جالپى, تۋريستىك حابتىڭ اۋماعى – 7 گەكتار. كەشەن ىشىندە ۇزىن سانى 12 نىسان سالىنادى. قازىردىڭ وزىندە ەيفەل مۇناراسى, ۆەنەتسيا كانالى جانە ساق مونشاسى سەكىلدى الەمگە ايگىلى نىسانداردىڭ كوشىرمەسى تۇر. استاناداعى بەيبىتشىلىك جانە كەلىسىم سارايىنىڭ كوشىرمەسى دە ورىن تەپكەن. ەندى ءتاج-ماحال كەسەنەسىنىڭ كوشىرمەسى قويىلماق. تۋريستەرگە ارنالعان قوناقۇيى بوي كوتەرگەن.
سونداي-اق مۇندا ۇلتتىق قۇندىلىقتارعا دا ەرەكشە ءمان بەرىلگەن. وزىمە «بەسىككە» قويىلعان ەسكەرتكىش قاتتى ۇنادى. الىستان ايشىقتى كورىنەدى. ونىڭ بيىكتىگى استىنداعى تۇعىرىمەن ەسەپتەگەندە 3 مەتردىڭ ۇستىندە. ۇزىندىعى دا سول شامالاس. تۇعىرتاسىنا زاڭعار جازۋشى مۇحتار اۋەزوۆتىڭ «ەل بولام دەسەڭ, بەسىگىڭدى تۇزە» دەگەن ءسوزى جازىلعان. شىنىندا دا, حالقىمىز بەسىكتى ايرىقشا قاسيەت تۇتقان. وسى كيەلى بەسىكتىڭ ارقاسىندا قازاق ءتۇرلى زامان تەپەرىشىن كورسە دە, ۇرپاعىن كوبەيتتى.
بۇل ەسكەرتكىشتىڭ اۆتورى – كاسىبي سۋرەتشى بوز كەنجەاحمەتوۆ. ى. التىنسارين اتىنداعى ارقالىق پەداگوگيكالىق ينستيتۋتىنىڭ كوركەمسۋرەت فاكۋلتەتىن بىتىرگەن قىلقالام شەبەرىنە بۇل وي وعان العاشقى نەمەرەسى تۋعاندا كەلگەن ەكەن.
«اۋىلدا تۋعان كەز كەلگەن قازاق بالاسى بەسىكتە تەربەلىپ, اناسىنىڭ ءالديىن تىڭداپ وسەدى. سوندىقتان بەسىكتىڭ ورنى بولەك. الدىمەن «استانانىڭ التىن بەسىگى» دەگەن جوبا جاسادىم. بۇل ءۇش قاباتتى عيماراتقا ارنالعان ەدى. ءبىر جاعىنان, استانانى ۇلكەن ءۇي دەسەك, سونىڭ بەسىگى بولسا دەگەن ويدى مەڭزەدىم. بۇل جوبانى قالا اكىمدىگىنە ۇسىندىم. سودان كەيىن وسى ەسكەرتكىشتىڭ ەسكيزىن ازىرلەدىم. ونى ساپار ىسقاقوۆ اعاعا جىبەردىم. ول كىسى بىردەن قولدادى. ءسويتىپ, ۇلىم ەكەۋمىز جوباعا كىرىستىك. بارلىعىن وسىندا ءوزىمىز جاسادىق. تەك تۋريستىك كەشەننىڭ اشىلۋى قارساڭىندا اپارىپ ورناتتىق. ساپار اعا ونى ەلگە كولىكپەن جەتكىزىپ بەردى.
مۇنداي ەسكەرتكىش ەلوردانىڭ تورىندە تۇرسا دا ارتىق ەمەس. وسىنداي ناقىشتاعى ەسكەرتكىشتەر قالاعا كورىك بەرەدى. شىنىمدى ايتسام, «ۇلتتىق التىن بەسىك» اتتى كەشەن سالسام دەپ ارماندايمىن. جوباسى دايىن. ويتكەنى ۇلتتىق تاربيە بەسىكتەن باستالادى. سونى كورگەندەر ودان وي تۇيەر ەدى. قازىر ەلىمىزدە «دومبىرا» كۇنى اتالىپ وتىلەدى. مەنىڭشە, «بەسىك» كۇنى دە كەرەك سەكىلدى. ۇلت قۇندىلىقتارىن ساقتاۋ مەن ناسيحاتتاۋعا ارنالعان قازاق كۇنتىزبەسى بيىل 1 ماۋسىمدى «بەسىك جانە انا مەن بالا كۇنى» دەپ بەلگىلەپتى. وسىنىڭ ءوزى كوڭىلگە قۋانىش سىيلايدى», دەيدى سۋرەتشى.
قازىر بۇل ەسكەرتكىش جاڭا وتاۋ كوتەرگەن جاس جۇبايلار سۋرەتكە تۇسەتىن ورىنعا اينالعان.
