سۋرەتتى تۇسىرگەن – جۇماباي مۇسابەكوۆ
كوزبەن كورگەن ادام قايىرىلماي كەتپەسى انىق. تاعدىردىڭ باسقا سالعانىنا كونىپ, ءتورت قابىرعاعا قامالىپ وتىرا بەرۋگە دە بولار ەدى. الايدا بولمىسىنداعى ەرىك-جىگەر مەن قاندا بار قاسيەتى مۇمكىندىگى شەكتەۋلى جاندى تىعىرىقتان الىپ شىقتى. ەسكەلدى اۋدانىنا قاراستى اباي اۋىلىنىڭ تۇرعىنى سەرىك جۇمابەكوۆ جىلقى باعۋدى سۇيىكتى ءىسىم دەپ سانايدى. قامبار اتا ت ۇلىگىن بالا جاسىنان جاقسى كورگەن ول بۇگىندە ەتتى, ءسۇتتى باعىتتاعى مال باسىن كوبەيتىپ, تۇقىمىن اسىلداندىرۋدى كوزدەپ وتىر.
«كوپبالالى وتباسىندا دۇنيەگە كەلدىم. 2010 جىلدان باستاپ ءبىرىنشى توپتاعى مۇمكىندىگى شەكتەۋلى جانمىن. بالا كەزدەن جىلقى مالىن جاقسى كورەمىن. ءبىر كۇنى اتتان قۇلاعانىم بار. جاس بولعاندىقتان با, جىعىلعان ساتتە دەنساۋلىعىما زاقىم كەلگەنىن اڭعارماپپىن. كوز جانارىمنىڭ زاقىمدانعانىن كەيىن ءبىلدىم. بىراق ءبارى كەش بولدى. وسىلايشا, كورۋ قابىلەتىنەن ايىرىلدىم. دەنساۋلىعىما بايلانىستى بىرازعا دەيىن جۇمىسسىز ءجۇردىم. دەسە دە الدا ماقسات تۇردى. تەحنيكانىڭ دامىعان زامانى عوي. ءوزىمدى جەتىلدىرۋدى ويلاپ, تيفلوتەحنيكالىق قۇرال قولدانۋدى ۇيرەندىم. بۇل ماعان ۇلكەن كومەك بولدى. جۇمىسقا ارنايى كولىكپەن اپارىپ, اكەلەدى. ءبىر سوزبەن ايتقاندا, الاڭسىز ەڭبەك ەتۋگە كەرەكتى جاعدايدىڭ ءبارى جاسالعان, ۋاقتىلى ەڭبەكاقى الامىز», دەيدى كەيىپكەرىمىز.
ەڭ باستىسى, زاعيپ جان «دەنساۋلىعىم جارامايدى, قولىمنان ءىس كەلمەيدى» دەپ ءتورت قابىرعادا قامالىپ, كوپتەن كومەك سۇراپ وتىرعان جوق. كەرىسىنشە, مۇمكىندىگىنىڭ شەكتەۋلىلىگىنە قاراماستان, قوعاممەن, ون ەكى مۇشەسى ساۋ ادامدارمەن تەڭ قارىم-قاتىناس جاسايدى. ءسويتىپ, ءوزى سەكىلدى تالاي جانعا بار بىلگەنىن ۇيرەتىپ, ورگە سۇيرەپ كەلەدى. جىلقى باعۋمەن بىرگە قارابۇلاق اۋىلىنداعى اۋداندىق كىتاپحانادا بىلتىردان بەرى زاعيپتار ءبولىمىنىڭ قىزمەتكەرى بولىپ ەڭبەك ەتەدى.
كىتاپحانادا وتەتىن ءىس-شارالاردىڭ ۇيىمداستىرىلۋىنا مۇرىندىق بولىپ جۇرگەن ازامات ەكى جىل بۇرىن وبلىس اكىمىنىڭ گرانتىمەن قاسكەلەڭ مادەنيەت كوللەدجىنە وقۋعا ءتۇسىپ, كىتاپحانا ماماندىعى بويىنشا ءبىلىم الدى. سەرىك سەمبەك ۇلى بۇگىندە مۇمكىندىگى شەكتەۋلى ازاماتتاردى قوعامعا تارتىپ, جۇمىس ىستەۋگە باۋلۋ, ءبىلىمىن جەتىلدىرىپ, ەڭبەككە ارالاستىرۋ, تىعىرىقتان شىعۋ جولدارىن كورسەتىپ, ءجون سىلتەۋدى مىندەتىم دەپ بىلەدى. ايتۋىنشا, ەسكەلدى اۋدانىندا 60 شاقتى مۇمكىندىگى شەكتەۋلى جان بار, سولاردىڭ باسىم بولىگى وسى كىتاپحاناداعى ءىس-شارالارعا قاتىسىپ تۇرادى.
بايقاعانىمىزداي, اتالعان عيماراتتىڭ ءبىر بۇرىشىنان ورىن تەپكەن قىزمەت ورنىندا جۇمىس ىستەۋىنە قاجەتتىنىڭ ءبارى تۇر. ۇستەل ۇستىندە تيفلوفلەشپلەەر, وقىپ, جازاتىن كومەك قۇرالدارى, باسقا دا زاتتارى تۇر. وسى ارقىلى كىتاپ وقىپ, ءبىلىمىن شىڭدايدى, ىزدەنەدى. ءوزى سەكىلدى ازاماتتارعا كومەكتەسىپ, العا جەتەلەيدى. كىتاپحانادان تىس ۋاقىتتا قامباراتا ت ۇلىگىن باعادى. جىلقى شارۋاشىلىعىمەن اينالىسۋعا كەلىنشەگى اقمارال ابدىلبەكقىزى كومەكتەسەدى. ول مالدى ازىقتاندىرىپ, سۋارۋدا, جىلقى, سيىر ساۋىپ, ءسۇت, قىمىز الۋدا, قۇرت-ىرىمشىك جاساپ, ساتۋدا ەش قينالمايتىنىن ايتتى.
«قازىر ونشاقتى باس بار. ەكەۋى اسىل تۇقىمدى. تاياۋدا رەسەي ەلىنەن اراب جىلقىسىن اكەلدىك. جاقىندا ق ۇلىندايدى. جىل سايىن ءتولىن ساتىپ, ودان تۇسكەن قاراجاتقا مال ازىعىن الامىز. ءبىر قىزىعى, جىلقىلارىم كوزىمنىڭ كورمەيتىنىن سەزەتىن سەكىلدى. ويتكەنى ولاردى ازىقتاندىراتىن ساتتە ماعان وزدەرىنىڭ قاي جاقتا تۇرعانى تۋرالى بەلگى بەرەدى. سول جاققا قاراي بەتتەيمىن. جاز كەزدەرى دە سولاي. ولاردى جايىلىمنان الىپ قايتقاندا ەش جەرگە بۇرىلماستان ۇيگە قاراي جول تارتادى. مەن سوڭدارىنان ەرىپ وتىرامىن. ياعني ءبىر-ءبىرىمىزدىڭ ارامىزدا كورىنبەيتىن بايلانىس بار. الداعى كەزدە بايگەگە قاتىسۋ ويدا بار», دەيدى سەرىك.
سەرىك سەمبەك ۇلى ءسوز سوڭىندا قيىن ساتتە جول كورسەتكەن ۇستازى قۋانىش قاپانوۆ اتتى ازاماتقا ەرەكشە العىسىن ءبىلدىردى. سەرىكتىڭ جۇمىسسىز قالعان كەزىندە اقىل-كەڭەسىن ايتىپ, تيفلوتەحنيكالىق قۇرال قولدانۋدى ۇيرەنۋىنە كوپ كومەگىن تيگىزىپتى. ناتيجەسىندە, قۇرىلعىنى قالاي پايدالانۋ كەرەگىن مەڭگەرىپ العان ول بۇگىندە جەمىسىن كورىپ وتىر.
جەتىسۋ وبلىسى
