جاقىندا كاتونقاراعاي مەكتەپتەرىنىڭ وقۋشىلارى ورمانشىلارمەن بىرلەسىپ, ىدىسقا ءسىبىر شىرشاسىنىڭ تۇقىمىن ەكتى. وقۋشىلار اۋەلى اعا بۋىننىڭ نۇسقاۋىمەن شىرشا تۇقىمى بۇرشىكتەردەن الىپ, ارنايى ەرىتىندىمەن وڭدەدى, ەڭ ساپالى دەگەندەرىن ىرىكتەپ الدى. سودان كەيىن بارىپ, وزدەرىنىڭ ەسىمى جازىلعان كونتەينەرلەرگە وتىرعىزدى. شارۋا مۇنىمەن اياقتالمايدى. الداعى ۋاقىتتا وسكىندەردى كاتونقاراعاي ۇلتتىق پاركىنىڭ تۇقىم باعىنا وتىرعىزىپ, ينسپەكتورلارمەن بىرگە كۇتىم جاسايدى. كوشەتتەر ءوسىپ-جەتىلگەن سوڭ اركىم ءوز كوشەتىن مەكتەپ اۋماعىنا كوشىرەدى.
جالپى, 2025 جىلدىڭ باسىنان بەرى مەكتەپ ورمانشىلىقتارىندا 600-گە جۋىق تۇقىم وتىرعىزىلدى. جىل سوڭىنا دەيىن 1000 تۇقىم ەگۋ مەجەلەنگەن. كوكتەم شىعا وقۋشىلار اكتسيا اياسىندا تۇقىمنان بولەك, 4000 دانا ءسىبىر شىرشاسىن وتىرعىزۋدى جوسپارلاپ وتىر.
– كاتونقاراعاي ۇلتتىق پاركىندە بارلىعى 10 مەكتەپ ورمانشىلىعى بار. مەكتەپ ورمانشىلىقتارى وسكەلەڭ ۇرپاقتىڭ ەكولوگيالىق مادەنيەتىن قالىپتاستىرۋ, تابيعي مۇرانى ساقتاۋ, وقۋشىلاردى قورشاعان ورتانى قورعاۋعا شاقىرۋ ماقساتىندا قۇرىلعان. مۇندا وقۋشىلار تابيعات تۋرالى تەوريالىق ءبىلىم الىپ قانا قويماي, تاجىريبە جاعىن دا مەڭگەرەدى, – دەيدى ورماندى قالپىنا كەلتىرۋ ينجەنەرى گۇلجاز امانباەۆا.
مەكتەپ ورمانشىلىقتارى تابيعاتتى قورعاۋ حاقىندا تاربيە بەرۋمەن قاتار اۋماقتاردى كوگالداندىرۋ, ورمانداردى قالپىنا كەلتىرۋ, جەرگىلىكتى تۇرعىندار اراسىندا ەكولوگيالىق قۇندىلىقتاردى ناسيحاتتاۋدا دا ۇلكەن جۇمىس اتقارادى. بۇل اكتسيا اسىرەسە جاھاندىق ەكولوگيالىق سىن-قاتەرلەر داۋىرىندە اسا ماڭىزدى.
شىعىس قازاقستان وبلىسى,
كاتونقاراعاي اۋدانى
