2023 جىلى قاراشادا فيليپپين استاناسى مانيلادا ازيا بىرىنشىلىگى ءوتتى. 76 جاستاعى امەگۇلسىن اجە بىرنەشە قاشىقتىقتا وزىق شىعىپ, ەل مەرەيىن اسىردى. مارافونشى اجەي تەگىس جولدا عانا ەمەس, تاۋدا جۇگىرۋدەن دە بايراقتى دودالارعا قاتىستى. امەگۇلسىن اجە 8 جىلدىڭ ىشىندە 6 ەلگە تابانى ءتيىپ, ەلىمىزدەگى, شەتەلدەگى سايىستاردى قوسقاندا 121 مارافوندا باعىن سىنادى.
قيادا: ەۆەرەستى ەڭسەرگەن انار
بىلتىر 12 مامىردا جەرلەسىمىز انار بۇراشەۆا جەر شارىنىڭ ەڭ بيىك شىڭى ەۆەرەستكە شىعىپ, قازاق قىزدارى اراسىنان الەمنىڭ ەڭ بيىك نۇكتەسىنە تابان تىرەگەن تۇڭعىش الپينيست اتاندى. ءالپينيزمدى تۇراقتى ءومىر سالتىنا اينالدىرعان انار جۋىردا تاعى ءبىر شىڭعا كوتەرىلدى. ارگەنتيناعا تيەسىلى اكونكاگۋا شىڭىنا دا قازاق قىزىنىڭ تابانى ءتيدى. تەڭىز دەڭگەيىنەن 6962 مەتر بيىكتەگى شىڭ وڭتۇستىك امەريكانىڭ ەڭ بيىك نۇكتەسى سانالادى. قۇرامىندا ا.بۇراشەۆا بار ەكسپەديتسيا اكونكاگۋا شىڭىنا شىعۋ ساپارىن 21 كۇنگە جوسپارلاعانىمەن, 14 كۇندە ەڭسەردى.
اناردىڭ ەندىگى مەجەسى – سولتۇستىك امەريكاداعى ماك-كينلي تاۋى. وسى كوك تىرەگەن اسپانتاۋدىڭ دەنالي شىڭىنا شىعۋدى ماقسات ەتىپ وتىر.
سۋدا: انتاركتيدانى ءجۇزىپ وتكەن انەل
انەل سىتدىقوۆا تمد مەملەكەتتەرى اراسىندا انتاركتيدانى ءجۇزىپ وتكەن تۇڭعىش نازىك جاندى اتاندى. 750 مەتر قاشىقتىقتى 19+ مينۋتتا ءجۇزىپ ءوتۋ ءۇشىن قولايلى اۋا رايىن 10 كۇن كۇتتى. ترياتلون سپورتىنان تۇڭعىش بولىپ «قازاقستاننىڭ تەمىر حانىمى» اتانعان انەل انتاركتيدانى ءجۇزىپ وتۋگە بەل بۋىپ, زور تاۋەكەلمەن ماقساتىن ورىندادى.
انەل بىرنەشە جىل بۇرىن فرانتسيانىڭ سولتۇستىگىنەن بريتان ارالدارىنىڭ وڭتۇستىك-شىعىسىن جالعاعان لا-مانش بۇعازىن ءجۇزىپ ءوتىپ, تاڭداي قاقتىرعان بولاتىن. 34 شاقىرىم قاشىقتىقتى 15 ساعات 15 مينۋتتا گيدروكوستيۋم كيمەي-اق ءجۇزىپ ءوتۋى – تاڭعاجايىپ ناتيجە.
