال بەس جاسقا تولعاندا بۇل مارتينە 2004 جىلى افينا پاراليمپياداسىنىڭ كۇمىس مەدالىن, 2008 جىلى بەيجىڭ, 2021 جىلى توكيو پاراليمپياداسىنىڭ دا فينالىندا ءسۇرىنىپ, كۇمىستى ولجالادى. 2016 جىلى ماقساتىنا جەتىپ, ريو پاراليمپيا ويىندارىنىڭ چەمپيونى اتاندى. مىنە, وسىنداي ات ۇركىتەر اتاققا يە ساڭلاقتى قايسار قىز قايمىقتىرا ءبىلدى. باكۋدە وتكەن الەم چەمپيوناتىنىڭ التىن مەدالى اقمارالعا وتە باعالى. سەبەبى ول وسى دۇنيە ديدارىن اۋدارعان دودادا مارتينەدەن بولەك توكيو پاراليمپياداسىنىڭ چەمپيونى, ازەربايجان قىزى شاحانا گادجيەۆا دا بەلدەستى. ءوز ەلىندە بارىن سالىپ كۇرەسكەنىمەن وعان قولا مەدال عانا بۇيىردى.
اقمارالدىڭ كورۋ قابىلەتىنىڭ ناشارلاۋى ءتۋابىتتى كەسەل ەمەس. ول سپورت مەكتەبىندە وقىپ ءجۇرىپ جاسوسپىرىمدەر اراسىندا, جاستاردىڭ دوداسىندا دا بەلدەسىپ ايتارلىقتاي تابىسقا جەتتى. بىراق بىرتە-بىرتە كوزىنىڭ قاراشىعى سەمە باستادى. ءتىپتى دارىگەرلەر سپورتتى دوعارۋ كەرەگىن دە ايتتى.
– سول ساتتە مەنىڭ الدىمدا ەكى تاڭداۋ تۇردى. ەكەۋى دە نارتاۋەكەل ەدى. سپورتتى وسى ارادان دوعارىپ, ءوزىمدى باسقا سالادا سىناپ كورۋ نەمەسە سپورتتى قايتا جالعاستىرىپ, ءوزىمدى پارادزيۋدودا سىناپ كورۋ. پسيحولوگيالىق تۇرعىدا اۋىر سوقتى. 11 جاستان باستاپ دزيۋدومەن شۇعىلدانىپ, 7-سىنىپتان باستاپ سپورت مەكتەبىنە قابىلدانىپ, داڭعىل جول ەندى باستالعان ەدى. 2020 جىلى ەرەسەكتەر اراسىندا ەل چەمپيونى اتاندىم. بىراق مەديتسينالىق تەكسەرىستىڭ قورىتىندىسى كوڭىل قۋانتپادى. حالىقارالىق سايىستارعا قاتىسۋىما رۇقسات بەرىلمەدى. وتا جاساتسام دا ەش قايران بولمادى. تاعدىرعا مويىنسۇندىم, قيىن ساتتە اناما ارقا سۇيەپ, اقىلىن تىڭدادىم. پارادزيۋدومەن سپورتتاعى ساپارىمدى جالعاستىرامىن, الەم چەمپيونى اتانامىن, پاراليمپيادانىڭ التىنىن الامىن دەگەن ارمانىمنىڭ ورىندالاتىنىنا انا جۇرەگى ءشۇباسىز سەندى. قانداي قيىندىق, كەدەرگى كەزىكسە دە تىرەۋ بولاتىنىن جەتكىزىپ, دەمەدى. ءسويتىپ, ماقساتىمىز ورىندالدى, – دەيدى باتىر قىز.
جاقىندا حالىقارالىق دزيۋدو فەدەراتسياسى اقمارال ناۋاتبەككە ەسىم-سويى التىن تۇستەس جازىلعان جاپسىرمانى جىبەردى. بۇدان بىلاي قازاقتىڭ قايسار قىزى ەسىمى التىن ارىپپەن ادىپتەلگەن كيمونو كيىپ كۇرەسەدى. 26 جاسقا تولعان بالۋاننىڭ 2028 جىلى لوس-اندجەلەستە وتەتىن پاراليمپيادا دوداسىندا توپ جارىپ, ەكى دۇركىن چەمپيون اتاناتىن مۇمكىندىگى مول. پارا سپورتتا ساڭلاقتارىمىزدىڭ ىشىنەن ازىرگە پاۋەرليفتينگتەن داۆيد دەگتيارەۆ قانا پاراليمپيادانىڭ ەكى دۇركىن چەمپيونى دەگەن داڭققا يە. گەرمانيالىق ەگىزدەر كارمەن مەن رامونا 39 جاستارىندا پارادزيۋدودان پاراليمپيادانىڭ كۇمىسىن ولجالادى. دەمەك, اقمارالدىڭ ءتىپتى 2032 جىلى اۋستراليادا وتەتىن پاراليمپيادا دوداسىندا دا وزا شابۋىنا مۇمكىندىگى مول.
