كوللاجدى جاساعان – الماس ماناپ, «EQ»
ايتپاعىم, كىتاپ سۇيەر وقىرماننىڭ باسىم بولىگى وقيتىن دۇنيەسىنە تالعاممەن قارايدى. بوس دۇنيەگە ۋاقىت جوعالتپاۋعا تىرىسادى. تالعاممەن وقىلاتىن جازۋشىلار كوپ. ماسەلەن, اسقار التاي. اڭگىمەلەرىنىڭ تاقىرىبى تارتىپ تۇرادى: «كەنتاۆر», «كيللەر ساۋىسقان», «الپينيست», «سەلەبە», «كازينو», «تاگانكا», تاعىسىن تاعى. تۇنەۋگۇنى قايتالاي وقىپ شىققانىم «تاگانكا». بۇل دا – ءبىر دەممەن وقىلاتىن شىعارما.
ءبىزدىڭ قوعامدا ادىلدىك بار ما؟ بار بولسا, نەگە كەيبىرەۋلەر وعان قول جەتكىزە المايدى؟ نەگە شىندىق ايتقان ادامنىڭ جولى ىلعي تارىلىپ, تار قاپاسقا قامالادى؟ اسقار التايدىڭ «تاگانكا» اڭگىمەسى وسى سۇراقتارعا جاۋاپ ىزدەگەندەي اسەر قالدىرادى. اڭگىمە – جاي عانا كوركەم شىعارما ەمەس. بۇل ءبىر ادامنىڭ تاعدىرى ارقىلى بۇكىل جۇيەنىڭ قاتالدىعىن, ادامنىڭ رۋحاني كۇرەسىن كورسەتەتىن وتكىر تۋىندى. تەرگەۋ يزولياتورىنىڭ قاراڭعى بولمەسىندە ساعاتتاپ سۇراقتىڭ استىندا وتىرعان اقجەلەڭنىڭ بەينەسى وقىرماندى دا ويلاندىرادى. تەمىر ەسىك, سۇر قابىرعا, قاماقتاعى ادامنىڭ ەرىك-جىگەرى... وسى تۇستا اقجەلەڭنىڭ بالا كۇنى ەسىنە تۇسكەن. ەگەۋقۇيرىقتاردى تىرىدەي اۋلاپ, تۇبىنە وت قويىلعان بوشكەگە سالىپ قۋىرعاندارى ويعا ورالعان. كورشى ۆاسيا اعاسىنىڭ ەگەۋقۇيرىقتارعا جاساعان زەرتتەۋى ءتىپتى ويعا شومدىرعان. سويتسە, ۆاسيا اعايى دوڭىز قوراسىنا قاپتاعان ەگەۋقۇيرىقتىڭ بىرنەشەۋىن ۇستاپ الىپ, بوشكەگە قاماعان ەكەن. اشىققاندار ءبىر-ءبىرىن جەپ, كاننيبال تىشقاندارعا اينالا باستاعان. سوڭىندا قالعان بىرەۋىنىڭ مۇرتى مايلانىپ, جالى كۇجىرەيىپ, كاندەن يتتەي بولعان ەكەن. سوندا ۆاسيا اعاي ونى بىرنەشە كۇن اشىقتىرىپ بارىپ بوشكەدەن بوساتىپ جىبەرگەن. سوندا عوي, بىقپىرت تيگەندەي تۇقىمداستارىن جۇلمالاي باستاعان. اقىرى قاشىپ جوعالعان. سوڭدارىنان كاننيبال تىشقان دا كەتكەن. الايدا بىرەر ۋاقىتتان سوڭ, توپ-توپ بولعان ەگەۋقۇيرىقتار قايتىپ ورالادى. جەلكەسىنە جال بىتكەن ەگەۋقۇيرىق قانا ورالماعان. سويتسە, جابىلىپ, ونىڭ ءوزىن قۇرتىپ جىبەرگەن ەكەن. جازۋشى وسىنى مىسالعا كەلتىرە وتىرىپ, استارلى ويىن جەتكىزگەن. ول ويدى ءار وقىرمان وزىنشە تۇسىنەتىن شىعار.
اقجەلەڭ ارمان قۋعان, ادىلدىككە سەنگەن جان. بىراق ونىڭ بۇل سەنىمى تار قاپاستا سىناققا تۇسەدى. ونىڭ الدىندا سۋىققاندى تەرگەۋشى ءوزىنىڭ سۇراقتارىمەن, قۋلىق-سۇمدىق ارەكەتتەرىمەن اقجەلەڭنىڭ رۋحىن سىندىرعىسى كەلەدى. سىنىپ كەتەتىن ول ما؟ اڭگىمەگە باس قويساڭىز, ءسىزدى بىردەن تەرگەۋ بولمەسىنە ەنگىزىپ جىبەرەدى. تۋلاقتاي بولمە. ەسكى ورىندىق. شارشاعان دەنە, شارشاعان سانا. اقجەلەڭنىڭ كۇيى وسى. ۇرىپ-سوقسا ءبىر ءسارى, رۋحاني قىسىم ودان كۇشتى. بۇل قاپاس – ەرىك-جىگەرىن ءمۇجيتىن توزاق. بىراق كەيىپكەردىڭ جان الەمى, ەركىن ويى ەشكىمنىڭ قولىندا ەمەس. ونىڭ سەنىمى دە سان-ساققا كەتكەن.
«تاگانكاعا» تەرەڭ ۇڭىلسەڭىز, تەك ءبىر ادامنىڭ باسىنان وتكەن حيكايا ەمەس. ادىلدىك ىزدەگەن, بىراق بيلىكتىڭ قىسىمىنا تاپ بولعان ءاربىر جاننىڭ بەينەسى. جازۋشى بۇل تاقىرىپتى ءاتۇستى تاڭداماعانى بەلگىلى. قوعامداعى الدەنە تۇرتكى بولدى. ءومىردىڭ ءوزى ۇسىنعان سۇراقتارعا جاۋاپ ىزدەۋ سياقتى. سارالاساق, اقجەلەڭ ارقىلى بيلىك پەن حالىق اراسىنداعى كۇرەستى كورەمىز. ءبىرى – كۇش, ەكىنشىسى – سەنىم. ءبىرى – جۇيە, ەكىنشىسى – ادام. بۇل كۇرەس قاي ۋاقىتتا دا جالعاسىپ كەلەدى. جالعاسا بەرمەك. قىسىم, ادىلەتسىزدىك, رۋحاني كۇرەس – قاشاندا وزەكتى تاقىرىپ. بۇل اڭگىمەنى وقي وتىرىپ, وزىڭىزگە «مەن ادىلەتسىزدىككە توزە الامىن با؟ مەنىڭ رۋحاني كۇشىم قانداي؟» سىندى سۇراق قويارىڭىز انىق. وعان جاۋاپ تاپپاي, سان ءتۇرلى وي مازالاۋى دا مۇمكىن. بۇل شىعارما بىزگە وي سالادى, كۇرەسكە شاقىرادى, رۋحتى وياتادى. جازۋشىنىڭ شەبەرلىگى دە وسىندا. ول وقيعانى بايانداپ قانا قويماي, وقىرماندى سول وقيعاعا بىرگە ارالاستىرىپ جىبەرەدى.
ءسىز اقجەلەڭ سياقتى بەرىكتىكتى تاڭدايسىز با, الدە جۇيەگە مويىنسۇناسىز با, ونى ءوزىڭىز عانا شەشە الاسىز.
